Who speaks here युधिष्ठिर yudhiṣṭhira · भीष्म bhīṣma
English for this adhyāya (section level, not verse by verse): Ganguli’s translation, approximately §62–64 Ganguli follows a different edition, so the match is approximate.
युधिष्ठिर उवाच । शिवान्सुखान्महोदर्कानहिंस्राँल्लोकसंमतान् । ब्रूहि धर्मान्सुखोपायान्मद्विधानां सुखावहान् ॥
yudhiṣṭhira uvāca । śivān sukhān mahodarkān ahiṁsrām̐l lokasaṁmatān । brūhi dharmān sukhopāyān madvidhānāṁ sukhāvahān ॥
भीष्म उवाच । ब्राह्मणस्येह चत्वार आश्रमा विहिताः प्रभो । वर्णास्ताननुवर्तन्ते त्रयो भरतसत्तम ॥
bhīṣma uvāca । brāhmaṇasyeha catvāra āśramā vihitāḥ prabho । varṇās tān anuvartante trayo bharatasattama ॥
उक्तानि कर्माणि बहूनि राज;न्स्वर्ग्याणि राजन्यपरायणानि । नेमानि दृष्टान्तविधौ स्मृतानि; क्षात्रे हि सर्वं विहितं यथावत् ॥
uktāni karmāṇi bahūni rājan; svargyāṇi rājanyaparāyaṇāni । nemāni dr̥ṣṭāntavidhau smr̥tāni; kṣātre hi sarvaṁ vihitaṁ yathāvat ॥
क्षात्राणि वैश्यानि च सेवमानः; शौद्राणि कर्माणि च ब्राह्मणः सन् । अस्मिँल्लोके निन्दितो मन्दचेताः; परे च लोके निरयं प्रयाति ॥
kṣātrāṇi vaiśyāni ca sevamānaḥ; śaudrāṇi karmāṇi ca brāhmaṇaḥ san । asmim̐l loke nindito mandacetāḥ; pare ca loke nirayaṁ prayāti ॥
या संज्ञा विहिता लोके दासे शुनि वृके पशौ । विकर्मणि स्थिते विप्रे तां संज्ञां कुरु पाण्डव ॥
yā saṁjñā vihitā loke dāse śuni vr̥ke paśau । vikarmaṇi sthite vipre tāṁ saṁjñāṁ kuru pāṇḍava ॥
षट्कर्मसंप्रवृत्तस्य आश्रमेषु चतुर्ष्वपि । सर्वधर्मोपपन्नस्य संभूतस्य कृतात्मनः ॥
ṣaṭkarmasaṁpravr̥ttasya āśrameṣu caturṣv api । sarvadharmopapannasya saṁbhūtasya kr̥tātmanaḥ ॥
ब्राह्मणस्य विशुद्धस्य तपस्यभिरतस्य च । निराशिषो वदान्यस्य लोका ह्यक्षरसंज्ञिताः ॥
brāhmaṇasya viśuddhasya tapasy abhiratasya ca । nirāśiṣo vadānyasya lokā hy akṣarasaṁjñitāḥ ॥
यो यस्मिन्कुरुते कर्म यादृशं येन यत्र च । तादृशं तादृशेनैव स गुणं प्रतिपद्यते ॥
yo yasmin kurute karma yādr̥śaṁ yena yatra ca । tādr̥śaṁ tādr̥śenaiva sa guṇaṁ pratipadyate ॥
वृद्ध्या कृषिवणिक्त्वेन जीवसंजीवनेन च । वेत्तुमर्हसि राजेन्द्र स्वाध्यायगणितं महत् ॥
vr̥ddhyā kr̥ṣivaṇiktvena jīvasaṁjīvanena ca । vettum arhasi rājendra svādhyāyagaṇitaṁ mahat ॥
कालसंचोदितः कालः कालपर्यायनिश्चितः । उत्तमाधममध्यानि कर्माणि कुरुतेऽवशः ॥
kālasaṁcoditaḥ kālaḥ kālaparyāyaniścitaḥ । uttamādhamamadhyāni karmāṇi kurute ’vaśaḥ ॥
अन्तवन्ति प्रदानानि पुरा श्रेयस्कराणि च । स्वकर्मनिरतो लोको ह्यक्षरः सर्वतोमुखः ॥
antavanti pradānāni purā śreyaskarāṇi ca । svakarmanirato loko hy akṣaraḥ sarvatomukhaḥ ॥