Who speaks here युधिष्ठिर yudhiṣṭhira · वैशंपायन vaiśaṃpāyana · ब्राह्मणा brāhmaṇā
English for this adhyāya (section level, not verse by verse): Ganguli’s translation, approximately §185–187 Ganguli follows a different edition, so the match is approximate.
वैशंपायन उवाच । ततस्ते नरशार्दूला भ्रातरः पञ्च पाण्डवाः । प्रययुर्द्रौपदीं द्रष्टुं तं च देवमहोत्सवम् ॥
vaiśaṁpāyana uvāca । tatas te naraśārdūlā bhrātaraḥ pañca pāṇḍavāḥ । prayayur draupadīṁ draṣṭuṁ taṁ ca devamahotsavam ॥
ते प्रयाता नरव्याघ्रा मात्रा सह परंतपाः । ब्राह्मणान्ददृशुर्मार्गे गच्छतः सगणान्बहून् ॥
te prayātā naravyāghrā mātrā saha paraṁtapāḥ । brāhmaṇān dadr̥śur mārge gacchataḥ sagaṇān bahūn ॥
तानूचुर्ब्राह्मणा राजन्पाण्डवान्ब्रह्मचारिणः । क्व भवन्तो गमिष्यन्ति कुतो वागच्छतेति ह ॥
tān ūcur brāhmaṇā rājan pāṇḍavān brahmacāriṇaḥ । kva bhavanto gamiṣyanti kuto vāgacchateti ha ॥
युधिष्ठिर उवाच । आगतानेकचक्रायाः सोदर्यान्देवदर्शिनः । भवन्तो हि विजानन्तु सहितान्मातृचारिणः ॥
yudhiṣṭhira uvāca । āgatān ekacakrāyāḥ sodaryān devadarśinaḥ । bhavanto hi vijānantu sahitān mātr̥cāriṇaḥ ॥
ब्राह्मणा ऊचुः । गच्छताद्यैव पाञ्चालान्द्रुपदस्य निवेशनम् । स्वयंवरो महांस्तत्र भविता सुमहाधनः ॥
brāhmaṇā ūcuḥ । gacchatādyaiva pāñcālān drupadasya niveśanam । svayaṁvaro mahāṁs tatra bhavitā sumahādhanaḥ ॥
एकसार्थं प्रयाताः स्मो वयमप्यत्र गामिनः । तत्र ह्यद्भुतसंकाशो भविता सुमहोत्सवः ॥
ekasārthaṁ prayātāḥ smo vayam apy atra gāminaḥ । tatra hy adbhutasaṁkāśo bhavitā sumahotsavaḥ ॥
यज्ञसेनस्य दुहिता द्रुपदस्य महात्मनः । वेदीमध्यात्समुत्पन्ना पद्मपत्रनिभेक्षणा ॥
yajñasenasya duhitā drupadasya mahātmanaḥ । vedīmadhyāt samutpannā padmapatranibhekṣaṇā ॥
दर्शनीयानवद्याङ्गी सुकुमारी मनस्विनी । धृष्टद्युम्नस्य भगिनी द्रोणशत्रोः प्रतापिनः ॥
darśanīyānavadyāṅgī sukumārī manasvinī । dhr̥ṣṭadyumnasya bhaginī droṇaśatroḥ pratāpinaḥ ॥
यो जातः कवची खड्गी सशरः सशरासनः । सुसमिद्धे महाबाहुः पावके पावकप्रभः ॥
yo jātaḥ kavacī khaḍgī saśaraḥ saśarāsanaḥ । susamiddhe mahābāhuḥ pāvake pāvakaprabhaḥ ॥
स्वसा तस्यानवद्याङ्गी द्रौपदी तनुमध्यमा । नीलोत्पलसमो गन्धो यस्याः क्रोशात्प्रवायति ॥
svasā tasyānavadyāṅgī draupadī tanumadhyamā । nīlotpalasamo gandho yasyāḥ krośāt pravāyati ॥
तां यज्ञसेनस्य सुतां स्वयंवरकृतक्षणाम् । गच्छामहे वयं द्रष्टुं तं च देवमहोत्सवम् ॥
tāṁ yajñasenasya sutāṁ svayaṁvarakr̥takṣaṇām । gacchāmahe vayaṁ draṣṭuṁ taṁ ca devamahotsavam ॥
राजानो राजपुत्राश्च यज्वानो भूरिदक्षिणाः । स्वाध्यायवन्तः शुचयो महात्मानो यतव्रताः ॥
rājāno rājaputrāś ca yajvāno bhūridakṣiṇāḥ । svādhyāyavantaḥ śucayo mahātmāno yatavratāḥ ॥
तरुणा दर्शनीयाश्च नानादेशसमागताः । महारथाः कृतास्त्राश्च समुपैष्यन्ति भूमिपाः ॥
taruṇā darśanīyāś ca nānādeśasamāgatāḥ । mahārathāḥ kr̥tāstrāś ca samupaiṣyanti bhūmipāḥ ॥
ते तत्र विविधान्दायान्विजयार्थं नरेश्वराः । प्रदास्यन्ति धनं गाश्च भक्ष्यं भोज्यं च सर्वशः ॥
te tatra vividhān dāyān vijayārthaṁ nareśvarāḥ । pradāsyanti dhanaṁ gāś ca bhakṣyaṁ bhojyaṁ ca sarvaśaḥ ॥
प्रतिगृह्य च तत्सर्वं दृष्ट्वा चैव स्वयंवरम् । अनुभूयोत्सवं चैव गमिष्यामो यथेप्सितम् ॥
pratigr̥hya ca tat sarvaṁ dr̥ṣṭvā caiva svayaṁvaram । anubhūyotsavaṁ caiva gamiṣyāmo yathepsitam ॥
नटा वैतालिकाश्चैव नर्तकाः सूतमागधाः । नियोधकाश्च देशेभ्यः समेष्यन्ति महाबलाः ॥
naṭā vaitālikāś caiva nartakāḥ sūtamāgadhāḥ । niyodhakāś ca deśebhyaḥ sameṣyanti mahābalāḥ ॥
एवं कौतूहलं कृत्वा दृष्ट्वा च प्रतिगृह्य च । सहास्माभिर्महात्मानः पुनः प्रतिनिवर्त्स्यथ ॥
evaṁ kautūhalaṁ kr̥tvā dr̥ṣṭvā ca pratigr̥hya ca । sahāsmābhir mahātmānaḥ punaḥ pratinivartsyatha ॥
दर्शनीयांश्च वः सर्वान्देवरूपानवस्थितान् । समीक्ष्य कृष्णा वरयेत्संगत्यान्यतमं वरम् ॥
darśanīyāṁś ca vaḥ sarvān devarūpān avasthitān । samīkṣya kr̥ṣṇā varayet saṁgatyānyatamaṁ varam ॥
अयं भ्राता तव श्रीमान्दर्शनीयो महाभुजः । नियुध्यमानो विजयेत्संगत्या द्रविणं बहु ॥
ayaṁ bhrātā tava śrīmān darśanīyo mahābhujaḥ । niyudhyamāno vijayet saṁgatyā draviṇaṁ bahu ॥
युधिष्ठिर उवाच । परमं भो गमिष्यामो द्रष्टुं देवमहोत्सवम् । भवद्भिः सहिताः सर्वे कन्यायास्तं स्वयंवरम् ॥
yudhiṣṭhira uvāca । paramaṁ bho gamiṣyāmo draṣṭuṁ devamahotsavam । bhavadbhiḥ sahitāḥ sarve kanyāyās taṁ svayaṁvaram ॥