Who speaks here भीष्म bhīṣma
English for this adhyāya (section level, not verse by verse): Ganguli’s translation, approximately §133–135 Ganguli follows a different edition, so the match is approximate.
भीष्म उवाच । अत्र कर्मान्तवचनं कीर्तयन्ति पुराविदः । प्रत्यक्षावेव धर्मार्थौ क्षत्रियस्य विजानतः । तत्र न व्यवधातव्यं परोक्षा धर्मयापना ॥
bhīṣma uvāca । atra karmāntavacanaṁ kīrtayanti purāvidaḥ । pratyakṣāv eva dharmārthau kṣatriyasya vijānataḥ । tatra na vyavadhātavyaṁ parokṣā dharmayāpanā ॥
अधर्मो धर्म इत्येतद्यथा वृकपदं तथा । धर्माधर्मफले जातु न ददर्शेह कश्चन ॥
adharmo dharma ity etad yathā vr̥kapadaṁ tathā । dharmādharmaphale jātu na dadarśeha kaś cana ॥
बुभूषेद्बलवानेव सर्वं बलवतो वशे । श्रियं बलममात्यांश्च बलवानिह विन्दति ॥
bubhūṣed balavān eva sarvaṁ balavato vaśe । śriyaṁ balam amātyāṁś ca balavān iha vindati ॥
यो ह्यनाढ्यः स पतितस्तदुच्छिष्टं यदल्पकम् । बह्वपथ्यं बलवति न किंचित्त्रायते भयात् ॥
yo hy anāḍhyaḥ sa patitas tad ucchiṣṭaṁ yad alpakam । bahv apathyaṁ balavati na kiṁ cit trāyate bhayāt ॥
उभौ सत्याधिकारौ तौ त्रायेते महतो भयात् । अति धर्माद्बलं मन्ये बलाद्धर्मः प्रवर्तते ॥
ubhau satyādhikārau tau trāyete mahato bhayāt । ati dharmād balaṁ manye balād dharmaḥ pravartate ॥
बले प्रतिष्ठितो धर्मो धरण्यामिव जङ्गमः । धूमो वायोरिव वशं बलं धर्मोऽनुवर्तते ॥
bale pratiṣṭhito dharmo dharaṇyām iva jaṅgamaḥ । dhūmo vāyor iva vaśaṁ balaṁ dharmo ’nuvartate ॥
अनीश्वरे बलं धर्मो द्रुमं वल्लीव संश्रिता । वश्यो बलवतां धर्मः सुखं भोगवतामिव । नास्त्यसाध्यं बलवतां सर्वं बलवतां शुचि ॥
anīśvare balaṁ dharmo drumaṁ vallīva saṁśritā । vaśyo balavatāṁ dharmaḥ sukhaṁ bhogavatām iva । nāsty asādhyaṁ balavatāṁ sarvaṁ balavatāṁ śuci ॥
दुराचारः क्षीणबलः परिमाणं नियच्छति । अथ तस्मादुद्विजते सर्वो लोको वृकादिव ॥
durācāraḥ kṣīṇabalaḥ parimāṇaṁ niyacchati । atha tasmād udvijate sarvo loko vr̥kād iva ॥
अपध्वस्तो ह्यवमतो दुःखं जीवति जीवितम् । जीवितं यदवक्षिप्तं यथैव मरणं तथा ॥
apadhvasto hy avamato duḥkhaṁ jīvati jīvitam । jīvitaṁ yad avakṣiptaṁ yathaiva maraṇaṁ tathā ॥
यदेनमाहुः पापेन चारित्रेण विनिक्षतम् । स भृशं तप्यतेऽनेन वाक्शल्येन परिक्षतः ॥
yad enam āhuḥ pāpena cāritreṇa vinikṣatam । sa bhr̥śaṁ tapyate ’nena vākśalyena parikṣataḥ ॥
अत्रैतदाहुराचार्याः पापस्य परिमोक्षणे । त्रयीं विद्यां निषेवेत तथोपासीत स द्विजान् ॥
atraitad āhur ācāryāḥ pāpasya parimokṣaṇe । trayīṁ vidyāṁ niṣeveta tathopāsīta sa dvijān ॥
प्रसादयेन्मधुरया वाचाप्यथ च कर्मणा । महामनाश्चैव भवेद्विवहेच्च महाकुले ॥
prasādayen madhurayā vācāpy atha ca karmaṇā । mahāmanāś caiva bhaved vivahec ca mahākule ॥
इत्यस्मीति वदेदेवं परेषां कीर्तयन्गुणान् । जपेदुदकशीलः स्यात्पेशलो नातिजल्पनः ॥
ity asmīti vaded evaṁ pareṣāṁ kīrtayan guṇān । japed udakaśīlaḥ syāt peśalo nātijalpanaḥ ॥
ब्रह्मक्षत्रं संप्रविशेद्बहु कृत्वा सुदुष्करम् । उच्यमानोऽपि लोकेन बहु तत्तदचिन्तयन् ॥
brahmakṣatraṁ saṁpraviśed bahu kr̥tvā suduṣkaram । ucyamāno ’pi lokena bahu tat tad acintayan ॥
अपापो ह्येवमाचारः क्षिप्रं बहुमतो भवेत् । सुखं वित्तं च भुञ्जीत वृत्तेनैतेन गोपयेत् । लोके च लभते पूजां परत्र च महत्फलम् ॥
apāpo hy evam ācāraḥ kṣipraṁ bahumato bhavet । sukhaṁ vittaṁ ca bhuñjīta vr̥ttenaitena gopayet । loke ca labhate pūjāṁ paratra ca mahat phalam ॥