English for this adhyāya (section level, not verse by verse): Ganguli’s translation, approximately §230–232 Ganguli follows a different edition, so the match is approximate.
द्रौपद्युवाच । इमं तु ते मार्गमपेतदोषं; वक्ष्यामि चित्तग्रहणाय भर्तुः । यस्मिन्यथावत्सखि वर्तमाना; भर्तारमाच्छेत्स्यसि कामिनीभ्यः ॥
draupady uvāca । imaṁ tu te mārgam apetadoṣaṁ; vakṣyāmi cittagrahaṇāya bhartuḥ । yasmin yathāvat sakhi vartamānā; bhartāram ācchetsyasi kāminībhyaḥ ॥
नैतादृशं दैवतमस्ति सत्ये; सर्वेषु लोकेषु सदैवतेषु । यथा पतिस्तस्य हि सर्वकामा; लभ्याः प्रसादे कुपितश्च हन्यात् ॥
naitādr̥śaṁ daivatam asti satye; sarveṣu lokeṣu sadaivateṣu । yathā patis tasya hi sarvakāmā; labhyāḥ prasāde kupitaś ca hanyāt ॥
तस्मादपत्यं विविधाश्च भोगाः; शय्यासनान्यद्भुतदर्शनानि । वस्त्राणि माल्यानि तथैव गन्धाः; स्वर्गश्च लोको विषमा च कीर्तिः ॥
tasmād apatyaṁ vividhāś ca bhogāḥ; śayyāsanāny adbhutadarśanāni । vastrāṇi mālyāni tathaiva gandhāḥ; svargaś ca loko viṣamā ca kīrtiḥ ॥
सुखं सुखेनेह न जातु लभ्यं; दुःखेन साध्वी लभते सुखानि । सा कृष्णमाराधय सौहृदेन; प्रेम्णा च नित्यं प्रतिकर्मणा च ॥
sukhaṁ sukheneha na jātu labhyaṁ; duḥkhena sādhvī labhate sukhāni । sā kr̥ṣṇam ārādhaya sauhr̥dena; premṇā ca nityaṁ pratikarmaṇā ca ॥
तथाशनैश्चारुभिरग्र्यमाल्यै;र्दाक्षिण्ययोगैर्विविधैश्च गन्धैः । अस्याः प्रियोऽस्मीति यथा विदित्वा; त्वामेव संश्लिष्यति सर्वभावैः ॥
tathāśanaiś cārubhir agryamālyair; dākṣiṇyayogair vividhaiś ca gandhaiḥ । asyāḥ priyo ’smīti yathā viditvā; tvām eva saṁśliṣyati sarvabhāvaiḥ ॥
श्रुत्वा स्वरं द्वारगतस्य भर्तुः; प्रत्युत्थिता तिष्ठ गृहस्य मध्ये । दृष्ट्वा प्रविष्टं त्वरितासनेन; पाद्येन चैव प्रतिपूजय त्वम् ॥
śrutvā svaraṁ dvāragatasya bhartuḥ; pratyutthitā tiṣṭha gr̥hasya madhye । dr̥ṣṭvā praviṣṭaṁ tvaritāsanena; pādyena caiva pratipūjaya tvam ॥
संप्रेषितायामथ चैव दास्या;मुत्थाय सर्वं स्वयमेव कुर्याः । जानातु कृष्णस्तव भावमेतं; सर्वात्मना मां भजतीति सत्ये ॥
saṁpreṣitāyām atha caiva dāsyām; utthāya sarvaṁ svayam eva kuryāḥ । jānātu kr̥ṣṇas tava bhāvam etaṁ; sarvātmanā māṁ bhajatīti satye ॥
त्वत्संनिधौ यत्कथयेत्पतिस्ते; यद्यप्यगुह्यं परिरक्षितव्यम् । काचित्सपत्नी तव वासुदेवं; प्रत्यादिशेत्तेन भवेद्विरागः ॥
tvatsaṁnidhau yat kathayet patis te; yady apy aguhyaṁ parirakṣitavyam । kā cit sapatnī tava vāsudevaṁ; pratyādiśet tena bhaved virāgaḥ ॥
प्रियांश्च रक्तांश्च हितांश्च भर्तु;स्तान्भोजयेथा विविधैरुपायैः । द्वेष्यैरपक्षैरहितैश्च तस्य; भिद्यस्व नित्यं कुहकोद्धतैश्च ॥
priyāṁś ca raktāṁś ca hitāṁś ca bhartus; tān bhojayethā vividhair upāyaiḥ । dveṣyair apakṣair ahitaiś ca tasya; bhidyasva nityaṁ kuhakoddhataiś ca ॥
मदं प्रमादं पुरुषेषु हित्वा; संयच्छ भावं प्रतिगृह्य मौनम् । प्रद्युम्नसाम्बावपि ते कुमारौ; नोपासितव्यौ रहिते कदाचित् ॥
madaṁ pramādaṁ puruṣeṣu hitvā; saṁyaccha bhāvaṁ pratigr̥hya maunam । pradyumnasāmbāv api te kumārau; nopāsitavyau rahite kadā cit ॥
महाकुलीनाभिरपापिकाभिः; स्त्रीभिः सतीभिस्तव सख्यमस्तु । चण्डाश्च शौण्डाश्च महाशनाश्च; चौराश्च दुष्टाश्चपलाश्च वर्ज्याः ॥
mahākulīnābhir apāpikābhiḥ; strībhiḥ satībhis tava sakhyam astu । caṇḍāś ca śauṇḍāś ca mahāśanāś ca; caurāś ca duṣṭāś capalāś ca varjyāḥ ॥
एतद्यशस्यं भगवेदनं च; स्वर्ग्यं तथा शत्रुनिबर्हणं च । महार्हमाल्याभरणाङ्गरागा; भर्तारमाराधय पुण्यगन्धा ॥
etad yaśasyaṁ bhagavedanaṁ ca; svargyaṁ tathā śatrunibarhaṇaṁ ca । mahārhamālyābharaṇāṅgarāgā; bhartāram ārādhaya puṇyagandhā ॥