162.1MBH-3-162-1
वैशंपायन उवाच । एतस्मिन्नेव काले तु सर्ववादित्रनिस्वनः । बभूव तुमुलः शब्दस्त्वन्तरिक्षे दिवौकसाम् ॥
vaiśaṁpāyana uvāca । etasminn eva kāle tu sarvavāditranisvanaḥ । babhūva tumulaḥ śabdas tv antarikṣe divaukasām ॥
Vana Parva · Adhyaya 3.162
Adhyāya 162
अध्यायः 162
Who speaks here वैशंपायन vaiśaṃpāyana
English for this adhyāya (section level, not verse by verse): Ganguli’s translation, approximately §164–166 Ganguli follows a different edition, so the match is approximate.
In this chapterSanskrit allTransliteration allHindi unavailableEnglish unavailableUnavailable translations are marked, never invented.
162.2MBH-3-162-2
रथनेमिस्वनश्चैव घण्टाशब्दश्च भारत । पृथग्व्यालमृगाणां च पक्षिणां चैव सर्वशः ॥
rathanemisvanaś caiva ghaṇṭāśabdaś ca bhārata । pr̥thag vyālamr̥gāṇāṁ ca pakṣiṇāṁ caiva sarvaśaḥ ॥
162.3MBH-3-162-3
तं समन्तादनुययुर्गन्धर्वाप्सरसस्तथा । विमानैः सूर्यसंकाशैर्देवराजमरिंदमम् ॥
taṁ samantād anuyayur gandharvāpsarasas tathā । vimānaiḥ sūryasaṁkāśair devarājam ariṁdamam ॥
162.4MBH-3-162-4
ततः स हरिभिर्युक्तं जाम्बूनदपरिष्कृतम् । मेघनादिनमारुह्य श्रिया परमया ज्वलन् ॥
tataḥ sa haribhir yuktaṁ jāmbūnadapariṣkr̥tam । meghanādinam āruhya śriyā paramayā jvalan ॥
162.5MBH-3-162-5
पार्थानभ्याजगामाशु देवराजः पुरंदरः । आगत्य च सहस्राक्षो रथादवरुरोह वै ॥
pārthān abhyājagāmāśu devarājaḥ puraṁdaraḥ । āgatya ca sahasrākṣo rathād avaruroha vai ॥
162.6MBH-3-162-6
तं दृष्ट्वैव महात्मानं धर्मराजो युधिष्ठिरः । भ्रातृभिः सहितः श्रीमान्देवराजमुपागमत् ॥
taṁ dr̥ṣṭvaiva mahātmānaṁ dharmarājo yudhiṣṭhiraḥ । bhrātr̥bhiḥ sahitaḥ śrīmān devarājam upāgamat ॥
162.7MBH-3-162-7
पूजयामास चैवाथ विधिवद्भूरिदक्षिणः । यथार्हममितात्मानं विधिदृष्टेन कर्मणा ॥
pūjayām āsa caivātha vidhivad bhūridakṣiṇaḥ । yathārham amitātmānaṁ vidhidr̥ṣṭena karmaṇā ॥
162.8MBH-3-162-8
धनंजयश्च तेजस्वी प्रणिपत्य पुरंदरम् । भृत्यवत्प्रणतस्तस्थौ देवराजसमीपतः ॥
dhanaṁjayaś ca tejasvī praṇipatya puraṁdaram । bhr̥tyavat praṇatas tasthau devarājasamīpataḥ ॥
162.9MBH-3-162-9
आप्यायत महातेजाः कुन्तीपुत्रो युधिष्ठिरः । धनंजयमभिप्रेक्ष्य विनीतं स्थितमन्तिके ॥
āpyāyata mahātejāḥ kuntīputro yudhiṣṭhiraḥ । dhanaṁjayam abhiprekṣya vinītaṁ sthitam antike ॥
162.10MBH-3-162-10
जटिलं देवराजस्य तपोयुक्तमकल्मषम् । हर्षेण महताविष्टः फल्गुनस्याथ दर्शनात् ॥
jaṭilaṁ devarājasya tapoyuktam akalmaṣam । harṣeṇa mahatāviṣṭaḥ phalgunasyātha darśanāt ॥
162.11MBH-3-162-11
तं तथादीनमनसं राजानं हर्षसंप्लुतम् । उवाच वचनं धीमान्देवराजः पुरंदरः ॥
taṁ tathādīnamanasaṁ rājānaṁ harṣasaṁplutam । uvāca vacanaṁ dhīmān devarājaḥ puraṁdaraḥ ॥
162.12MBH-3-162-12
त्वमिमां पृथिवीं राजन्प्रशासिष्यसि पाण्डव । स्वस्ति प्राप्नुहि कौन्तेय काम्यकं पुनराश्रमम् ॥
tvam imāṁ pr̥thivīṁ rājan praśāsiṣyasi pāṇḍava । svasti prāpnuhi kaunteya kāmyakaṁ punar āśramam ॥
162.13MBH-3-162-13
अस्त्राणि लब्धानि च पाण्डवेन; सर्वाणि मत्तः प्रयतेन राजन् । कृतप्रियश्चास्मि धनंजयेन; जेतुं न शक्यस्त्रिभिरेष लोकैः ॥
astrāṇi labdhāni ca pāṇḍavena; sarvāṇi mattaḥ prayatena rājan । kr̥tapriyaś cāsmi dhanaṁjayena; jetuṁ na śakyas tribhir eṣa lokaiḥ ॥
162.14MBH-3-162-14
एवमुक्त्वा सहस्राक्षः कुन्तीपुत्रं युधिष्ठिरम् । जगाम त्रिदिवं हृष्टः स्तूयमानो महर्षिभिः ॥
evam uktvā sahasrākṣaḥ kuntīputraṁ yudhiṣṭhiram । jagāma tridivaṁ hr̥ṣṭaḥ stūyamāno maharṣibhiḥ ॥
162.15MBH-3-162-15
धनेश्वरगृहस्थानां पाण्डवानां समागमम् । शक्रेण य इमं विद्वानधीयीत समाहितः ॥
dhaneśvaragr̥hasthānāṁ pāṇḍavānāṁ samāgamam । śakreṇa ya imaṁ vidvān adhīyīta samāhitaḥ ॥
162.16MBH-3-162-16
संवत्सरं ब्रह्मचारी नियतः संशितव्रतः । स जीवेत निराबाधः सुसुखी शरदां शतम् ॥
saṁvatsaraṁ brahmacārī niyataḥ saṁśitavrataḥ । sa jīveta nirābādhaḥ susukhī śaradāṁ śatam ॥