Who speaks here वैशंपायन vaiśaṃpāyana · धृतराष्ट्र dhṛtarāṣṭra · संजय saṃjaya
English for this adhyāya (section level, not verse by verse): Ganguli’s translation, approximately §66–68 Ganguli follows a different edition, so the match is approximate.
वैशंपायन उवाच । दुर्योधने धार्तराष्ट्रे तद्वचोऽप्रतिनन्दति । तूष्णींभूतेषु सर्वेषु समुत्तस्थुर्नरेश्वराः ॥
vaiśaṁpāyana uvāca । duryodhane dhārtarāṣṭre tad vaco ’pratinandati । tūṣṇīṁbhūteṣu sarveṣu samuttasthur nareśvarāḥ ॥
उत्थितेषु महाराज पृथिव्यां सर्वराजसु । रहिते संजयं राजा परिप्रष्टुं प्रचक्रमे ॥
utthiteṣu mahārāja pr̥thivyāṁ sarvarājasu । rahite saṁjayaṁ rājā paripraṣṭuṁ pracakrame ॥
आशंसमानो विजयं तेषां पुत्रवशानुगः । आत्मनश्च परेषां च पाण्डवानां च निश्चयम् ॥
āśaṁsamāno vijayaṁ teṣāṁ putravaśānugaḥ । ātmanaś ca pareṣāṁ ca pāṇḍavānāṁ ca niścayam ॥
धृतराष्ट्र उवाच । गावल्गणे ब्रूहि नः सारफल्गु; स्वसेनायां यावदिहास्ति किंचित् । त्वं पाण्डवानां निपुणं वेत्थ सर्वं; किमेषां ज्यायः किमु तेषां कनीयः ॥
dhr̥tarāṣṭra uvāca । gāvalgaṇe brūhi naḥ sāraphalgu; svasenāyāṁ yāvad ihāsti kiṁ cit । tvaṁ pāṇḍavānāṁ nipuṇaṁ vettha sarvaṁ; kim eṣāṁ jyāyaḥ kim u teṣāṁ kanīyaḥ ॥
त्वमेतयोः सारवित्सर्वदर्शी; धर्मार्थयोर्निपुणो निश्चयज्ञः । स मे पृष्टः संजय ब्रूहि सर्वं; युध्यमानाः कतरेऽस्मिन्न सन्ति ॥
tvam etayoḥ sāravit sarvadarśī; dharmārthayor nipuṇo niścayajñaḥ । sa me pr̥ṣṭaḥ saṁjaya brūhi sarvaṁ; yudhyamānāḥ katare ’smin na santi ॥
संजय उवाच । न त्वां ब्रूयां रहिते जातु किंचि;दसूया हि त्वां प्रसहेत राजन् । आनयस्व पितरं संशितव्रतं; गांधारीं च महिषीमाजमीढ ॥
saṁjaya uvāca । na tvāṁ brūyāṁ rahite jātu kiṁ cid; asūyā hi tvāṁ prasaheta rājan । ānayasva pitaraṁ saṁśitavrataṁ; gāṁdhārīṁ ca mahiṣīm ājamīḍha ॥
तौ तेऽसूयां विनयेतां नरेन्द्र; धर्मज्ञौ तौ निपुणौ निश्चयज्ञौ । तयोस्तु त्वां संनिधौ तद्वदेयं; कृत्स्नं मतं वासुदेवार्जुनाभ्याम् ॥
tau te ’sūyāṁ vinayetāṁ narendra; dharmajñau tau nipuṇau niścayajñau । tayos tu tvāṁ saṁnidhau tad vadeyaṁ; kr̥tsnaṁ mataṁ vāsudevārjunābhyām ॥
वैशंपायन उवाच । ततस्तन्मतमाज्ञाय संजयस्यात्मजस्य च । अभ्युपेत्य महाप्राज्ञः कृष्णद्वैपायनोऽब्रवीत् ॥
vaiśaṁpāyana uvāca । tatas tan matam ājñāya saṁjayasyātmajasya ca । abhyupetya mahāprājñaḥ kr̥ṣṇadvaipāyano ’bravīt ॥
संपृच्छते धृतराष्ट्राय संजय; आचक्ष्व सर्वं यावदेषोऽनुयुङ्क्ते । सर्वं यावद्वेत्थ तस्मिन्यथाव;द्याथातथ्यं वासुदेवेऽर्जुने च ॥
saṁpr̥cchate dhr̥tarāṣṭrāya saṁjaya; ācakṣva sarvaṁ yāvad eṣo ’nuyuṅkte । sarvaṁ yāvad vettha tasmin yathāvad; yāthātathyaṁ vāsudeve ’rjune ca ॥