Adhyāya 26

वैशंपायन उवाच । अथाब्रवीन्महावीर्यो द्रोणस्तत्त्वार्थदर्शिवान् । न तादृशा विनश्यन्ति नापि यान्ति पराभवम् ॥

vaiśaṁpāyana uvāca । athābravīn mahāvīryo droṇas tattvārthadarśivān । na tādr̥śā vinaśyanti nāpi yānti parābhavam ॥

शूराश्च कृतविद्याश्च बुद्धिमन्तो जितेन्द्रियाः । धर्मज्ञाश्च कृतज्ञाश्च धर्मराजमनुव्रताः ॥

śūrāś ca kr̥tavidyāś ca buddhimanto jitendriyāḥ । dharmajñāś ca kr̥tajñāś ca dharmarājam anuvratāḥ ॥

नीतिधर्मार्थतत्त्वज्ञं पितृवच्च समाहितम् । धर्मे स्थितं सत्यधृतिं ज्येष्ठं ज्येष्ठापचायिनम् ॥

nītidharmārthatattvajñaṁ pitr̥vac ca samāhitam । dharme sthitaṁ satyadhr̥tiṁ jyeṣṭhaṁ jyeṣṭhāpacāyinam ॥

अनुव्रता महात्मानं भ्रातरं भ्रातरो नृप । अजातशत्रुं ह्रीमन्तं तं च भ्रातॄननुव्रतम् ॥

anuvratā mahātmānaṁ bhrātaraṁ bhrātaro nr̥pa । ajātaśatruṁ hrīmantaṁ taṁ ca bhrātr̥̄n anuvratam ॥

तेषां तथा विधेयानां निभृतानां महात्मनाम् । किमर्थं नीतिमान्पार्थः श्रेयो नैषां करिष्यति ॥

teṣāṁ tathā vidheyānāṁ nibhr̥tānāṁ mahātmanām । kimarthaṁ nītimān pārthaḥ śreyo naiṣāṁ kariṣyati ॥

तस्माद्यत्नात्प्रतीक्षन्ते कालस्योदयमागतम् । न हि ते नाशमृच्छेयुरिति पश्याम्यहं धिया ॥

tasmād yatnāt pratīkṣante kālasyodayam āgatam । na hi te nāśam r̥ccheyur iti paśyāmy ahaṁ dhiyā ॥

सांप्रतं चैव यत्कार्यं तच्च क्षिप्रमकालिकम् । क्रियतां साधु संचिन्त्य वासश्चैषां प्रचिन्त्यताम् ॥

sāṁprataṁ caiva yat kāryaṁ tac ca kṣipram akālikam । kriyatāṁ sādhu saṁcintya vāsaś caiṣāṁ pracintyatām ॥

यथावत्पाण्डुपुत्राणां सर्वार्थेषु धृतात्मनाम् । दुर्ज्ञेयाः खलु शूरास्ते अपापास्तपसा वृताः ॥

yathāvat pāṇḍuputrāṇāṁ sarvārtheṣu dhr̥tātmanām । durjñeyāḥ khalu śūrās te apāpās tapasā vr̥tāḥ ॥

शुद्धात्मा गुणवान्पार्थः सत्यवान्नीतिमाञ्शुचिः । तेजोराशिरसंख्येयो गृह्णीयादपि चक्षुषी ॥

śuddhātmā guṇavān pārthaḥ satyavān nītimāñ śuciḥ । tejorāśir asaṁkhyeyo gr̥hṇīyād api cakṣuṣī ॥

विज्ञाय क्रियतां तस्माद्भूयश्च मृगयामहे । ब्राह्मणैश्चारकैः सिद्धैर्ये चान्ये तद्विदो जनाः ॥

vijñāya kriyatāṁ tasmād bhūyaś ca mr̥gayāmahe । brāhmaṇaiś cārakaiḥ siddhair ye cānye tadvido janāḥ ॥