95.1MBH-1-95-1
वैशंपायन उवाच । ततो विवाहे निर्वृत्ते स राजा शंतनुर्नृपः । तां कन्यां रूपसंपन्नां स्वगृहे संन्यवेशयत् ॥
vaiśaṁpāyana uvāca । tato vivāhe nirvr̥tte sa rājā śaṁtanur nr̥paḥ । tāṁ kanyāṁ rūpasaṁpannāṁ svagr̥he saṁnyaveśayat ॥
Ādi Parva · Adhyaya 1.95
Adhyāya 95
अध्यायः 95
Who speaks here वैशंपायन vaiśaṃpāyana
English for this adhyāya (section level, not verse by verse): Ganguli’s translation, approximately §100–102 Ganguli follows a different edition, so the match is approximate.
In this chapterSanskrit allTransliteration allHindi unavailableEnglish unavailableUnavailable translations are marked, never invented.
95.2MBH-1-95-2
ततः शांतनवो धीमान्सत्यवत्यामजायत । वीरश्चित्राङ्गदो नाम वीर्येण मनुजानति ॥
tataḥ śāṁtanavo dhīmān satyavatyām ajāyata । vīraś citrāṅgado nāma vīryeṇa manujān ati ॥
95.3MBH-1-95-3
अथापरं महेष्वासं सत्यवत्यां पुनः प्रभुः । विचित्रवीर्यं राजानं जनयामास वीर्यवान् ॥
athāparaṁ maheṣvāsaṁ satyavatyāṁ punaḥ prabhuḥ । vicitravīryaṁ rājānaṁ janayām āsa vīryavān ॥
95.4MBH-1-95-4
अप्राप्तवति तस्मिंश्च यौवनं भरतर्षभ । स राजा शंतनुर्धीमान्कालधर्ममुपेयिवान् ॥
aprāptavati tasmiṁś ca yauvanaṁ bharatarṣabha । sa rājā śaṁtanur dhīmān kāladharmam upeyivān ॥
95.5MBH-1-95-5
स्वर्गते शंतनौ भीष्मश्चित्राङ्गदमरिंदमम् । स्थापयामास वै राज्ये सत्यवत्या मते स्थितः ॥
svargate śaṁtanau bhīṣmaś citrāṅgadam ariṁdamam । sthāpayām āsa vai rājye satyavatyā mate sthitaḥ ॥
95.6MBH-1-95-6
स तु चित्राङ्गदः शौर्यात्सर्वांश्चिक्षेप पार्थिवान् । मनुष्यं न हि मेने स कंचित्सदृशमात्मनः ॥
sa tu citrāṅgadaḥ śauryāt sarvāṁś cikṣepa pārthivān । manuṣyaṁ na hi mene sa kaṁ cit sadr̥śam ātmanaḥ ॥
95.7MBH-1-95-7
तं क्षिपन्तं सुरांश्चैव मनुष्यानसुरांस्तथा । गन्धर्वराजो बलवांस्तुल्यनामाभ्ययात्तदा । तेनास्य सुमहद्युद्धं कुरुक्षेत्रे बभूव ह ॥
taṁ kṣipantaṁ surāṁś caiva manuṣyān asurāṁs tathā । gandharvarājo balavāṁs tulyanāmābhyayāt tadā । tenāsya sumahad yuddhaṁ kurukṣetre babhūva ha ॥
95.8MBH-1-95-8
तयोर्बलवतोस्तत्र गन्धर्वकुरुमुख्ययोः । नद्यास्तीरे हिरण्वत्याः समास्तिस्रोऽभवद्रणः ॥
tayor balavatos tatra gandharvakurumukhyayoḥ । nadyās tīre hiraṇvatyāḥ samās tisro ’bhavad raṇaḥ ॥
95.9MBH-1-95-9
तस्मिन्विमर्दे तुमुले शस्त्रवृष्टिसमाकुले । मायाधिकोऽवधीद्वीरं गन्धर्वः कुरुसत्तमम् ॥
tasmin vimarde tumule śastravr̥ṣṭisamākule । māyādhiko ’vadhīd vīraṁ gandharvaḥ kurusattamam ॥
95.10MBH-1-95-10
चित्राङ्गदं कुरुश्रेष्ठं विचित्रशरकार्मुकम् । अन्ताय कृत्वा गन्धर्वो दिवमाचक्रमे ततः ॥
citrāṅgadaṁ kuruśreṣṭhaṁ vicitraśarakārmukam । antāya kr̥tvā gandharvo divam ācakrame tataḥ ॥
95.11MBH-1-95-11
तस्मिन्नृपतिशार्दूले निहते भूरिवर्चसि । भीष्मः शांतनवो राजन्प्रेतकार्याण्यकारयत् ॥
tasmin nr̥patiśārdūle nihate bhūrivarcasi । bhīṣmaḥ śāṁtanavo rājan pretakāryāṇy akārayat ॥
95.12MBH-1-95-12
विचित्रवीर्यं च तदा बालमप्राप्तयौवनम् । कुरुराज्ये महाबाहुरभ्यषिञ्चदनन्तरम् ॥
vicitravīryaṁ ca tadā bālam aprāptayauvanam । kururājye mahābāhur abhyaṣiñcad anantaram ॥
95.13MBH-1-95-13
विचित्रवीर्यस्तु तदा भीष्मस्य वचने स्थितः । अन्वशासन्महाराज पितृपैतामहं पदम् ॥
vicitravīryas tu tadā bhīṣmasya vacane sthitaḥ । anvaśāsan mahārāja pitr̥paitāmahaṁ padam ॥
95.14MBH-1-95-14
स धर्मशास्त्रकुशलो भीष्मं शांतनवं नृपः । पूजयामास धर्मेण स चैनं प्रत्यपालयत् ॥
sa dharmaśāstrakuśalo bhīṣmaṁ śāṁtanavaṁ nr̥paḥ । pūjayām āsa dharmeṇa sa cainaṁ pratyapālayat ॥