269.1MBH-3-269-1
मार्कण्डेय उवाच । ततो निविशमानांस्तान्सैनिकान्रावणानुगाः । अभिजग्मुर्गणानेके पिशाचक्षुद्ररक्षसाम् ॥
mārkaṇḍeya uvāca । tato niviśamānāṁs tān sainikān rāvaṇānugāḥ । abhijagmur gaṇān eke piśācakṣudrarakṣasām ॥
Vana Parva · Adhyaya 3.269
Adhyāya 269
अध्यायः 269
Who speaks here मार्कण्डेय mārkaṇḍeya
English for this adhyāya (section level, not verse by verse): Ganguli’s translation, approximately §282–284 Ganguli follows a different edition, so the match is approximate.
In this chapterSanskrit allTransliteration allHindi unavailableEnglish unavailableUnavailable translations are marked, never invented.
269.2MBH-3-269-2
पर्वणः पूतनो जम्भः खरः क्रोधवशो हरिः । प्ररुजश्चारुजश्चैव प्रघसश्चैवमादयः ॥
parvaṇaḥ pūtano jambhaḥ kharaḥ krodhavaśo hariḥ । prarujaś cārujaś caiva praghasaś caivam ādayaḥ ॥
269.3MBH-3-269-3
ततोऽभिपततां तेषामदृश्यानां दुरात्मनाम् । अन्तर्धानवधं तज्ज्ञश्चकार स विभीषणः ॥
tato ’bhipatatāṁ teṣām adr̥śyānāṁ durātmanām । antardhānavadhaṁ tajjñaś cakāra sa vibhīṣaṇaḥ ॥
269.4MBH-3-269-4
ते दृश्यमाना हरिभिर्बलिभिर्दूरपातिभिः । निहताः सर्वशो राजन्महीं जग्मुर्गतासवः ॥
te dr̥śyamānā haribhir balibhir dūrapātibhiḥ । nihatāḥ sarvaśo rājan mahīṁ jagmur gatāsavaḥ ॥
269.5MBH-3-269-5
अमृष्यमाणः सबलो रावणो निर्ययावथ । व्यूह्य चौशनसं व्यूहं हरीन्सर्वानहारयत् ॥
amr̥ṣyamāṇaḥ sabalo rāvaṇo niryayāv atha । vyūhya cauśanasaṁ vyūhaṁ harīn sarvān ahārayat ॥
269.6MBH-3-269-6
राघवस्त्वभिनिर्याय व्यूढानीकं दशाननम् । बार्हस्पत्यं विधिं कृत्वा प्रत्यव्यूहन्निशाचरम् ॥
rāghavas tv abhiniryāya vyūḍhānīkaṁ daśānanam । bārhaspatyaṁ vidhiṁ kr̥tvā pratyavyūhan niśācaram ॥
269.7MBH-3-269-7
समेत्य युयुधे तत्र ततो रामेण रावणः । युयुधे लक्ष्मणश्चैव तथैवेन्द्रजिता सह ॥
sametya yuyudhe tatra tato rāmeṇa rāvaṇaḥ । yuyudhe lakṣmaṇaś caiva tathaivendrajitā saha ॥
269.8MBH-3-269-8
विरूपाक्षेण सुग्रीवस्तारेण च निखर्वटः । तुण्डेन च नलस्तत्र पटुशः पनसेन च ॥
virūpākṣeṇa sugrīvas tāreṇa ca nikharvaṭaḥ । tuṇḍena ca nalas tatra paṭuśaḥ panasena ca ॥
269.9MBH-3-269-9
विषह्यं यं हि यो मेने स स तेन समेयिवान् । युयुधे युद्धवेलायां स्वबाहुबलमाश्रितः ॥
viṣahyaṁ yaṁ hi yo mene sa sa tena sameyivān । yuyudhe yuddhavelāyāṁ svabāhubalam āśritaḥ ॥
269.10MBH-3-269-10
स संप्रहारो ववृधे भीरूणां भयवर्धनः । लोमसंहर्षणो घोरः पुरा देवासुरे यथा ॥
sa saṁprahāro vavr̥dhe bhīrūṇāṁ bhayavardhanaḥ । lomasaṁharṣaṇo ghoraḥ purā devāsure yathā ॥
269.11MBH-3-269-11
रावणो राममानर्छच्छक्तिशूलासिवृष्टिभिः । निशितैरायसैस्तीक्ष्णै रावणं चापि राघवः ॥
rāvaṇo rāmam ānarchac chaktiśūlāsivr̥ṣṭibhiḥ । niśitair āyasais tīkṣṇai rāvaṇaṁ cāpi rāghavaḥ ॥
269.12MBH-3-269-12
तथैवेन्द्रजितं यत्तं लक्ष्मणो मर्मभेदिभिः । इन्द्रजिच्चापि सौमित्रिं बिभेद बहुभिः शरैः ॥
tathaivendrajitaṁ yattaṁ lakṣmaṇo marmabhedibhiḥ । indrajic cāpi saumitriṁ bibheda bahubhiḥ śaraiḥ ॥
269.13MBH-3-269-13
विभीषणः प्रहस्तं च प्रहस्तश्च विभीषणम् । खगपत्रैः शरैस्तीक्ष्णैरभ्यवर्षद्गतव्यथः ॥
vibhīṣaṇaḥ prahastaṁ ca prahastaś ca vibhīṣaṇam । khagapatraiḥ śarais tīkṣṇair abhyavarṣad gatavyathaḥ ॥
269.14MBH-3-269-14
तेषां बलवतामासीन्महास्त्राणां समागमः । विव्यथुः सकला येन त्रयो लोकाश्चराचराः ॥
teṣāṁ balavatām āsīn mahāstrāṇāṁ samāgamaḥ । vivyathuḥ sakalā yena trayo lokāś carācarāḥ ॥