Who speaks here युधिष्ठिर yudhiṣṭhira · भीष्म bhīṣma
English for this adhyāya (section level, not verse by verse): Ganguli’s translation, approximately §352–354 Ganguli follows a different edition, so the match is approximate.
युधिष्ठिर उवाच । धर्माः पितामहेनोक्ता मोक्षधर्माश्रिताः शुभाः । धर्ममाश्रमिणां श्रेष्ठं वक्तुमर्हति मे भवान् ॥
yudhiṣṭhira uvāca । dharmāḥ pitāmahenoktā mokṣadharmāśritāḥ śubhāḥ । dharmam āśramiṇāṁ śreṣṭhaṁ vaktum arhati me bhavān ॥
भीष्म उवाच । सर्वत्र विहितो धर्मः स्वर्ग्यः सत्यफलोदयः । बहुद्वारस्य धर्मस्य नेहास्ति विफला क्रिया ॥
bhīṣma uvāca । sarvatra vihito dharmaḥ svargyaḥ satyaphalodayaḥ । bahudvārasya dharmasya nehāsti viphalā kriyā ॥
यस्मिन्यस्मिंस्तु विषये यो यो याति विनिश्चयम् । स तमेवाभिजानाति नान्यं भरतसत्तम ॥
yasmin yasmiṁs tu viṣaye yo yo yāti viniścayam । sa tam evābhijānāti nānyaṁ bharatasattama ॥
अपि च त्वं नरव्याघ्र श्रोतुमर्हसि मे कथाम् । पुरा शक्रस्य कथितां नारदेन सुरर्षिणा ॥
api ca tvaṁ naravyāghra śrotum arhasi me kathām । purā śakrasya kathitāṁ nāradena surarṣiṇā ॥
सुरर्षिर्नारदो राजन्सिद्धस्त्रैलोक्यसंमतः । पर्येति क्रमशो लोकान्वायुरव्याहतो यथा ॥
surarṣir nārado rājan siddhas trailokyasaṁmataḥ । paryeti kramaśo lokān vāyur avyāhato yathā ॥
स कदाचिन्महेष्वास देवराजालयं गतः । सत्कृतश्च महेन्द्रेण प्रत्यासन्नगतोऽभवत् ॥
sa kadā cin maheṣvāsa devarājālayaṁ gataḥ । satkr̥taś ca mahendreṇa pratyāsannagato ’bhavat ॥
तं कृतक्षणमासीनं पर्यपृच्छच्छचीपतिः । ब्रह्मर्षे किंचिदाश्चर्यमस्ति दृष्टं त्वयानघ ॥
taṁ kr̥takṣaṇam āsīnaṁ paryapr̥cchac chacīpatiḥ । brahmarṣe kiṁ cid āścaryam asti dr̥ṣṭaṁ tvayānagha ॥
यथा त्वमपि विप्रर्षे त्रैलोक्यं सचराचरम् । जातकौतूहलो नित्यं सिद्धश्चरसि साक्षिवत् ॥
yathā tvam api viprarṣe trailokyaṁ sacarācaram । jātakautūhalo nityaṁ siddhaś carasi sākṣivat ॥
न ह्यस्त्यविदितं लोके देवर्षे तव किंचन । श्रुतं वाप्यनुभूतं वा दृष्टं वा कथयस्व मे ॥
na hy asty aviditaṁ loke devarṣe tava kiṁ cana । śrutaṁ vāpy anubhūtaṁ vā dr̥ṣṭaṁ vā kathayasva me ॥
तस्मै राजन्सुरेन्द्राय नारदो वदतां वरः । आसीनायोपपन्नाय प्रोक्तवान्विपुलां कथाम् ॥
tasmai rājan surendrāya nārado vadatāṁ varaḥ । āsīnāyopapannāya proktavān vipulāṁ kathām ॥
यथा येन च कल्पेन स तस्मै द्विजसत्तमः । कथां कथितवान्पृष्टस्तथा त्वमपि मे शृणु ॥
yathā yena ca kalpena sa tasmai dvijasattamaḥ । kathāṁ kathitavān pr̥ṣṭas tathā tvam api me śr̥ṇu ॥