Who speaks here जनमेजय janamejaya · वैशंपायन vaiśaṃpāyana
English for this adhyāya (section level, not verse by verse): Ganguli’s translation, approximately §308–310 Ganguli follows a different edition, so the match is approximate.
जनमेजय उवाच । एवं हृतायां कृष्णायां प्राप्य क्लेशमनुत्तमम् । प्रतिलभ्य ततः कृष्णां किमकुर्वत पाण्डवाः ॥
janamejaya uvāca । evaṁ hr̥tāyāṁ kr̥ṣṇāyāṁ prāpya kleśam anuttamam । pratilabhya tataḥ kr̥ṣṇāṁ kim akurvata pāṇḍavāḥ ॥
वैशंपायन उवाच । एवं हृतायां कृष्णायां प्राप्य क्लेशमनुत्तमम् । विहाय काम्यकं राजा सह भ्रातृभिरच्युतः ॥
vaiśaṁpāyana uvāca । evaṁ hr̥tāyāṁ kr̥ṣṇāyāṁ prāpya kleśam anuttamam । vihāya kāmyakaṁ rājā saha bhrātr̥bhir acyutaḥ ॥
पुनर्द्वैतवनं रम्यमाजगाम युधिष्ठिरः । स्वादुमूलफलं रम्यं मार्कण्डेयाश्रमं प्रति ॥
punar dvaitavanaṁ ramyam ājagāma yudhiṣṭhiraḥ । svādumūlaphalaṁ ramyaṁ mārkaṇḍeyāśramaṁ prati ॥
अनुगुप्तफलाहाराः सर्व एव मिताशनाः । न्यवसन्पाण्डवास्तत्र कृष्णया सह भारत ॥
anuguptaphalāhārāḥ sarva eva mitāśanāḥ । nyavasan pāṇḍavās tatra kr̥ṣṇayā saha bhārata ॥
वसन्द्वैतवने राजा कुन्तीपुत्रो युधिष्ठिरः । भीमसेनोऽर्जुनश्चैव माद्रीपुत्रौ च पाण्डवौ ॥
vasan dvaitavane rājā kuntīputro yudhiṣṭhiraḥ । bhīmaseno ’rjunaś caiva mādrīputrau ca pāṇḍavau ॥
ब्राह्मणार्थे पराक्रान्ता धर्मात्मानो यतव्रताः । क्लेशमार्छन्त विपुलं सुखोदर्कं परंतपाः ॥
brāhmaṇārthe parākrāntā dharmātmāno yatavratāḥ । kleśam ārchanta vipulaṁ sukhodarkaṁ paraṁtapāḥ ॥
अजातशत्रुमासीनं भ्रातृभिः सहितं वने । आगम्य ब्राह्मणस्तूर्णं संतप्त इदमब्रवीत् ॥
ajātaśatrum āsīnaṁ bhrātr̥bhiḥ sahitaṁ vane । āgamya brāhmaṇas tūrṇaṁ saṁtapta idam abravīt ॥
अरणीसहितं मह्यं समासक्तं वनस्पतौ । मृगस्य घर्षमाणस्य विषाणे समसज्जत ॥
araṇīsahitaṁ mahyaṁ samāsaktaṁ vanaspatau । mr̥gasya gharṣamāṇasya viṣāṇe samasajjata ॥
तदादाय गतो राजंस्त्वरमाणो महामृगः । आश्रमात्त्वरितः शीघ्रं प्लवमानो महाजवः ॥
tad ādāya gato rājaṁs tvaramāṇo mahāmr̥gaḥ । āśramāt tvaritaḥ śīghraṁ plavamāno mahājavaḥ ॥
तस्य गत्वा पदं शीघ्रमासाद्य च महामृगम् । अग्निहोत्रं न लुप्येत तदानयत पाण्डवाः ॥
tasya gatvā padaṁ śīghram āsādya ca mahāmr̥gam । agnihotraṁ na lupyeta tadānayata pāṇḍavāḥ ॥
ब्राह्मणस्य वचः श्रुत्वा संतप्तोऽथ युधिष्ठिरः । धनुरादाय कौन्तेयः प्राद्रवद्भ्रातृभिः सह ॥
brāhmaṇasya vacaḥ śrutvā saṁtapto ’tha yudhiṣṭhiraḥ । dhanur ādāya kaunteyaḥ prādravad bhrātr̥bhiḥ saha ॥
सन्नद्धा धन्विनः सर्वे प्राद्रवन्नरपुंगवाः । ब्राह्मणार्थे यतन्तस्ते शीघ्रमन्वगमन्मृगम् ॥
sannaddhā dhanvinaḥ sarve prādravan narapuṁgavāḥ । brāhmaṇārthe yatantas te śīghram anvagaman mr̥gam ॥
कर्णिनालीकनाराचानुत्सृजन्तो महारथाः । नाविध्यन्पाण्डवास्तत्र पश्यन्तो मृगमन्तिकात् ॥
karṇinālīkanārācān utsr̥janto mahārathāḥ । nāvidhyan pāṇḍavās tatra paśyanto mr̥gam antikāt ॥
तेषां प्रयतमानानां नादृश्यत महामृगः । अपश्यन्तो मृगं श्रान्ता दुःखं प्राप्ता मनस्विनः ॥
teṣāṁ prayatamānānāṁ nādr̥śyata mahāmr̥gaḥ । apaśyanto mr̥gaṁ śrāntā duḥkhaṁ prāptā manasvinaḥ ॥
शीतलच्छायमासाद्य न्यग्रोधं गहने वने । क्षुत्पिपासापरीताङ्गाः पाण्डवाः समुपाविशन् ॥
śītalacchāyam āsādya nyagrodhaṁ gahane vane । kṣutpipāsāparītāṅgāḥ pāṇḍavāḥ samupāviśan ॥
तेषां समुपविष्टानां नकुलो दुःखितस्तदा । अब्रवीद्भ्रातरं ज्येष्ठममर्षात्कुरुसत्तम ॥
teṣāṁ samupaviṣṭānāṁ nakulo duḥkhitas tadā । abravīd bhrātaraṁ jyeṣṭham amarṣāt kurusattama ॥
नास्मिन्कुले जातु ममज्ज धर्मो; न चालस्यादर्थलोपो बभूव । अनुत्तराः सर्वभूतेषु भूयः; संप्राप्ताः स्मः संशयं केन राजन् ॥
nāsmin kule jātu mamajja dharmo; na cālasyād arthalopo babhūva । anuttarāḥ sarvabhūteṣu bhūyaḥ; saṁprāptāḥ smaḥ saṁśayaṁ kena rājan ॥