174.1MBH-1-174-1
अर्जुन उवाच । अस्माकमनुरूपो वै यः स्याद्गन्धर्व वेदवित् । पुरोहितस्तमाचक्ष्व सर्वं हि विदितं तव ॥
arjuna uvāca । asmākam anurūpo vai yaḥ syād gandharva vedavit । purohitas tam ācakṣva sarvaṁ hi viditaṁ tava ॥
Ādi Parva · Adhyaya 1.174
Adhyāya 174
अध्यायः 174
Who speaks here अर्जुन arjuna · गन्धर्व gandharva · वैशंपायन vaiśaṃpāyana
English for this adhyāya (section level, not verse by verse): Ganguli’s translation, approximately §184–186 Ganguli follows a different edition, so the match is approximate.
In this chapterSanskrit allTransliteration allHindi unavailableEnglish unavailableUnavailable translations are marked, never invented.
174.2MBH-1-174-2
गन्धर्व उवाच । यवीयान्देवलस्यैष वने भ्राता तपस्यति । धौम्य उत्कोचके तीर्थे तं वृणुध्वं यदीच्छथ ॥
gandharva uvāca । yavīyān devalasyaiṣa vane bhrātā tapasyati । dhaumya utkocake tīrthe taṁ vr̥ṇudhvaṁ yadīcchatha ॥
174.3MBH-1-174-3
वैशंपायन उवाच । ततोऽर्जुनोऽस्त्रमाग्नेयं प्रददौ तद्यथाविधि । गन्धर्वाय तदा प्रीतो वचनं चेदमब्रवीत् ॥
vaiśaṁpāyana uvāca । tato ’rjuno ’stram āgneyaṁ pradadau tad yathāvidhi । gandharvāya tadā prīto vacanaṁ cedam abravīt ॥
174.4MBH-1-174-4
त्वय्येव तावत्तिष्ठन्तु हया गन्धर्वसत्तम । कर्मकाले ग्रहीष्यामि स्वस्ति तेऽस्त्विति चाब्रवीत् ॥
tvayy eva tāvat tiṣṭhantu hayā gandharvasattama । karmakāle grahīṣyāmi svasti te ’stv iti cābravīt ॥
174.5MBH-1-174-5
तेऽन्योन्यमभिसंपूज्य गन्धर्वः पाण्डवाश्च ह । रम्याद्भागीरथीकच्छाद्यथाकामं प्रतस्थिरे ॥
te ’nyonyam abhisaṁpūjya gandharvaḥ pāṇḍavāś ca ha । ramyād bhāgīrathīkacchād yathākāmaṁ pratasthire ॥
174.6MBH-1-174-6
तत उत्कोचकं तीर्थं गत्वा धौम्याश्रमं तु ते । तं वव्रुः पाण्डवा धौम्यं पौरोहित्याय भारत ॥
tata utkocakaṁ tīrthaṁ gatvā dhaumyāśramaṁ tu te । taṁ vavruḥ pāṇḍavā dhaumyaṁ paurohityāya bhārata ॥
174.7MBH-1-174-7
तान्धौम्यः प्रतिजग्राह सर्ववेदविदां वरः । पाद्येन फलमूलेन पौरोहित्येन चैव ह ॥
tān dhaumyaḥ pratijagrāha sarvavedavidāṁ varaḥ । pādyena phalamūlena paurohityena caiva ha ॥
174.8MBH-1-174-8
ते तदाशंसिरे लब्धां श्रियं राज्यं च पाण्डवाः । तं ब्राह्मणं पुरस्कृत्य पाञ्चाल्याश्च स्वयंवरम् ॥
te tadāśaṁsire labdhāṁ śriyaṁ rājyaṁ ca pāṇḍavāḥ । taṁ brāhmaṇaṁ puraskr̥tya pāñcālyāś ca svayaṁvaram ॥
174.9MBH-1-174-9
मातृषष्ठास्तु ते तेन गुरुणा संगतास्तदा । नाथवन्तमिवात्मानं मेनिरे भरतर्षभाः ॥
mātr̥ṣaṣṭhās tu te tena guruṇā saṁgatās tadā । nāthavantam ivātmānaṁ menire bharatarṣabhāḥ ॥
174.10MBH-1-174-10
स हि वेदार्थतत्त्वज्ञस्तेषां गुरुरुदारधीः । तेन धर्मविदा पार्था याज्याः सर्वविदा कृताः ॥
sa hi vedārthatattvajñas teṣāṁ gurur udāradhīḥ । tena dharmavidā pārthā yājyāḥ sarvavidā kr̥tāḥ ॥
174.11MBH-1-174-11
वीरांस्तु स हि तान्मेने प्राप्तराज्यान्स्वधर्मतः । बुद्धिवीर्यबलोत्साहैर्युक्तान्देवानिवापरान् ॥
vīrāṁs tu sa hi tān mene prāptarājyān svadharmataḥ । buddhivīryabalotsāhair yuktān devān ivāparān ॥
174.12MBH-1-174-12
कृतस्वस्त्ययनास्तेन ततस्ते मनुजाधिपाः । मेनिरे सहिता गन्तुं पाञ्चाल्यास्तं स्वयंवरम् ॥
kr̥tasvastyayanās tena tatas te manujādhipāḥ । menire sahitā gantuṁ pāñcālyās taṁ svayaṁvaram ॥