Adhyāya 36

विदुर उवाच । अत्रैवोदाहरन्तीममितिहासं पुरातनम् । आत्रेयस्य च संवादं साध्यानां चेति नः श्रुतम् ॥

vidura uvāca । atraivodāharantīmam itihāsaṁ purātanam । ātreyasya ca saṁvādaṁ sādhyānāṁ ceti naḥ śrutam ॥

चरन्तं हंसरूपेण महर्षिं संशितव्रतम् । साध्या देवा महाप्राज्ञं पर्यपृच्छन्त वै पुरा ॥

carantaṁ haṁsarūpeṇa maharṣiṁ saṁśitavratam । sādhyā devā mahāprājñaṁ paryapr̥cchanta vai purā ॥

साध्या देवा वयमस्मो महर्षे; दृष्ट्वा भवन्तं न शक्नुमोऽनुमातुम् । श्रुतेन धीरो बुद्धिमांस्त्वं मतो नः; काव्यां वाचं वक्तुमर्हस्युदाराम् ॥

sādhyā devā vayam asmo maharṣe; dr̥ṣṭvā bhavantaṁ na śaknumo ’numātum । śrutena dhīro buddhimāṁs tvaṁ mato naḥ; kāvyāṁ vācaṁ vaktum arhasy udārām ॥

हंस उवाच । एतत्कार्यममराः संश्रुतं मे; धृतिः शमः सत्यधर्मानुवृत्तिः । ग्रन्थिं विनीय हृदयस्य सर्वं; प्रियाप्रिये चात्मवशं नयीत ॥

haṁsa uvāca । etat kāryam amarāḥ saṁśrutaṁ me; dhr̥tiḥ śamaḥ satyadharmānuvr̥ttiḥ । granthiṁ vinīya hr̥dayasya sarvaṁ; priyāpriye cātmavaśaṁ nayīta ॥

आक्रुश्यमानो नाक्रोशेन्मन्युरेव तितिक्षितः । आक्रोष्टारं निर्दहति सुकृतं चास्य विन्दति ॥

ākruśyamāno nākrośen manyur eva titikṣitaḥ । ākroṣṭāraṁ nirdahati sukr̥taṁ cāsya vindati ॥

नाक्रोशी स्यान्नावमानी परस्य; मित्रद्रोही नोत नीचोपसेवी । न चातिमानी न च हीनवृत्तो; रूक्षां वाचं रुशतीं वर्जयीत ॥

nākrośī syān nāvamānī parasya; mitradrohī nota nīcopasevī । na cātimānī na ca hīnavr̥tto; rūkṣāṁ vācaṁ ruśatīṁ varjayīta ॥

मर्माण्यस्थीनि हृदयं तथासू;न्घोरा वाचो निर्दहन्तीह पुंसाम् । तस्माद्वाचं रुशतीं रूक्षरूपां; धर्मारामो नित्यशो वर्जयीत ॥

marmāṇy asthīni hr̥dayaṁ tathāsūn; ghorā vāco nirdahantīha puṁsām । tasmād vācaṁ ruśatīṁ rūkṣarūpāṁ; dharmārāmo nityaśo varjayīta ॥

अरुंतुदं परुषं रूक्षवाचं; वाक्कण्टकैर्वितुदन्तं मनुष्यान् । विद्यादलक्ष्मीकतमं जनानां; मुखे निबद्धां निरृतिं वहन्तम् ॥

aruṁtudaṁ paruṣaṁ rūkṣavācaṁ; vākkaṇṭakair vitudantaṁ manuṣyān । vidyād alakṣmīkatamaṁ janānāṁ; mukhe nibaddhāṁ nirr̥tiṁ vahantam ॥

परश्चेदेनमधिविध्येत बाणै;र्भृशं सुतीक्ष्णैरनलार्कदीप्तैः । विरिच्यमानोऽप्यतिरिच्यमानो; विद्यात्कविः सुकृतं मे दधाति ॥

paraś ced enam adhividhyeta bāṇair; bhr̥śaṁ sutīkṣṇair analārkadīptaiḥ । viricyamāno ’py atiricyamāno; vidyāt kaviḥ sukr̥taṁ me dadhāti ॥

यदि सन्तं सेवते यद्यसन्तं; तपस्विनं यदि वा स्तेनमेव । वासो यथा रङ्गवशं प्रयाति; तथा स तेषां वशमभ्युपैति ॥

yadi santaṁ sevate yady asantaṁ; tapasvinaṁ yadi vā stenam eva । vāso yathā raṅgavaśaṁ prayāti; tathā sa teṣāṁ vaśam abhyupaiti ॥

वादं तु यो न प्रवदेन्न वादये;द्यो नाहतः प्रतिहन्यान्न घातयेत् । यो हन्तुकामस्य न पापमिच्छे;त्तस्मै देवाः स्पृहयन्त्यागताय ॥

vādaṁ tu yo na pravaden na vādayed; yo nāhataḥ pratihanyān na ghātayet । yo hantukāmasya na pāpam icchet; tasmai devāḥ spr̥hayanty āgatāya ॥

अव्याहृतं व्याहृताच्छ्रेय आहुः; सत्यं वदेद्व्याहृतं तद्द्वितीयम् । प्रियं वदेद्व्याहृतं तत्तृतीयं; धर्म्यं वदेद्व्याहृतं तच्चतुर्थम् ॥

avyāhr̥taṁ vyāhr̥tāc chreya āhuḥ; satyaṁ vaded vyāhr̥taṁ tad dvitīyam । priyaṁ vaded vyāhr̥taṁ tat tr̥tīyaṁ; dharmyaṁ vaded vyāhr̥taṁ tac caturtham ॥

यादृशैः संविवदते यादृशांश्चोपसेवते । यादृगिच्छेच्च भवितुं तादृग्भवति पूरुषः ॥

yādr̥śaiḥ saṁvivadate yādr̥śāṁś copasevate । yādr̥g icchec ca bhavituṁ tādr̥g bhavati pūruṣaḥ ॥

यतो यतो निवर्तते ततस्ततो विमुच्यते । निवर्तनाद्धि सर्वतो न वेत्ति दुःखमण्वपि ॥

yato yato nivartate tatas tato vimucyate । nivartanād dhi sarvato na vetti duḥkham aṇv api ॥

न जीयते नोत जिगीषतेऽन्या;न्न वैरकृच्चाप्रतिघातकश्च । निन्दाप्रशंसासु समस्वभावो; न शोचते हृष्यति नैव चायम् ॥

na jīyate nota jigīṣate ’nyān; na vairakr̥c cāpratighātakaś ca । nindāpraśaṁsāsu samasvabhāvo; na śocate hr̥ṣyati naiva cāyam ॥

भावमिच्छति सर्वस्य नाभावे कुरुते मतिम् । सत्यवादी मृदुर्दान्तो यः स उत्तमपूरुषः ॥

bhāvam icchati sarvasya nābhāve kurute matim । satyavādī mr̥dur dānto yaḥ sa uttamapūruṣaḥ ॥

नानर्थकं सान्त्वयति प्रतिज्ञाय ददाति च । राद्धापराद्धे जानाति यः स मध्यमपूरुषः ॥

nānarthakaṁ sāntvayati pratijñāya dadāti ca । rāddhāparāddhe jānāti yaḥ sa madhyamapūruṣaḥ ॥

दुःशासनस्तूपहन्ता न शास्ता; नावर्तते मन्युवशात्कृतघ्नः । न कस्यचिन्मित्रमथो दुरात्मा; कलाश्चैता अधमस्येह पुंसः ॥

duḥśāsanas tūpahantā na śāstā; nāvartate manyuvaśāt kr̥taghnaḥ । na kasya cin mitram atho durātmā; kalāś caitā adhamasyeha puṁsaḥ ॥

न श्रद्दधाति कल्याणं परेभ्योऽप्यात्मशङ्कितः । निराकरोति मित्राणि यो वै सोऽधमपूरुषः ॥

na śraddadhāti kalyāṇaṁ parebhyo ’py ātmaśaṅkitaḥ । nirākaroti mitrāṇi yo vai so ’dhamapūruṣaḥ ॥

उत्तमानेव सेवेत प्राप्ते काले तु मध्यमान् । अधमांस्तु न सेवेत य इच्छेच्छ्रेय आत्मनः ॥

uttamān eva seveta prāpte kāle tu madhyamān । adhamāṁs tu na seveta ya icchec chreya ātmanaḥ ॥

प्राप्नोति वै वित्तमसद्बलेन; नित्योत्थानात्प्रज्ञया पौरुषेण । न त्वेव सम्यग्लभते प्रशंसां; न वृत्तमाप्नोति महाकुलानाम् ॥

prāpnoti vai vittam asadbalena; nityotthānāt prajñayā pauruṣeṇa । na tv eva samyag labhate praśaṁsāṁ; na vr̥ttam āpnoti mahākulānām ॥

धृतराष्ट्र उवाच । महाकुलानां स्पृहयन्ति देवा; धर्मार्थवृद्धाश्च बहुश्रुताश्च । पृच्छामि त्वां विदुर प्रश्नमेतं; भवन्ति वै कानि महाकुलानि ॥

dhr̥tarāṣṭra uvāca । mahākulānāṁ spr̥hayanti devā; dharmārthavr̥ddhāś ca bahuśrutāś ca । pr̥cchāmi tvāṁ vidura praśnam etaṁ; bhavanti vai kāni mahākulāni ॥

विदुर उवाच । तपो दमो ब्रह्मवित्त्वं वितानाः; पुण्या विवाहाः सततान्नदानम् । येष्वेवैते सप्त गुणा भवन्ति; सम्यग्वृत्तास्तानि महाकुलानि ॥

vidura uvāca । tapo damo brahmavit tvaṁ vitānāḥ; puṇyā vivāhāḥ satatānnadānam । yeṣv evaite sapta guṇā bhavanti; samyag vr̥ttās tāni mahākulāni ॥

येषां न वृत्तं व्यथते न योनि;र्वृत्तप्रसादेन चरन्ति धर्मम् । ये कीर्तिमिच्छन्ति कुले विशिष्टां; त्यक्तानृतास्तानि महाकुलानि ॥

yeṣāṁ na vr̥ttaṁ vyathate na yonir; vr̥ttaprasādena caranti dharmam । ye kīrtim icchanti kule viśiṣṭāṁ; tyaktānr̥tās tāni mahākulāni ॥

अनिज्ययाविवाहैश्च वेदस्योत्सादनेन च । कुलान्यकुलतां यान्ति धर्मस्यातिक्रमेण च ॥

anijyayāvivāhaiś ca vedasyotsādanena ca । kulāny akulatāṁ yānti dharmasyātikrameṇa ca ॥

देवद्रव्यविनाशेन ब्रह्मस्वहरणेन च । कुलान्यकुलतां यान्ति ब्राह्मणातिक्रमेण च ॥

devadravyavināśena brahmasvaharaṇena ca । kulāny akulatāṁ yānti brāhmaṇātikrameṇa ca ॥

ब्राह्मणानां परिभवात्परिवादाच्च भारत । कुलान्यकुलतां यान्ति न्यासापहरणेन च ॥

brāhmaṇānāṁ paribhavāt parivādāc ca bhārata । kulāny akulatāṁ yānti nyāsāpaharaṇena ca ॥

कुलानि समुपेतानि गोभिः पुरुषतोऽश्वतः । कुलसंख्यां न गच्छन्ति यानि हीनानि वृत्ततः ॥

kulāni samupetāni gobhiḥ puruṣato ’śvataḥ । kulasaṁkhyāṁ na gacchanti yāni hīnāni vr̥ttataḥ ॥

वृत्ततस्त्वविहीनानि कुलान्यल्पधनान्यपि । कुलसंख्यां तु गच्छन्ति कर्षन्ति च महद्यशः ॥

vr̥ttatas tv avihīnāni kulāny alpadhanāny api । kulasaṁkhyāṁ tu gacchanti karṣanti ca mahad yaśaḥ ॥

मा नः कुले वैरकृत्कश्चिदस्तु; राजामात्यो मा परस्वापहारी । मित्रद्रोही नैकृतिकोऽनृती वा; पूर्वाशी वा पितृदेवातिथिभ्यः ॥

mā naḥ kule vairakr̥t kaś cid astu; rājāmātyo mā parasvāpahārī । mitradrohī naikr̥tiko ’nr̥tī vā; pūrvāśī vā pitr̥devātithibhyaḥ ॥

यश्च नो ब्राह्मणं हन्याद्यश्च नो ब्राह्मणान्द्विषेत् । न नः स समितिं गच्छेद्यश्च नो निर्वपेत्कृषिम् ॥

yaś ca no brāhmaṇaṁ hanyād yaś ca no brāhmaṇān dviṣet । na naḥ sa samitiṁ gacched yaś ca no nirvapet kr̥ṣim ॥

तृणानि भूमिरुदकं वाक्चतुर्थी च सूनृता । सतामेतानि गेहेषु नोच्छिद्यन्ते कदाचन ॥

tr̥ṇāni bhūmir udakaṁ vāk caturthī ca sūnr̥tā । satām etāni geheṣu nocchidyante kadā cana ॥

श्रद्धया परया राजन्नुपनीतानि सत्कृतिम् । प्रवृत्तानि महाप्राज्ञ धर्मिणां पुण्यकर्मणाम् ॥

śraddhayā parayā rājann upanītāni satkr̥tim । pravr̥ttāni mahāprājña dharmiṇāṁ puṇyakarmaṇām ॥

सूक्ष्मोऽपि भारं नृपते स्यन्दनो वै; शक्तो वोढुं न तथान्ये महीजाः । एवं युक्ता भारसहा भवन्ति; महाकुलीना न तथान्ये मनुष्याः ॥

sūkṣmo ’pi bhāraṁ nr̥pate syandano vai; śakto voḍhuṁ na tathānye mahījāḥ । evaṁ yuktā bhārasahā bhavanti; mahākulīnā na tathānye manuṣyāḥ ॥

न तन्मित्रं यस्य कोपाद्बिभेति; यद्वा मित्रं शङ्कितेनोपचर्यम् । यस्मिन्मित्रे पितरीवाश्वसीत; तद्वै मित्रं संगतानीतराणि ॥

na tan mitraṁ yasya kopād bibheti; yad vā mitraṁ śaṅkitenopacaryam । yasmin mitre pitarīvāśvasīta; tad vai mitraṁ saṁgatānītarāṇi ॥

यदि चेदप्यसंबन्धो मित्रभावेन वर्तते । स एव बन्धुस्तन्मित्रं सा गतिस्तत्परायणम् ॥

yadi ced apy asaṁbandho mitrabhāvena vartate । sa eva bandhus tan mitraṁ sā gatis tatparāyaṇam ॥

चलचित्तस्य वै पुंसो वृद्धाननुपसेवतः । पारिप्लवमतेर्नित्यमध्रुवो मित्रसंग्रहः ॥

calacittasya vai puṁso vr̥ddhān anupasevataḥ । pāriplavamater nityam adhruvo mitrasaṁgrahaḥ ॥

चलचित्तमनात्मानमिन्द्रियाणां वशानुगम् । अर्थाः समतिवर्तन्ते हंसाः शुष्कं सरो यथा ॥

calacittam anātmānam indriyāṇāṁ vaśānugam । arthāḥ samativartante haṁsāḥ śuṣkaṁ saro yathā ॥

अकस्मादेव कुप्यन्ति प्रसीदन्त्यनिमित्ततः । शीलमेतदसाधूनामभ्रं पारिप्लवं यथा ॥

akasmād eva kupyanti prasīdanty animittataḥ । śīlam etad asādhūnām abhraṁ pāriplavaṁ yathā ॥

सत्कृताश्च कृतार्थाश्च मित्राणां न भवन्ति ये । तान्मृतानपि क्रव्यादाः कृतघ्नान्नोपभुञ्जते ॥

satkr̥tāś ca kr̥tārthāś ca mitrāṇāṁ na bhavanti ye । tān mr̥tān api kravyādāḥ kr̥taghnān nopabhuñjate ॥

अर्थयेदेव मित्राणि सति वासति वा धने । नानर्थयन्विजानाति मित्राणां सारफल्गुताम् ॥

arthayed eva mitrāṇi sati vāsati vā dhane । nānarthayan vijānāti mitrāṇāṁ sāraphalgutām ॥

संतापाद्भ्रश्यते रूपं संतापाद्भ्रश्यते बलम् । संतापाद्भ्रश्यते ज्ञानं संतापाद्व्याधिमृच्छति ॥

saṁtāpād bhraśyate rūpaṁ saṁtāpād bhraśyate balam । saṁtāpād bhraśyate jñānaṁ saṁtāpād vyādhim r̥cchati ॥

अनवाप्यं च शोकेन शरीरं चोपतप्यते । अमित्राश्च प्रहृष्यन्ति मा स्म शोके मनः कृथाः ॥

anavāpyaṁ ca śokena śarīraṁ copatapyate । amitrāś ca prahr̥ṣyanti mā sma śoke manaḥ kr̥thāḥ ॥

पुनर्नरो म्रियते जायते च; पुनर्नरो हीयते वर्धते पुनः । पुनर्नरो याचति याच्यते च; पुनर्नरः शोचति शोच्यते पुनः ॥

punar naro mriyate jāyate ca; punar naro hīyate vardhate punaḥ । punar naro yācati yācyate ca; punar naraḥ śocati śocyate punaḥ ॥

सुखं च दुःखं च भवाभवौ च; लाभालाभौ मरणं जीवितं च । पर्यायशः सर्वमिह स्पृशन्ति; तस्माद्धीरो नैव हृष्येन्न शोचेत् ॥

sukhaṁ ca duḥkhaṁ ca bhavābhavau ca; lābhālābhau maraṇaṁ jīvitaṁ ca । paryāyaśaḥ sarvam iha spr̥śanti; tasmād dhīro naiva hr̥ṣyen na śocet ॥

चलानि हीमानि षडिन्द्रियाणि; तेषां यद्यद्वर्तते यत्र यत्र । ततस्ततः स्रवते बुद्धिरस्य; छिद्रोदकुम्भादिव नित्यमम्भः ॥

calāni hīmāni ṣaḍindriyāṇi; teṣāṁ yad yad vartate yatra yatra । tatas tataḥ sravate buddhir asya; chidrodakumbhād iva nityam ambhaḥ ॥

धृतराष्ट्र उवाच । तनुरुच्चः शिखी राजा मिथ्योपचरितो मया । मन्दानां मम पुत्राणां युद्धेनान्तं करिष्यति ॥

dhr̥tarāṣṭra uvāca । tanur uccaḥ śikhī rājā mithyopacarito mayā । mandānāṁ mama putrāṇāṁ yuddhenāntaṁ kariṣyati ॥

नित्योद्विग्नमिदं सर्वं नित्योद्विग्नमिदं मनः । यत्तत्पदमनुद्विग्नं तन्मे वद महामते ॥

nityodvignam idaṁ sarvaṁ nityodvignam idaṁ manaḥ । yat tat padam anudvignaṁ tan me vada mahāmate ॥

विदुर उवाच । नान्यत्र विद्यातपसोर्नान्यत्रेन्द्रियनिग्रहात् । नान्यत्र लोभसंत्यागाच्छान्तिं पश्यामि तेऽनघ ॥

vidura uvāca । nānyatra vidyātapasor nānyatrendriyanigrahāt । nānyatra lobhasaṁtyāgāc chāntiṁ paśyāmi te ’nagha ॥

बुद्ध्या भयं प्रणुदति तपसा विन्दते महत् । गुरुशुश्रूषया ज्ञानं शान्तिं त्यागेन विन्दति ॥

buddhyā bhayaṁ praṇudati tapasā vindate mahat । guruśuśrūṣayā jñānaṁ śāntiṁ tyāgena vindati ॥

अनाश्रिता दानपुण्यं वेदपुण्यमनाश्रिताः । रागद्वेषविनिर्मुक्ता विचरन्तीह मोक्षिणः ॥

anāśritā dānapuṇyaṁ vedapuṇyam anāśritāḥ । rāgadveṣavinirmuktā vicarantīha mokṣiṇaḥ ॥

स्वधीतस्य सुयुद्धस्य सुकृतस्य च कर्मणः । तपसश्च सुतप्तस्य तस्यान्ते सुखमेधते ॥

svadhītasya suyuddhasya sukr̥tasya ca karmaṇaḥ । tapasaś ca sutaptasya tasyānte sukham edhate ॥

स्वास्तीर्णानि शयनानि प्रपन्ना; न वै भिन्ना जातु निद्रां लभन्ते । न स्त्रीषु राजन्रतिमाप्नुवन्ति; न मागधैः स्तूयमाना न सूतैः ॥

svāstīrṇāni śayanāni prapannā; na vai bhinnā jātu nidrāṁ labhante । na strīṣu rājan ratim āpnuvanti; na māgadhaiḥ stūyamānā na sūtaiḥ ॥

न वै भिन्ना जातु चरन्ति धर्मं; न वै सुखं प्राप्नुवन्तीह भिन्नाः । न वै भिन्ना गौरवं मानयन्ति; न वै भिन्नाः प्रशमं रोचयन्ति ॥

na vai bhinnā jātu caranti dharmaṁ; na vai sukhaṁ prāpnuvantīha bhinnāḥ । na vai bhinnā gauravaṁ mānayanti; na vai bhinnāḥ praśamaṁ rocayanti ॥

न वै तेषां स्वदते पथ्यमुक्तं; योगक्षेमं कल्पते नोत तेषाम् । भिन्नानां वै मनुजेन्द्र परायणं; न विद्यते किंचिदन्यद्विनाशात् ॥

na vai teṣāṁ svadate pathyam uktaṁ; yogakṣemaṁ kalpate nota teṣām । bhinnānāṁ vai manujendra parāyaṇaṁ; na vidyate kiṁ cid anyad vināśāt ॥

संभाव्यं गोषु संपन्नं संभाव्यं ब्राह्मणे तपः । संभाव्यं स्त्रीषु चापल्यं संभाव्यं ज्ञातितो भयम् ॥

saṁbhāvyaṁ goṣu saṁpannaṁ saṁbhāvyaṁ brāhmaṇe tapaḥ । saṁbhāvyaṁ strīṣu cāpalyaṁ saṁbhāvyaṁ jñātito bhayam ॥

तन्तवोऽप्यायता नित्यं तन्तवो बहुलाः समाः । बहून्बहुत्वादायासान्सहन्तीत्युपमा सताम् ॥

tantavo ’py āyatā nityaṁ tantavo bahulāḥ samāḥ । bahūn bahutvād āyāsān sahantīty upamā satām ॥

धूमायन्ते व्यपेतानि ज्वलन्ति सहितानि च । धृतराष्ट्रोल्मुकानीव ज्ञातयो भरतर्षभ ॥

dhūmāyante vyapetāni jvalanti sahitāni ca । dhr̥tarāṣṭrolmukānīva jñātayo bharatarṣabha ॥

ब्राह्मणेषु च ये शूराः स्त्रीषु ज्ञातिषु गोषु च । वृन्तादिव फलं पक्वं धृतराष्ट्र पतन्ति ते ॥

brāhmaṇeṣu ca ye śūrāḥ strīṣu jñātiṣu goṣu ca । vr̥ntād iva phalaṁ pakvaṁ dhr̥tarāṣṭra patanti te ॥

महानप्येकजो वृक्षो बलवान्सुप्रतिष्ठितः । प्रसह्य एव वातेन शाखास्कन्धं विमर्दितुम् ॥

mahān apy ekajo vr̥kṣo balavān supratiṣṭhitaḥ । prasahya eva vātena śākhāskandhaṁ vimarditum ॥

अथ ये सहिता वृक्षाः संघशः सुप्रतिष्ठिताः । ते हि शीघ्रतमान्वातान्सहन्तेऽन्योन्यसंश्रयात् ॥

atha ye sahitā vr̥kṣāḥ saṁghaśaḥ supratiṣṭhitāḥ । te hi śīghratamān vātān sahante ’nyonyasaṁśrayāt ॥

एवं मनुष्यमप्येकं गुणैरपि समन्वितम् । शक्यं द्विषन्तो मन्यन्ते वायुर्द्रुममिवैकजम् ॥

evaṁ manuṣyam apy ekaṁ guṇair api samanvitam । śakyaṁ dviṣanto manyante vāyur drumam ivaikajam ॥

अन्योन्यसमुपष्टम्भादन्योन्यापाश्रयेण च । ज्ञातयः संप्रवर्धन्ते सरसीवोत्पलान्युत ॥

anyonyasamupaṣṭambhād anyonyāpāśrayeṇa ca । jñātayaḥ saṁpravardhante sarasīvotpalāny uta ॥

अवध्या ब्राह्मणा गावः स्त्रियो बालाश्च ज्ञातयः । येषां चान्नानि भुञ्जीत ये च स्युः शरणागताः ॥

avadhyā brāhmaṇā gāvaḥ striyo bālāś ca jñātayaḥ । yeṣāṁ cānnāni bhuñjīta ye ca syuḥ śaraṇāgatāḥ ॥

न मनुष्ये गुणः कश्चिदन्यो धनवतामपि । अनातुरत्वाद्भद्रं ते मृतकल्पा हि रोगिणः ॥

na manuṣye guṇaḥ kaś cid anyo dhanavatām api । anāturatvād bhadraṁ te mr̥takalpā hi rogiṇaḥ ॥

अव्याधिजं कटुकं शीर्षरोगं; पापानुबन्धं परुषं तीक्ष्णमुग्रम् । सतां पेयं यन्न पिबन्त्यसन्तो; मन्युं महाराज पिब प्रशाम्य ॥

avyādhijaṁ kaṭukaṁ śīrṣarogaṁ; pāpānubandhaṁ paruṣaṁ tīkṣṇam ugram । satāṁ peyaṁ yan na pibanty asanto; manyuṁ mahārāja piba praśāmya ॥

रोगार्दिता न फलान्याद्रियन्ते; न वै लभन्ते विषयेषु तत्त्वम् । दुःखोपेता रोगिणो नित्यमेव; न बुध्यन्ते धनभोगान्न सौख्यम् ॥

rogārditā na phalāny ādriyante; na vai labhante viṣayeṣu tattvam । duḥkhopetā rogiṇo nityam eva; na budhyante dhanabhogān na saukhyam ॥

पुरा ह्युक्तो नाकरोस्त्वं वचो मे; द्यूते जितां द्रौपदीं प्रेक्ष्य राजन् । दुर्योधनं वारयेत्यक्षवत्यां; कितवत्वं पण्डिता वर्जयन्ति ॥

purā hy ukto nākaros tvaṁ vaco me; dyūte jitāṁ draupadīṁ prekṣya rājan । duryodhanaṁ vārayety akṣavatyāṁ; kitavatvaṁ paṇḍitā varjayanti ॥

न तद्बलं यन्मृदुना विरुध्यते; मिश्रो धर्मस्तरसा सेवितव्यः । प्रध्वंसिनी क्रूरसमाहिता श्री;र्मृदुप्रौढा गच्छति पुत्रपौत्रान् ॥

na tad balaṁ yan mr̥dunā virudhyate; miśro dharmas tarasā sevitavyaḥ । pradhvaṁsinī krūrasamāhitā śrīr; mr̥duprauḍhā gacchati putrapautrān ॥

धार्तराष्ट्राः पाण्डवान्पालयन्तु; पाण्डोः सुतास्तव पुत्रांश्च पान्तु । एकारिमित्राः कुरवो ह्येकमन्त्रा; जीवन्तु राजन्सुखिनः समृद्धाः ॥

dhārtarāṣṭrāḥ pāṇḍavān pālayantu; pāṇḍoḥ sutās tava putrāṁś ca pāntu । ekārimitrāḥ kuravo hy ekamantrā; jīvantu rājan sukhinaḥ samr̥ddhāḥ ॥

मेढीभूतः कौरवाणां त्वमद्य; त्वय्याधीनं कुरुकुलमाजमीढ । पार्थान्बालान्वनवासप्रतप्ता;न्गोपायस्व स्वं यशस्तात रक्षन् ॥

meḍhībhūtaḥ kauravāṇāṁ tvam adya; tvayy ādhīnaṁ kurukulam ājamīḍha । pārthān bālān vanavāsaprataptān; gopāyasva svaṁ yaśas tāta rakṣan ॥

संधत्स्व त्वं कौरवान्पाण्डुपुत्रै;र्मा तेऽन्तरं रिपवः प्रार्थयन्तु । सत्ये स्थितास्ते नरदेव सर्वे; दुर्योधनं स्थापय त्वं नरेन्द्र ॥

saṁdhatsva tvaṁ kauravān pāṇḍuputrair; mā te ’ntaraṁ ripavaḥ prārthayantu । satye sthitās te naradeva sarve; duryodhanaṁ sthāpaya tvaṁ narendra ॥