Who speaks here ब्राह्मण brāhmaṇa
English for this adhyāya (section level, not verse by verse): Ganguli’s translation, approximately §25–27 Ganguli follows a different edition, so the match is approximate.
ब्राह्मण उवाच । एकः शास्ता न द्वितीयोऽस्ति शास्ता; यथा नियुक्तोऽस्मि तथा चरामि । हृद्येष तिष्ठन्पुरुषः शास्ति शास्ता; तेनैव युक्तः प्रवणादिवोदकम् ॥
brāhmaṇa uvāca । ekaḥ śāstā na dvitīyo ’sti śāstā; yathā niyukto ’smi tathā carāmi । hr̥dy eṣa tiṣṭhan puruṣaḥ śāsti śāstā; tenaiva yuktaḥ pravaṇād ivodakam ॥
एको गुरुर्नास्ति ततो द्वितीयो; यो हृच्छयस्तमहमनुब्रवीमि । तेनानुशिष्टा गुरुणा सदैव; पराभूता दानवाः सर्व एव ॥
eko gurur nāsti tato dvitīyo; yo hr̥cchayas tam aham anubravīmi । tenānuśiṣṭā guruṇā sadaiva; parābhūtā dānavāḥ sarva eva ॥
एको बन्धुर्नास्ति ततो द्वितीयो; यो हृच्छयस्तमहमनुब्रवीमि । तेनानुशिष्टा बान्धवा बन्धुमन्तः; सप्तर्षयः सप्त दिवि प्रभान्ति ॥
eko bandhur nāsti tato dvitīyo; yo hr̥cchayas tam aham anubravīmi । tenānuśiṣṭā bāndhavā bandhumantaḥ; saptarṣayaḥ sapta divi prabhānti ॥
एकः श्रोता नास्ति ततो द्वितीयो; यो हृच्छयस्तमहमनुब्रवीमि । तस्मिन्गुरौ गुरुवासं निरुष्य; शक्रो गतः सर्वलोकामरत्वम् ॥
ekaḥ śrotā nāsti tato dvitīyo; yo hr̥cchayas tam aham anubravīmi । tasmin gurau guruvāsaṁ niruṣya; śakro gataḥ sarvalokāmaratvam ॥
एको द्वेष्टा नास्ति ततो द्वितीयो; यो हृच्छयस्तमहमनुब्रवीमि । तेनानुशिष्टा गुरुणा सदैव; लोकद्विष्टाः पन्नगाः सर्व एव ॥
eko dveṣṭā nāsti tato dvitīyo; yo hr̥cchayas tam aham anubravīmi । tenānuśiṣṭā guruṇā sadaiva; lokadviṣṭāḥ pannagāḥ sarva eva ॥
अत्राप्युदाहरन्तीममितिहासं पुरातनम् । प्रजापतौ पन्नगानां देवर्षीणां च संविदम् ॥
atrāpy udāharantīmam itihāsaṁ purātanam । prajāpatau pannagānāṁ devarṣīṇāṁ ca saṁvidam ॥
देवर्षयश्च नागाश्च असुराश्च प्रजापतिम् । पर्यपृच्छन्नुपासीनाः श्रेयो नः प्रोच्यतामिति ॥
devarṣayaś ca nāgāś ca asurāś ca prajāpatim । paryapr̥cchann upāsīnāḥ śreyo naḥ procyatām iti ॥
तेषां प्रोवाच भगवाञ्श्रेयः समनुपृच्छताम् । ओमित्येकाक्षरं ब्रह्म ते श्रुत्वा प्राद्रवन्दिशः ॥
teṣāṁ provāca bhagavāñ śreyaḥ samanupr̥cchatām । om ity ekākṣaraṁ brahma te śrutvā prādravan diśaḥ ॥
तेषां प्राद्रवमाणानामुपदेशार्थमात्मनः । सर्पाणां दशने भावः प्रवृत्तः पूर्वमेव तु ॥
teṣāṁ prādravamāṇānām upadeśārtham ātmanaḥ । sarpāṇāṁ daśane bhāvaḥ pravr̥ttaḥ pūrvam eva tu ॥
असुराणां प्रवृत्तस्तु दम्भभावः स्वभावजः । दानं देवा व्यवसिता दममेव महर्षयः ॥
asurāṇāṁ pravr̥ttas tu dambhabhāvaḥ svabhāvajaḥ । dānaṁ devā vyavasitā damam eva maharṣayaḥ ॥
एकं शास्तारमासाद्य शब्देनैकेन संस्कृताः । नाना व्यवसिताः सर्वे सर्पदेवर्षिदानवाः ॥
ekaṁ śāstāram āsādya śabdenaikena saṁskr̥tāḥ । nānā vyavasitāḥ sarve sarpadevarṣidānavāḥ ॥
शृणोत्ययं प्रोच्यमानं गृह्णाति च यथातथम् । पृच्छतस्तावतो भूयो गुरुरन्योऽनुमन्यते ॥
śr̥ṇoty ayaṁ procyamānaṁ gr̥hṇāti ca yathātatham । pr̥cchatas tāvato bhūyo gurur anyo ’numanyate ॥
तस्य चानुमते कर्म ततः पश्चात्प्रवर्तते । गुरुर्बोद्धा च शत्रुश्च द्वेष्टा च हृदि संश्रितः ॥
tasya cānumate karma tataḥ paścāt pravartate । gurur boddhā ca śatruś ca dveṣṭā ca hr̥di saṁśritaḥ ॥
पापेन विचरँल्लोके पापचारी भवत्ययम् । शुभेन विचरँल्लोके शुभचारी भवत्युत ॥
pāpena vicaram̐l loke pāpacārī bhavaty ayam । śubhena vicaram̐l loke śubhacārī bhavaty uta ॥
कामचारी तु कामेन य इन्द्रियसुखे रतः । व्रतचारी सदैवैष य इन्द्रियजये रतः ॥
kāmacārī tu kāmena ya indriyasukhe rataḥ । vratacārī sadaivaiṣa ya indriyajaye rataḥ ॥
अपेतव्रतकर्मा तु केवलं ब्रह्मणि श्रितः । ब्रह्मभूतश्चरँल्लोके ब्रह्मचारी भवत्ययम् ॥
apetavratakarmā tu kevalaṁ brahmaṇi śritaḥ । brahmabhūtaś caram̐l loke brahmacārī bhavaty ayam ॥
ब्रह्मैव समिधस्तस्य ब्रह्माग्निर्ब्रह्मसंस्तरः । आपो ब्रह्म गुरुर्ब्रह्म स ब्रह्मणि समाहितः ॥
brahmaiva samidhas tasya brahmāgnir brahmasaṁstaraḥ । āpo brahma gurur brahma sa brahmaṇi samāhitaḥ ॥
एतदेतादृशं सूक्ष्मं ब्रह्मचर्यं विदुर्बुधाः । विदित्वा चान्वपद्यन्त क्षेत्रज्ञेनानुदर्शिनः ॥
etad etādr̥śaṁ sūkṣmaṁ brahmacaryaṁ vidur budhāḥ । viditvā cānvapadyanta kṣetrajñenānudarśinaḥ ॥