Who speaks here भीष्म bhīṣma
English for this adhyāya (section level, not verse by verse): Ganguli’s translation, approximately §357–359 Ganguli follows a different edition, so the match is approximate.
भीष्म उवाच । स चामन्त्र्योरगश्रेष्ठं ब्राह्मणः कृतनिश्चयः । दीक्षाकाङ्क्षी तदा राजंश्च्यवनं भार्गवं श्रितः ॥
bhīṣma uvāca । sa cāmantryoragaśreṣṭhaṁ brāhmaṇaḥ kr̥taniścayaḥ । dīkṣākāṅkṣī tadā rājaṁś cyavanaṁ bhārgavaṁ śritaḥ ॥
स तेन कृतसंस्कारो धर्ममेवोपतस्थिवान् । तथैव च कथामेतां राजन्कथितवांस्तदा ॥
sa tena kr̥tasaṁskāro dharmam evopatasthivān । tathaiva ca kathām etāṁ rājan kathitavāṁs tadā ॥
भार्गवेणापि राजेन्द्र जनकस्य निवेशने । कथैषा कथिता पुण्या नारदाय महात्मने ॥
bhārgaveṇāpi rājendra janakasya niveśane । kathaiṣā kathitā puṇyā nāradāya mahātmane ॥
नारदेनापि राजेन्द्र देवेन्द्रस्य निवेशने । कथिता भरतश्रेष्ठ पृष्टेनाक्लिष्टकर्मणा ॥
nāradenāpi rājendra devendrasya niveśane । kathitā bharataśreṣṭha pr̥ṣṭenākliṣṭakarmaṇā ॥
देवराजेन च पुरा कथैषा कथिता शुभा । समस्तेभ्यः प्रशस्तेभ्यो वसुभ्यो वसुधाधिप ॥
devarājena ca purā kathaiṣā kathitā śubhā । samastebhyaḥ praśastebhyo vasubhyo vasudhādhipa ॥
यदा च मम रामेण युद्धमासीत्सुदारुणम् । वसुभिश्च तदा राजन्कथेयं कथिता मम ॥
yadā ca mama rāmeṇa yuddham āsīt sudāruṇam । vasubhiś ca tadā rājan katheyaṁ kathitā mama ॥
पृच्छमानाय तत्त्वेन मया तुभ्यं विशां पते । कथेयं कथिता पुण्या धर्म्या धर्मभृतां वर ॥
pr̥cchamānāya tattvena mayā tubhyaṁ viśāṁ pate । katheyaṁ kathitā puṇyā dharmyā dharmabhr̥tāṁ vara ॥
तदेष परमो धर्मो यन्मां पृच्छसि भारत । असन्नधीरनाकाङ्क्षी धर्मार्थकरणे नृप ॥
tad eṣa paramo dharmo yan māṁ pr̥cchasi bhārata । asannadhīr anākāṅkṣī dharmārthakaraṇe nr̥pa ॥
स च किल कृतनिश्चयो द्विजाग्र्यो; भुजगपतिप्रतिदेशितार्थकृत्यः । यमनियमसमाहितो वनान्तं; परिगणितोञ्छशिलाशनः प्रविष्टः ॥
sa ca kila kr̥taniścayo dvijāgryo; bhujagapatipratideśitārthakr̥tyaḥ । yamaniyamasamāhito vanāntaṁ; parigaṇitoñchaśilāśanaḥ praviṣṭaḥ ॥