Who speaks here वैशंपायन vaiśaṃpāyana
English for this adhyāya (section level, not verse by verse): Ganguli’s translation, approximately §69–71 Ganguli follows a different edition, so the match is approximate.
वैशंपायन उवाच । ब्रह्मास्त्रं तु यदा राजन्कृष्णेन प्रतिसंहृतम् । तदा तद्वेश्म ते पित्रा तेजसाभिविदीपितम् ॥
vaiśaṁpāyana uvāca । brahmāstraṁ tu yadā rājan kr̥ṣṇena pratisaṁhr̥tam । tadā tad veśma te pitrā tejasābhividīpitam ॥
ततो रक्षांसि सर्वाणि नेशुस्त्यक्त्वा गृहं तु तत् । अन्तरिक्षे च वागासीत्साधु केशव साध्विति ॥
tato rakṣāṁsi sarvāṇi neśus tyaktvā gr̥haṁ tu tat । antarikṣe ca vāg āsīt sādhu keśava sādhv iti ॥
तदस्त्रं ज्वलितं चापि पितामहमगात्तदा । ततः प्राणान्पुनर्लेभे पिता तव जनेश्वर । व्यचेष्टत च बालोऽसौ यथोत्साहं यथाबलम् ॥
tad astraṁ jvalitaṁ cāpi pitāmaham agāt tadā । tataḥ prāṇān punar lebhe pitā tava janeśvara । vyaceṣṭata ca bālo ’sau yathotsāhaṁ yathābalam ॥
बभूवुर्मुदिता राजंस्ततस्ता भरतस्त्रियः । ब्राह्मणान्वाचयामासुर्गोविन्दस्य च शासनात् ॥
babhūvur muditā rājaṁs tatas tā bharatastriyaḥ । brāhmaṇān vācayām āsur govindasya ca śāsanāt ॥
ततस्ता मुदिताः सर्वाः प्रशशंसुर्जनार्दनम् । स्त्रियो भरतसिंहानां नावं लब्ध्वेव पारगाः ॥
tatas tā muditāḥ sarvāḥ praśaśaṁsur janārdanam । striyo bharatasiṁhānāṁ nāvaṁ labdhveva pāragāḥ ॥
कुन्ती द्रुपदपुत्री च सुभद्रा चोत्तरा तथा । स्त्रियश्चान्या नृसिंहानां बभूवुर्हृष्टमानसाः ॥
kuntī drupadaputrī ca subhadrā cottarā tathā । striyaś cānyā nr̥siṁhānāṁ babhūvur hr̥ṣṭamānasāḥ ॥
तत्र मल्ला नटा झल्ला ग्रन्थिकाः सौखशायिकाः । सूतमागधसंघाश्चाप्यस्तुवन्वै जनार्दनम् । कुरुवंशस्तवाख्याभिराशीर्भिर्भरतर्षभ ॥
tatra mallā naṭā jhallā granthikāḥ saukhaśāyikāḥ । sūtamāgadhasaṁghāś cāpy astuvan vai janārdanam । kuruvaṁśastavākhyābhir āśīrbhir bharatarṣabha ॥
उत्थाय तु यथाकालमुत्तरा यदुनन्दनम् । अभ्यवादयत प्रीता सह पुत्रेण भारत । ततस्तस्यै ददौ प्रीतो बहुरत्नं विशेषतः ॥
utthāya tu yathākālam uttarā yadunandanam । abhyavādayata prītā saha putreṇa bhārata । tatas tasyai dadau prīto bahuratnaṁ viśeṣataḥ ॥
तथान्ये वृष्णिशार्दूला नाम चास्याकरोत्प्रभुः । पितुस्तव महाराज सत्यसंधो जनार्दनः ॥
tathānye vr̥ṣṇiśārdūlā nāma cāsyākarot prabhuḥ । pitus tava mahārāja satyasaṁdho janārdanaḥ ॥
परिक्षीणे कुले यस्माज्जातोऽयमभिमन्युजः । परिक्षिदिति नामास्य भवत्वित्यब्रवीत्तदा ॥
parikṣīṇe kule yasmāj jāto ’yam abhimanyujaḥ । parikṣid iti nāmāsya bhavatv ity abravīt tadā ॥
सोऽवर्धत यथाकालं पिता तव नराधिप । मनःप्रह्लादनश्चासीत्सर्वलोकस्य भारत ॥
so ’vardhata yathākālaṁ pitā tava narādhipa । manaḥprahlādanaś cāsīt sarvalokasya bhārata ॥
मासजातस्तु ते वीर पिता भवति भारत । अथाजग्मुः सुबहुलं रत्नमादाय पाण्डवाः ॥
māsajātas tu te vīra pitā bhavati bhārata । athājagmuḥ subahulaṁ ratnam ādāya pāṇḍavāḥ ॥
तान्समीपगताञ्श्रुत्वा निर्ययुर्वृष्णिपुंगवाः । अलंचक्रुश्च माल्यौघैः पुरुषा नागसाह्वयम् ॥
tān samīpagatāñ śrutvā niryayur vr̥ṣṇipuṁgavāḥ । alaṁcakruś ca mālyaughaiḥ puruṣā nāgasāhvayam ॥
पताकाभिर्विचित्राभिर्ध्वजैश्च विविधैरपि । वेश्मानि समलंचक्रुः पौराश्चापि जनाधिप ॥
patākābhir vicitrābhir dhvajaiś ca vividhair api । veśmāni samalaṁcakruḥ paurāś cāpi janādhipa ॥
देवतायतनानां च पूजा बहुविधास्तथा । संदिदेशाथ विदुरः पाण्डुपुत्रप्रियेप्सया ॥
devatāyatanānāṁ ca pūjā bahuvidhās tathā । saṁdideśātha viduraḥ pāṇḍuputrapriyepsayā ॥
राजमार्गाश्च तत्रासन्सुमनोभिरलंकृताः । शुशुभे तत्पुरं चापि समुद्रौघनिभस्वनम् ॥
rājamārgāś ca tatrāsan sumanobhir alaṁkr̥tāḥ । śuśubhe tat puraṁ cāpi samudraughanibhasvanam ॥
नर्तकैश्चापि नृत्यद्भिर्गायनानां च निस्वनैः । आसीद्वैश्रवणस्येव निवासस्तत्पुरं तदा ॥
nartakaiś cāpi nr̥tyadbhir gāyanānāṁ ca nisvanaiḥ । āsīd vaiśravaṇasyeva nivāsas tat puraṁ tadā ॥
बन्दिभिश्च नरै राजन्स्त्रीसहायैः सहस्रशः । तत्र तत्र विविक्तेषु समन्तादुपशोभितम् ॥
bandibhiś ca narai rājan strīsahāyaiḥ sahasraśaḥ । tatra tatra vivikteṣu samantād upaśobhitam ॥
पताका धूयमानाश्च श्वसता मातरिश्वना । अदर्शयन्निव तदा कुरून्वै दक्षिणोत्तरान् ॥
patākā dhūyamānāś ca śvasatā mātariśvanā । adarśayann iva tadā kurūn vai dakṣiṇottarān ॥
अघोषयत्तदा चापि पुरुषो राजधूर्गतः । सर्वरात्रिविहारोऽद्य रत्नाभरणलक्षणः ॥
aghoṣayat tadā cāpi puruṣo rājadhūrgataḥ । sarvarātrivihāro ’dya ratnābharaṇalakṣaṇaḥ ॥