58.1MBH-4-58-1
वैशंपायन उवाच । अथ दुर्योधनः कर्णो दुःशासनविविंशती । द्रोणश्च सह पुत्रेण कृपश्चातिरथो रणे ॥
vaiśaṁpāyana uvāca । atha duryodhanaḥ karṇo duḥśāsanaviviṁśatī । droṇaś ca saha putreṇa kr̥paś cātiratho raṇe ॥
Virāṭa Parva · Adhyaya 4.58
Adhyāya 58
अध्यायः 58
Who speaks here वैशंपायन vaiśaṃpāyana
English for this adhyāya (section level, not verse by verse): Ganguli’s translation, approximately §61–63 Ganguli follows a different edition, so the match is approximate.
In this chapterSanskrit allTransliteration allHindi unavailableEnglish unavailableUnavailable translations are marked, never invented.
58.2MBH-4-58-2
पुनरीयुः सुसंरब्धा धनंजयजिघांसया । विस्फारयन्तश्चापानि बलवन्ति दृढानि च ॥
punar īyuḥ susaṁrabdhā dhanaṁjayajighāṁsayā । visphārayantaś cāpāni balavanti dr̥ḍhāni ca ॥
58.3MBH-4-58-3
तान्प्रकीर्णपताकेन रथेनादित्यवर्चसा । प्रत्युद्ययौ महाराज समस्तान्वानरध्वजः ॥
tān prakīrṇapatākena rathenādityavarcasā । pratyudyayau mahārāja samastān vānaradhvajaḥ ॥
58.4MBH-4-58-4
ततः कृपश्च कर्णश्च द्रोणश्च रथिनां वरः । तं महास्त्रैर्महावीर्यं परिवार्य धनंजयम् ॥
tataḥ kr̥paś ca karṇaś ca droṇaś ca rathināṁ varaḥ । taṁ mahāstrair mahāvīryaṁ parivārya dhanaṁjayam ॥
58.5MBH-4-58-5
शरौघान्सम्यगस्यन्तो जीमूता इव वार्षिकाः । ववर्षुः शरवर्षाणि प्रपतन्तं किरीटिनम् ॥
śaraughān samyag asyanto jīmūtā iva vārṣikāḥ । vavarṣuḥ śaravarṣāṇi prapatantaṁ kirīṭinam ॥
58.6MBH-4-58-6
इषुभिर्बहुभिस्तूर्णं समरे लोमवाहिभिः । अदूरात्पर्यवस्थाय पूरयामासुरादृताः ॥
iṣubhir bahubhis tūrṇaṁ samare lomavāhibhiḥ । adūrāt paryavasthāya pūrayām āsur ādr̥tāḥ ॥
58.7MBH-4-58-7
तथावकीर्णस्य हि तैर्दिव्यैरस्त्रैः समन्ततः । न तस्य द्व्यङ्गुलमपि विवृतं समदृश्यत ॥
tathāvakīrṇasya hi tair divyair astraiḥ samantataḥ । na tasya dvyaṅgulam api vivr̥taṁ samadr̥śyata ॥
58.8MBH-4-58-8
ततः प्रहस्य बीभत्सुर्दिव्यमैन्द्रं महारथः । अस्त्रमादित्यसंकाशं गाण्डीवे समयोजयत् ॥
tataḥ prahasya bībhatsur divyam aindraṁ mahārathaḥ । astram ādityasaṁkāśaṁ gāṇḍīve samayojayat ॥
58.9MBH-4-58-9
स रश्मिभिरिवादित्यः प्रतपन्समरे बली । किरीटमाली कौन्तेयः सर्वान्प्राच्छादयत्कुरून् ॥
sa raśmibhir ivādityaḥ pratapan samare balī । kirīṭamālī kaunteyaḥ sarvān prācchādayat kurūn ॥
58.10MBH-4-58-10
यथा बलाहके विद्युत्पावको वा शिलोच्चये । तथा गाण्डीवमभवदिन्द्रायुधमिवाततम् ॥
yathā balāhake vidyut pāvako vā śiloccaye । tathā gāṇḍīvam abhavad indrāyudham ivātatam ॥
58.11MBH-4-58-11
यथा वर्षति पर्जन्ये विद्युद्विभ्राजते दिवि । तथा दश दिशः सर्वाः पतद्गाण्डीवमावृणोत् ॥
yathā varṣati parjanye vidyud vibhrājate divi । tathā daśa diśaḥ sarvāḥ patad gāṇḍīvam āvr̥ṇot ॥
58.12MBH-4-58-12
त्रस्ताश्च रथिनः सर्वे बभूवुस्तत्र सर्वशः । सर्वे शान्तिपरा भूत्वा स्वचित्तानि न लेभिरे । संग्रामविमुखाः सर्वे योधास्ते हतचेतसः ॥
trastāś ca rathinaḥ sarve babhūvus tatra sarvaśaḥ । sarve śāntiparā bhūtvā svacittāni na lebhire । saṁgrāmavimukhāḥ sarve yodhās te hatacetasaḥ ॥
58.13MBH-4-58-13
एवं सर्वाणि सैन्यानि भग्नानि भरतर्षभ । प्राद्रवन्त दिशः सर्वा निराशानि स्वजीविते ॥
evaṁ sarvāṇi sainyāni bhagnāni bharatarṣabha । prādravanta diśaḥ sarvā nirāśāni svajīvite ॥