Who speaks here संजय saṃjaya
English for this adhyāya (section level, not verse by verse): Ganguli’s translation, approximately §65–67 Ganguli follows a different edition, so the match is approximate.
संजय उवाच । तद्धर्मशीलस्य वचो निशम्य; राज्ञः क्रुद्धस्याधिरथौ महात्मा । उवाच दुर्धर्षमदीनसत्त्वं; युधिष्ठिरं जिष्णुरनन्तवीर्यः ॥
saṁjaya uvāca । tad dharmaśīlasya vaco niśamya; rājñaḥ kruddhasyādhirathau mahātmā । uvāca durdharṣam adīnasattvaṁ; yudhiṣṭhiraṁ jiṣṇur anantavīryaḥ ॥
संशप्तकैर्युध्यमानस्य मेऽद्य; सेनाग्रयायी कुरुसैन्यस्य राजन् । आशीविषाभान्खगमान्प्रमुञ्च;न्द्रौणिः पुरस्तात्सहसा व्यतिष्ठत् ॥
saṁśaptakair yudhyamānasya me ’dya; senāgrayāyī kurusainyasya rājan । āśīviṣābhān khagamān pramuñcan; drauṇiḥ purastāt sahasā vyatiṣṭhat ॥
दृष्ट्वा रथं मेघनिभं ममेम;मम्बष्ठसेना मरणे व्यतिष्ठत् । तेषामहं पञ्च शतानि हत्वा; ततो द्रौणिमगमं पार्थिवाग्र्य ॥
dr̥ṣṭvā rathaṁ meghanibhaṁ mamemam; ambaṣṭhasenā maraṇe vyatiṣṭhat । teṣām ahaṁ pañca śatāni hatvā; tato drauṇim agamaṁ pārthivāgrya ॥
ततोऽपरान्बाणसंघाननेका;नाकर्णपूर्णायतविप्रमुक्तान् । ससर्ज शिक्षास्त्रबलप्रयत्नै;स्तथा यथा प्रावृषि कालमेघः ॥
tato ’parān bāṇasaṁghān anekān; ākarṇapūrṇāyatavipramuktān । sasarja śikṣāstrabalaprayatnais; tathā yathā prāvr̥ṣi kālameghaḥ ॥
नैवाददानं न च संदधानं; जानीमहे कतरेणास्यतीति । वामेन वा यदि वा दक्षिणेन; स द्रोणपुत्रः समरे पर्यवर्तत् ॥
naivādadānaṁ na ca saṁdadhānaṁ; jānīmahe katareṇāsyatīti । vāmena vā yadi vā dakṣiṇena; sa droṇaputraḥ samare paryavartat ॥
अविध्यन्मां पञ्चभिर्द्रोणपुत्रः; शितैः शरैः पञ्चभिर्वासुदेवम् । अहं तु तं त्रिंशता वज्रकल्पैः; समार्दयं निमिषस्यान्तरेण ॥
avidhyan māṁ pañcabhir droṇaputraḥ; śitaiḥ śaraiḥ pañcabhir vāsudevam । ahaṁ tu taṁ triṁśatā vajrakalpaiḥ; samārdayaṁ nimiṣasyāntareṇa ॥
स विक्षरन्रुधिरं सर्वगात्रै; रथानीकं सूतसूनोर्विवेश । मयाभिभूतः सैनिकानां प्रबर्हा;नसावपश्यन्रुधिरेण प्रदिग्धान् ॥
sa vikṣaran rudhiraṁ sarvagātrai; rathānīkaṁ sūtasūnor viveśa । mayābhibhūtaḥ sainikānāṁ prabarhān; asāv apaśyan rudhireṇa pradigdhān ॥
ततोऽभिभूतं युधि वीक्ष्य सैन्यं; विध्वस्तयोधं द्रुतवाजिनागम् । पञ्चाशता रथमुख्यैः समेतः; कर्णस्त्वरन्मामुपायात्प्रमाथी ॥
tato ’bhibhūtaṁ yudhi vīkṣya sainyaṁ; vidhvastayodhaṁ drutavājināgam । pañcāśatā rathamukhyaiḥ sametaḥ; karṇas tvaran mām upāyāt pramāthī ॥
तान्सूदयित्वाहमपास्य कर्णं; द्रष्टुं भवन्तं त्वरयाभियातः । सर्वे पाञ्चाला ह्युद्विजन्ते स्म कर्णा;द्गन्धाद्गावः केसरिणो यथैव ॥
tān sūdayitvāham apāsya karṇaṁ; draṣṭuṁ bhavantaṁ tvarayābhiyātaḥ । sarve pāñcālā hy udvijante sma karṇād; gandhād gāvaḥ kesariṇo yathaiva ॥
महाझषस्येव मुखं प्रपन्नाः; प्रभद्रकाः कर्णमभि द्रवन्ति । मृत्योरास्यं व्यात्तमिवान्वपद्य;न्प्रभद्रकाः कर्णमासाद्य राजन् ॥
mahājhaṣasyeva mukhaṁ prapannāḥ; prabhadrakāḥ karṇam abhi dravanti । mr̥tyor āsyaṁ vyāttam ivānvapadyan; prabhadrakāḥ karṇam āsādya rājan ॥
आयाहि पश्याद्य युयुत्समानं; मां सूतपुत्रं च वृतौ जयाय । षट्साहस्रा भारत राजपुत्राः; स्वर्गाय लोकाय रथा निमग्नाः ॥
āyāhi paśyādya yuyutsamānaṁ; māṁ sūtaputraṁ ca vr̥tau jayāya । ṣaṭsāhasrā bhārata rājaputrāḥ; svargāya lokāya rathā nimagnāḥ ॥
समेत्याहं सूतपुत्रेण संख्ये; वृत्रेण वज्रीव नरेन्द्रमुख्य । योत्स्ये भृशं भारत सूतपुत्र;मस्मिन्संग्रामे यदि वै दृश्यतेऽद्य ॥
sametyāhaṁ sūtaputreṇa saṁkhye; vr̥treṇa vajrīva narendramukhya । yotsye bhr̥śaṁ bhārata sūtaputram; asmin saṁgrāme yadi vai dr̥śyate ’dya ॥
कर्णं न चेदद्य निहन्मि राज;न्सबान्धवं युध्यमानं प्रसह्य । प्रतिश्रुत्याकुर्वतां वै गतिर्या; कष्टां गच्छेयं तामहं राजसिंह ॥
karṇaṁ na ced adya nihanmi rājan; sabāndhavaṁ yudhyamānaṁ prasahya । pratiśrutyākurvatāṁ vai gatir yā; kaṣṭāṁ gaccheyaṁ tām ahaṁ rājasiṁha ॥
आमन्त्रये त्वां ब्रूहि जयं रणे मे; पुरा भीमं धार्तराष्ट्रा ग्रसन्ते । सौतिं हनिष्यामि नरेन्द्रसिंह; सैन्यं तथा शत्रुगणांश्च सर्वान् ॥
āmantraye tvāṁ brūhi jayaṁ raṇe me; purā bhīmaṁ dhārtarāṣṭrā grasante । sautiṁ haniṣyāmi narendrasiṁha; sainyaṁ tathā śatrugaṇāṁś ca sarvān ॥