Who speaks here वैशंपायन vaiśaṃpāyana
English for this adhyāya (section level, not verse by verse): Ganguli’s translation, approximately §263–265 Ganguli follows a different edition, so the match is approximate.
वैशंपायन उवाच । अथाब्रवीद्द्रौपदी राजपुत्री; पृष्टा शिबीनां प्रवरेण तेन । अवेक्ष्य मन्दं प्रविमुच्य शाखां; संगृह्णती कौशिकमुत्तरीयम् ॥
vaiśaṁpāyana uvāca । athābravīd draupadī rājaputrī; pr̥ṣṭā śibīnāṁ pravareṇa tena । avekṣya mandaṁ pravimucya śākhāṁ; saṁgr̥hṇatī kauśikam uttarīyam ॥
बुद्ध्याभिजानामि नरेन्द्रपुत्र; न मादृशी त्वामभिभाष्टुमर्हा । न त्वेह वक्तास्ति तवेह वाक्य;मन्यो नरो वाप्यथ वापि नारी ॥
buddhyābhijānāmi narendraputra; na mādr̥śī tvām abhibhāṣṭum arhā । na tveha vaktāsti taveha vākyam; anyo naro vāpy atha vāpi nārī ॥
एका ह्यहं संप्रति तेन वाचं; ददानि वै भद्र निबोध चेदम् । अहं ह्यरण्ये कथमेकमेका; त्वामालपेयं निरता स्वधर्मे ॥
ekā hy ahaṁ saṁprati tena vācaṁ; dadāni vai bhadra nibodha cedam । ahaṁ hy araṇye katham ekam ekā; tvām ālapeyaṁ niratā svadharme ॥
जानामि च त्वां सुरथस्य पुत्रं; यं कोटिकाश्येति विदुर्मनुष्याः । तस्मादहं शैब्य तथैव तुभ्य;माख्यामि बन्धून्प्रति तन्निबोध ॥
jānāmi ca tvāṁ surathasya putraṁ; yaṁ koṭikāśyeti vidur manuṣyāḥ । tasmād ahaṁ śaibya tathaiva tubhyam; ākhyāmi bandhūn prati tan nibodha ॥
अपत्यमस्मि द्रुपदस्य राज्ञः; कृष्णेति मां शैब्य विदुर्मनुष्याः । साहं वृणे पञ्च जनान्पतित्वे; ये खाण्डवप्रस्थगताः श्रुतास्ते ॥
apatyam asmi drupadasya rājñaḥ; kr̥ṣṇeti māṁ śaibya vidur manuṣyāḥ । sāhaṁ vr̥ṇe pañca janān patitve; ye khāṇḍavaprasthagatāḥ śrutās te ॥
युधिष्ठिरो भीमसेनार्जुनौ च; माद्र्याश्च पुत्रौ पुरुषप्रवीरौ । ते मां निवेश्येह दिशश्चतस्रो; विभज्य पार्था मृगयां प्रयाताः ॥
yudhiṣṭhiro bhīmasenārjunau ca; mādryāś ca putrau puruṣapravīrau । te māṁ niveśyeha diśaś catasro; vibhajya pārthā mr̥gayāṁ prayātāḥ ॥
प्राचीं राजा दक्षिणां भीमसेनो; जयः प्रतीचीं यमजावुदीचीम् । मन्ये तु तेषां रथसत्तमानां; कालोऽभितः प्राप्त इहोपयातुम् ॥
prācīṁ rājā dakṣiṇāṁ bhīmaseno; jayaḥ pratīcīṁ yamajāv udīcīm । manye tu teṣāṁ rathasattamānāṁ; kālo ’bhitaḥ prāpta ihopayātum ॥
संमानिता यास्यथ तैर्यथेष्टं; विमुच्य वाहानवगाहयध्वम् । प्रियातिथिर्धर्मसुतो महात्मा; प्रीतो भविष्यत्यभिवीक्ष्य युष्मान् ॥
saṁmānitā yāsyatha tair yatheṣṭaṁ; vimucya vāhān avagāhayadhvam । priyātithir dharmasuto mahātmā; prīto bhaviṣyaty abhivīkṣya yuṣmān ॥
एतावदुक्त्वा द्रुपदात्मजा सा; शैब्यात्मजं चन्द्रमुखी प्रतीता । विवेश तां पर्णकुटीं प्रशस्तां; संचिन्त्य तेषामतिथिस्वधर्मम् ॥
etāvad uktvā drupadātmajā sā; śaibyātmajaṁ candramukhī pratītā । viveśa tāṁ parṇakuṭīṁ praśastāṁ; saṁcintya teṣām atithisvadharmam ॥