Adhyāya 34

वैशंपायन उवाच । याज्ञसेन्या वचः श्रुत्वा भीमसेनोऽत्यमर्षणः । निःश्वसन्नुपसंगम्य क्रुद्धो राजानमब्रवीत् ॥

vaiśaṁpāyana uvāca । yājñasenyā vacaḥ śrutvā bhīmaseno ’tyamarṣaṇaḥ । niḥśvasann upasaṁgamya kruddho rājānam abravīt ॥

राज्यस्य पदवीं धर्म्यां व्रज सत्पुरुषोचिताम् । धर्मकामार्थहीनानां किं नो वस्तुं तपोवने ॥

rājyasya padavīṁ dharmyāṁ vraja satpuruṣocitām । dharmakāmārthahīnānāṁ kiṁ no vastuṁ tapovane ॥

नैव धर्मेण तद्राज्यं नार्जवेन न चौजसा । अक्षकूटमधिष्ठाय हृतं दुर्योधनेन नः ॥

naiva dharmeṇa tad rājyaṁ nārjavena na caujasā । akṣakūṭam adhiṣṭhāya hr̥taṁ duryodhanena naḥ ॥

गोमायुनेव सिंहानां दुर्बलेन बलीयसाम् । आमिषं विघसाशेन तद्वद्राज्यं हि नो हृतम् ॥

gomāyuneva siṁhānāṁ durbalena balīyasām । āmiṣaṁ vighasāśena tadvad rājyaṁ hi no hr̥tam ॥

धर्मलेशप्रतिच्छन्नः प्रभवं धर्मकामयोः । अर्थमुत्सृज्य किं राजन्दुर्गेषु परितप्यसे ॥

dharmaleśapraticchannaḥ prabhavaṁ dharmakāmayoḥ । artham utsr̥jya kiṁ rājan durgeṣu paritapyase ॥

भवतोऽनुविधानेन राज्यं नः पश्यतां हृतम् । अहार्यमपि शक्रेण गुप्तं गाण्डीवधन्वना ॥

bhavato ’nuvidhānena rājyaṁ naḥ paśyatāṁ hr̥tam । ahāryam api śakreṇa guptaṁ gāṇḍīvadhanvanā ॥

कुणीनामिव बिल्वानि पङ्गूनामिव धेनवः । हृतमैश्वर्यमस्माकं जीवतां भवतः कृते ॥

kuṇīnām iva bilvāni paṅgūnām iva dhenavaḥ । hr̥tam aiśvaryam asmākaṁ jīvatāṁ bhavataḥ kr̥te ॥

भवतः प्रियमित्येवं महद्व्यसनमीदृशम् । धर्मकामे प्रतीतस्य प्रतिपन्नाः स्म भारत ॥

bhavataḥ priyam ity evaṁ mahad vyasanam īdr̥śam । dharmakāme pratītasya pratipannāḥ sma bhārata ॥

कर्शयामः स्वमित्राणि नन्दयामश्च शात्रवान् । आत्मानं भवतः शास्त्रे नियम्य भरतर्षभ ॥

karśayāmaḥ svamitrāṇi nandayāmaś ca śātravān । ātmānaṁ bhavataḥ śāstre niyamya bharatarṣabha ॥

यद्वयं न तदैवैतान्धार्तराष्ट्रान्निहन्महि । भवतः शास्त्रमादाय तन्नस्तपति दुष्कृतम् ॥

yad vayaṁ na tadaivaitān dhārtarāṣṭrān nihanmahi । bhavataḥ śāstram ādāya tan nas tapati duṣkr̥tam ॥

अथैनामन्ववेक्षस्व मृगचर्यामिवात्मनः । अवीराचरितां राजन्न बलस्थैर्निषेविताम् ॥

athainām anvavekṣasva mr̥gacaryām ivātmanaḥ । avīrācaritāṁ rājan na balasthair niṣevitām ॥

यां न कृष्णो न बीभत्सुर्नाभिमन्युर्न सृञ्जयः । न चाहमभिनन्दामि न च माद्रीसुतावुभौ ॥

yāṁ na kr̥ṣṇo na bībhatsur nābhimanyur na sr̥ñjayaḥ । na cāham abhinandāmi na ca mādrīsutāv ubhau ॥

भवान्धर्मो धर्म इति सततं व्रतकर्शितः । कच्चिद्राजन्न निर्वेदादापन्नः क्लीबजीविकाम् ॥

bhavān dharmo dharma iti satataṁ vratakarśitaḥ । kaccid rājan na nirvedād āpannaḥ klībajīvikām ॥

दुर्मनुष्या हि निर्वेदमफलं सर्वघातिनम् । अशक्ताः श्रियमाहर्तुमात्मनः कुर्वते प्रियम् ॥

durmanuṣyā hi nirvedam aphalaṁ sarvaghātinam । aśaktāḥ śriyam āhartum ātmanaḥ kurvate priyam ॥

स भवान्दृष्टिमाञ्शक्तः पश्यन्नात्मनि पौरुषम् । आनृशंस्यपरो राजन्नानर्थमवबुध्यसे ॥

sa bhavān dr̥ṣṭimāñ śaktaḥ paśyann ātmani pauruṣam । ānr̥śaṁsyaparo rājan nānartham avabudhyase ॥

अस्मानमी धार्तराष्ट्राः क्षममाणानलं सतः । अशक्तानेव मन्यन्ते तद्दुःखं नाहवे वधः ॥

asmān amī dhārtarāṣṭrāḥ kṣamamāṇān alaṁ sataḥ । aśaktān eva manyante tadduḥkhaṁ nāhave vadhaḥ ॥

तत्र चेद्युध्यमानानामजिह्ममनिवर्तिनाम् । सर्वशो हि वधः श्रेयान्प्रेत्य लोकाँल्लभेमहि ॥

tatra ced yudhyamānānām ajihmam anivartinām । sarvaśo hi vadhaḥ śreyān pretya lokām̐l labhemahi ॥

अथ वा वयमेवैतान्निहत्य भरतर्षभ । आददीमहि गां सर्वां तथापि श्रेय एव नः ॥

atha vā vayam evaitān nihatya bharatarṣabha । ādadīmahi gāṁ sarvāṁ tathāpi śreya eva naḥ ॥

सर्वथा कार्यमेतन्नः स्वधर्ममनुतिष्ठताम् । काङ्क्षतां विपुलां कीर्तिं वैरं प्रतिचिकीर्षताम् ॥

sarvathā kāryam etan naḥ svadharmam anutiṣṭhatām । kāṅkṣatāṁ vipulāṁ kīrtiṁ vairaṁ praticikīrṣatām ॥

आत्मार्थं युध्यमानानां विदिते कृत्यलक्षणे । अन्यैरपहृते राज्ये प्रशंसैव न गर्हणा ॥

ātmārthaṁ yudhyamānānāṁ vidite kr̥tyalakṣaṇe । anyair apahr̥te rājye praśaṁsaiva na garhaṇā ॥

कर्शनार्थो हि यो धर्मो मित्राणामात्मनस्तथा । व्यसनं नाम तद्राजन्न स धर्मः कुधर्म तत् ॥

karśanārtho hi yo dharmo mitrāṇām ātmanas tathā । vyasanaṁ nāma tad rājan na sa dharmaḥ kudharma tat ॥

सर्वथा धर्मनित्यं तु पुरुषं धर्मदुर्बलम् । जहतस्तात धर्मार्थौ प्रेतं दुःखसुखे यथा ॥

sarvathā dharmanityaṁ tu puruṣaṁ dharmadurbalam । jahatas tāta dharmārthau pretaṁ duḥkhasukhe yathā ॥

यस्य धर्मो हि धर्मार्थं क्लेशभाङ्न स पण्डितः । न स धर्मस्य वेदार्थं सूर्यस्यान्धः प्रभामिव ॥

yasya dharmo hi dharmārthaṁ kleśabhāṅ na sa paṇḍitaḥ । na sa dharmasya vedārthaṁ sūryasyāndhaḥ prabhām iva ॥

यस्य चार्थार्थमेवार्थः स च नार्थस्य कोविदः । रक्षते भृतकोऽरण्यं यथा स्यात्तादृगेव सः ॥

yasya cārthārtham evārthaḥ sa ca nārthasya kovidaḥ । rakṣate bhr̥tako ’raṇyaṁ yathā syāt tādr̥g eva saḥ ॥

अतिवेलं हि योऽर्थार्थी नेतरावनुतिष्ठति । स वध्यः सर्वभूतानां ब्रह्महेव जुगुप्सितः ॥

ativelaṁ hi yo ’rthārthī netarāv anutiṣṭhati । sa vadhyaḥ sarvabhūtānāṁ brahmaheva jugupsitaḥ ॥

सततं यश्च कामार्थी नेतरावनुतिष्ठति । मित्राणि तस्य नश्यन्ति धर्मार्थाभ्यां च हीयते ॥

satataṁ yaś ca kāmārthī netarāv anutiṣṭhati । mitrāṇi tasya naśyanti dharmārthābhyāṁ ca hīyate ॥

तस्य धर्मार्थहीनस्य कामान्ते निधनं ध्रुवम् । कामतो रममाणस्य मीनस्येवाम्भसः क्षये ॥

tasya dharmārthahīnasya kāmānte nidhanaṁ dhruvam । kāmato ramamāṇasya mīnasyevāmbhasaḥ kṣaye ॥

तस्माद्धर्मार्थयोर्नित्यं न प्रमाद्यन्ति पण्डिताः । प्रकृतिः सा हि कामस्य पावकस्यारणिर्यथा ॥

tasmād dharmārthayor nityaṁ na pramādyanti paṇḍitāḥ । prakr̥tiḥ sā hi kāmasya pāvakasyāraṇir yathā ॥

सर्वथा धर्ममूलोऽर्थो धर्मश्चार्थपरिग्रहः । इतरेतरयोनी तौ विद्धि मेघोदधी यथा ॥

sarvathā dharmamūlo ’rtho dharmaś cārthaparigrahaḥ । itaretarayonī tau viddhi meghodadhī yathā ॥

द्रव्यार्थस्पर्शसंयोगे या प्रीतिरुपजायते । स कामश्चित्तसंकल्पः शरीरं नास्य विद्यते ॥

dravyārthasparśasaṁyoge yā prītir upajāyate । sa kāmaś cittasaṁkalpaḥ śarīraṁ nāsya vidyate ॥

अर्थार्थी पुरुषो राजन्बृहन्तं धर्ममृच्छति । अर्थमृच्छति कामार्थी न कामादन्यमृच्छती ॥

arthārthī puruṣo rājan br̥hantaṁ dharmam r̥cchati । artham r̥cchati kāmārthī na kāmād anyam r̥cchatī ॥

न हि कामेन कामोऽन्यः साध्यते फलमेव तत् । उपयोगात्फलस्येव काष्ठाद्भस्मेव पण्डितः ॥

na hi kāmena kāmo ’nyaḥ sādhyate phalam eva tat । upayogāt phalasyeva kāṣṭhād bhasmeva paṇḍitaḥ ॥

इमाञ्शकुनिकान्राजन्हन्ति वैतंसिको यथा । एतद्रूपमधर्मस्य भूतेषु च विहिंसताम् ॥

imāñ śakunikān rājan hanti vaitaṁsiko yathā । etad rūpam adharmasya bhūteṣu ca vihiṁsatām ॥

कामाल्लोभाच्च धर्मस्य प्रवृत्तिं यो न पश्यति । स वध्यः सर्वभूतानां प्रेत्य चेह च दुर्मतिः ॥

kāmāl lobhāc ca dharmasya pravr̥ttiṁ yo na paśyati । sa vadhyaḥ sarvabhūtānāṁ pretya ceha ca durmatiḥ ॥

व्यक्तं ते विदितो राजन्नर्थो द्रव्यपरिग्रहः । प्रकृतिं चापि वेत्थास्य विकृतिं चापि भूयसीम् ॥

vyaktaṁ te vidito rājann artho dravyaparigrahaḥ । prakr̥tiṁ cāpi vetthāsya vikr̥tiṁ cāpi bhūyasīm ॥

तस्य नाशं विनाशं वा जरया मरणेन वा । अनर्थमिति मन्यन्ते सोऽयमस्मासु वर्तते ॥

tasya nāśaṁ vināśaṁ vā jarayā maraṇena vā । anartham iti manyante so ’yam asmāsu vartate ॥

इन्द्रियाणां च पञ्चानां मनसो हृदयस्य च । विषये वर्तमानानां या प्रीतिरुपजायते । स काम इति मे बुद्धिः कर्मणां फलमुत्तमम् ॥

indriyāṇāṁ ca pañcānāṁ manaso hr̥dayasya ca । viṣaye vartamānānāṁ yā prītir upajāyate । sa kāma iti me buddhiḥ karmaṇāṁ phalam uttamam ॥

एवमेव पृथग्दृष्ट्वा धर्मार्थौ काममेव च । न धर्मपर एव स्यान्न चार्थपरमो नरः । न कामपरमो वा स्यात्सर्वान्सेवेत सर्वदा ॥

evam eva pr̥thag dr̥ṣṭvā dharmārthau kāmam eva ca । na dharmapara eva syān na cārthaparamo naraḥ । na kāmaparamo vā syāt sarvān seveta sarvadā ॥

धर्मं पूर्वं धनं मध्ये जघन्ये काममाचरेत् । अहन्यनुचरेदेवमेष शास्त्रकृतो विधिः ॥

dharmaṁ pūrvaṁ dhanaṁ madhye jaghanye kāmam ācaret । ahany anucared evam eṣa śāstrakr̥to vidhiḥ ॥

कामं पूर्वं धनं मध्ये जघन्ये धर्ममाचरेत् । वयस्यनुचरेदेवमेष शास्त्रकृतो विधिः ॥

kāmaṁ pūrvaṁ dhanaṁ madhye jaghanye dharmam ācaret । vayasy anucared evam eṣa śāstrakr̥to vidhiḥ ॥

धर्मं चार्थं च कामं च यथावद्वदतां वर । विभज्य काले कालज्ञः सर्वान्सेवेत पण्डितः ॥

dharmaṁ cārthaṁ ca kāmaṁ ca yathāvad vadatāṁ vara । vibhajya kāle kālajñaḥ sarvān seveta paṇḍitaḥ ॥

मोक्षो वा परमं श्रेय एष राजन्सुखार्थिनाम् । प्राप्तिर्वा बुद्धिमास्थाय सोपायं कुरुनन्दन ॥

mokṣo vā paramaṁ śreya eṣa rājan sukhārthinām । prāptir vā buddhim āsthāya sopāyaṁ kurunandana ॥

तद्वाशु क्रियतां राजन्प्राप्तिर्वाप्यधिगम्यताम् । जीवितं ह्यातुरस्येव दुःखमन्तरवर्तिनः ॥

tad vāśu kriyatāṁ rājan prāptir vāpy adhigamyatām । jīvitaṁ hy āturasyeva duḥkham antaravartinaḥ ॥

विदितश्चैव ते धर्मः सततं चरितश्च ते । जानते त्वयि शंसन्ति सुहृदः कर्मचोदनाम् ॥

viditaś caiva te dharmaḥ satataṁ caritaś ca te । jānate tvayi śaṁsanti suhr̥daḥ karmacodanām ॥

दानं यज्ञः सतां पूजा वेदधारणमार्जवम् । एष धर्मः परो राजन्फलवान्प्रेत्य चेह च ॥

dānaṁ yajñaḥ satāṁ pūjā vedadhāraṇam ārjavam । eṣa dharmaḥ paro rājan phalavān pretya ceha ca ॥

एष नार्थविहीनेन शक्यो राजन्निषेवितुम् । अखिलाः पुरुषव्याघ्र गुणाः स्युर्यद्यपीतरे ॥

eṣa nārthavihīnena śakyo rājan niṣevitum । akhilāḥ puruṣavyāghra guṇāḥ syur yady apītare ॥

धर्ममूलं जगद्राजन्नान्यद्धर्माद्विशिष्यते । धर्मश्चार्थेन महता शक्यो राजन्निषेवितुम् ॥

dharmamūlaṁ jagad rājan nānyad dharmād viśiṣyate । dharmaś cārthena mahatā śakyo rājan niṣevitum ॥

न चार्थो भैक्षचर्येण नापि क्लैब्येन कर्हिचित् । वेत्तुं शक्यः सदा राजन्केवलं धर्मबुद्धिना ॥

na cārtho bhaikṣacaryeṇa nāpi klaibyena karhi cit । vettuṁ śakyaḥ sadā rājan kevalaṁ dharmabuddhinā ॥

प्रतिषिद्धा हि ते याच्ञा यया सिध्यति वै द्विजः । तेजसैवार्थलिप्सायां यतस्व पुरुषर्षभ ॥

pratiṣiddhā hi te yācñā yayā sidhyati vai dvijaḥ । tejasaivārthalipsāyāṁ yatasva puruṣarṣabha ॥

भैक्षचर्या न विहिता न च विट्शूद्रजीविका । क्षत्रियस्य विशेषेण धर्मस्तु बलमौरसम् ॥

bhaikṣacaryā na vihitā na ca viṭśūdrajīvikā । kṣatriyasya viśeṣeṇa dharmas tu balam aurasam ॥

उदारमेव विद्वांसो धर्मं प्राहुर्मनीषिणः । उदारं प्रतिपद्यस्व नावरे स्थातुमर्हसि ॥

udāram eva vidvāṁso dharmaṁ prāhur manīṣiṇaḥ । udāraṁ pratipadyasva nāvare sthātum arhasi ॥

अनुबुध्यस्व राजेन्द्र वेत्थ धर्मान्सनातनान् । क्रूरकर्माभिजातोऽसि यस्मादुद्विजते जनः ॥

anubudhyasva rājendra vettha dharmān sanātanān । krūrakarmābhijāto ’si yasmād udvijate janaḥ ॥

प्रजापालनसंभूतं फलं तव न गर्हितम् । एष ते विहितो राजन्धात्रा धर्मः सनातनः ॥

prajāpālanasaṁbhūtaṁ phalaṁ tava na garhitam । eṣa te vihito rājan dhātrā dharmaḥ sanātanaḥ ॥

तस्माद्विचलितः पार्थ लोके हास्यं गमिष्यसि । स्वधर्माद्धि मनुष्याणां चलनं न प्रशस्यते ॥

tasmād vicalitaḥ pārtha loke hāsyaṁ gamiṣyasi । svadharmād dhi manuṣyāṇāṁ calanaṁ na praśasyate ॥

स क्षात्रं हृदयं कृत्वा त्यक्त्वेदं शिथिलं मनः । वीर्यमास्थाय कौन्तेय धुरमुद्वह धुर्यवत् ॥

sa kṣātraṁ hr̥dayaṁ kr̥tvā tyaktvedaṁ śithilaṁ manaḥ । vīryam āsthāya kaunteya dhuram udvaha dhuryavat ॥

न हि केवलधर्मात्मा पृथिवीं जातु कश्चन । पार्थिवो व्यजयद्राजन्न भूतिं न पुनः श्रियम् ॥

na hi kevaladharmātmā pr̥thivīṁ jātu kaś cana । pārthivo vyajayad rājan na bhūtiṁ na punaḥ śriyam ॥

जिह्वां दत्त्वा बहूनां हि क्षुद्राणां लुब्धचेतसाम् । निकृत्या लभते राज्यमाहारमिव शल्यकः ॥

jihvāṁ dattvā bahūnāṁ hi kṣudrāṇāṁ lubdhacetasām । nikr̥tyā labhate rājyam āhāram iva śalyakaḥ ॥

भ्रातरः पूर्वजाताश्च सुसमृद्धाश्च सर्वशः । निकृत्या निर्जिता देवैरसुराः पाण्डवर्षभ ॥

bhrātaraḥ pūrvajātāś ca susamr̥ddhāś ca sarvaśaḥ । nikr̥tyā nirjitā devair asurāḥ pāṇḍavarṣabha ॥

एवं बलवतः सर्वमिति बुद्ध्वा महीपते । जहि शत्रून्महाबाहो परां निकृतिमास्थितः ॥

evaṁ balavataḥ sarvam iti buddhvā mahīpate । jahi śatrūn mahābāho parāṁ nikr̥tim āsthitaḥ ॥

न ह्यर्जुनसमः कश्चिद्युधि योद्धा धनुर्धरः । भविता वा पुमान्कश्चिन्मत्समो वा गदाधरः ॥

na hy arjunasamaḥ kaś cid yudhi yoddhā dhanurdharaḥ । bhavitā vā pumān kaś cin matsamo vā gadādharaḥ ॥

सत्त्वेन कुरुते युद्धं राजन्सुबलवानपि । न प्रमाणेन नोत्साहात्सत्त्वस्थो भव पाण्डव ॥

sattvena kurute yuddhaṁ rājan subalavān api । na pramāṇena notsāhāt sattvastho bhava pāṇḍava ॥

सत्त्वं हि मूलमर्थस्य वितथं यदतोऽन्यथा । न तु प्रसक्तं भवति वृक्षच्छायेव हैमनी ॥

sattvaṁ hi mūlam arthasya vitathaṁ yad ato ’nyathā । na tu prasaktaṁ bhavati vr̥kṣacchāyeva haimanī ॥

अर्थत्यागो हि कार्यः स्यादर्थं श्रेयांसमिच्छता । बीजौपम्येन कौन्तेय मा ते भूदत्र संशयः ॥

arthatyāgo hi kāryaḥ syād arthaṁ śreyāṁsam icchatā । bījaupamyena kaunteya mā te bhūd atra saṁśayaḥ ॥

अर्थेन तु समोऽनर्थो यत्र लभ्येत नोदयः । न तत्र विपणः कार्यः खरकण्डूयितं हि तत् ॥

arthena tu samo ’nartho yatra labhyeta nodayaḥ । na tatra vipaṇaḥ kāryaḥ kharakaṇḍūyitaṁ hi tat ॥

एवमेव मनुष्येन्द्र धर्मं त्यक्त्वाल्पकं नरः । बृहन्तं धर्ममाप्नोति स बुद्ध इति निश्चितः ॥

evam eva manuṣyendra dharmaṁ tyaktvālpakaṁ naraḥ । br̥hantaṁ dharmam āpnoti sa buddha iti niścitaḥ ॥

अमित्रं मित्रसंपन्नं मित्रैर्भिन्दन्ति पण्डिताः । भिन्नैर्मित्रैः परित्यक्तं दुर्बलं कुरुते वशे ॥

amitraṁ mitrasaṁpannaṁ mitrair bhindanti paṇḍitāḥ । bhinnair mitraiḥ parityaktaṁ durbalaṁ kurute vaśe ॥

सत्त्वेन कुरुते युद्धं राजन्सुबलवानपि । नोद्यमेन न होत्राभिः सर्वाः स्वीकुरुते प्रजाः ॥

sattvena kurute yuddhaṁ rājan subalavān api । nodyamena na hotrābhiḥ sarvāḥ svīkurute prajāḥ ॥

सर्वथा संहतैरेव दुर्बलैर्बलवानपि । अमित्रः शक्यते हन्तुं मधुहा भ्रमरैरिव ॥

sarvathā saṁhatair eva durbalair balavān api । amitraḥ śakyate hantuṁ madhuhā bhramarair iva ॥

यथा राजन्प्रजाः सर्वाः सूर्यः पाति गभस्तिभिः । अत्ति चैव तथैव त्वं सवितुः सदृशो भव ॥

yathā rājan prajāḥ sarvāḥ sūryaḥ pāti gabhastibhiḥ । atti caiva tathaiva tvaṁ savituḥ sadr̥śo bhava ॥

एतद्ध्यपि तपो राजन्पुराणमिति नः श्रुतम् । विधिना पालनं भूमेर्यत्कृतं नः पितामहैः ॥

etad dhy api tapo rājan purāṇam iti naḥ śrutam । vidhinā pālanaṁ bhūmer yat kr̥taṁ naḥ pitāmahaiḥ ॥

अपेयात्किल भाः सूर्याल्लक्ष्मीश्चन्द्रमसस्तथा । इति लोको व्यवसितो दृष्ट्वेमां भवतो व्यथाम् ॥

apeyāt kila bhāḥ sūryāl lakṣmīś candramasas tathā । iti loko vyavasito dr̥ṣṭvemāṁ bhavato vyathām ॥

भवतश्च प्रशंसाभिर्निन्दाभिरितरस्य च । कथायुक्ताः परिषदः पृथग्राजन्समागताः ॥

bhavataś ca praśaṁsābhir nindābhir itarasya ca । kathāyuktāḥ pariṣadaḥ pr̥thag rājan samāgatāḥ ॥

इदमभ्यधिकं राजन्ब्राह्मणा गुरवश्च ते । समेताः कथयन्तीह मुदिताः सत्यसंधताम् ॥

idam abhyadhikaṁ rājan brāhmaṇā guravaś ca te । sametāḥ kathayantīha muditāḥ satyasaṁdhatām ॥

यन्न मोहान्न कार्पण्यान्न लोभान्न भयादपि । अनृतं किंचिदुक्तं ते न कामान्नार्थकारणात् ॥

yan na mohān na kārpaṇyān na lobhān na bhayād api । anr̥taṁ kiṁ cid uktaṁ te na kāmān nārthakāraṇāt ॥

यदेनः कुरुते किंचिद्राजा भूमिमवाप्नुवन् । सर्वं तन्नुदते पश्चाद्यज्ञैर्विपुलदक्षिणैः ॥

yad enaḥ kurute kiṁ cid rājā bhūmim avāpnuvan । sarvaṁ tan nudate paścād yajñair vipuladakṣiṇaiḥ ॥

ब्राह्मणेभ्यो ददद्ग्रामान्गाश्च राजन्सहस्रशः । मुच्यते सर्वपापेभ्यस्तमोभ्य इव चन्द्रमाः ॥

brāhmaṇebhyo dadad grāmān gāś ca rājan sahasraśaḥ । mucyate sarvapāpebhyas tamobhya iva candramāḥ ॥

पौरजानपदाः सर्वे प्रायशः कुरुनन्दन । सवृद्धबालाः सहिताः शंसन्ति त्वां युधिष्ठिर ॥

paurajānapadāḥ sarve prāyaśaḥ kurunandana । savr̥ddhabālāḥ sahitāḥ śaṁsanti tvāṁ yudhiṣṭhira ॥

श्वदृतौ क्षीरमासक्तं ब्रह्म वा वृषले यथा । सत्यं स्तेने बलं नार्यां राज्यं दुर्योधने तथा ॥

śvadr̥tau kṣīram āsaktaṁ brahma vā vr̥ṣale yathā । satyaṁ stene balaṁ nāryāṁ rājyaṁ duryodhane tathā ॥

इति निर्वचनं लोके चिरं चरति भारत । अपि चैतत्स्त्रियो बालाः स्वाध्यायमिव कुर्वते ॥

iti nirvacanaṁ loke ciraṁ carati bhārata । api caitat striyo bālāḥ svādhyāyam iva kurvate ॥

स भवान्रथमास्थाय सर्वोपकरणान्वितम् । त्वरमाणोऽभिनिर्यातु चिरमर्थोपपादकम् ॥

sa bhavān ratham āsthāya sarvopakaraṇānvitam । tvaramāṇo ’bhiniryātu ciram arthopapādakam ॥

वाचयित्वा द्विजश्रेष्ठानद्यैव गजसाह्वयम् । अस्त्रविद्भिः परिवृतो भ्रातृभिर्दृढधन्विभिः । आशीविषसमैर्वीरैर्मरुद्भिरिव वृत्रहा ॥

vācayitvā dvijaśreṣṭhān adyaiva gajasāhvayam । astravidbhiḥ parivr̥to bhrātr̥bhir dr̥ḍhadhanvibhiḥ । āśīviṣasamair vīrair marudbhir iva vr̥trahā ॥

अमित्रांस्तेजसा मृद्नन्नसुरेभ्य इवारिहा । श्रियमादत्स्व कौन्तेय धार्तराष्ट्रान्महाबल ॥

amitrāṁs tejasā mr̥dnann asurebhya ivārihā । śriyam ādatsva kaunteya dhārtarāṣṭrān mahābala ॥

न हि गाण्डीवमुक्तानां शराणां गार्ध्रवाससाम् । स्पर्शमाशीविषाभानां मर्त्यः कश्चन संसहेत् ॥

na hi gāṇḍīvamuktānāṁ śarāṇāṁ gārdhravāsasām । sparśam āśīviṣābhānāṁ martyaḥ kaś cana saṁsahet ॥

न स वीरो न मातङ्गो न सदश्वोऽस्ति भारत । यः सहेत गदावेगं मम क्रुद्धस्य संयुगे ॥

na sa vīro na mātaṅgo na sadaśvo ’sti bhārata । yaḥ saheta gadāvegaṁ mama kruddhasya saṁyuge ॥

सृञ्जयैः सह कैकेयैर्वृष्णीनामृषभेण च । कथं स्विद्युधि कौन्तेय राज्यं न प्राप्नुयामहे ॥

sr̥ñjayaiḥ saha kaikeyair vr̥ṣṇīnām r̥ṣabheṇa ca । kathaṁ svid yudhi kaunteya rājyaṁ na prāpnuyāmahe ॥