Who speaks here ब्राह्मण brāhmaṇa
English for this adhyāya (section level, not verse by verse): Ganguli’s translation, approximately §32–34 Ganguli follows a different edition, so the match is approximate.
ब्राह्मण उवाच । नाहं तथा भीरु चरामि लोके; तथा त्वं मां तर्कयसे स्वबुद्ध्या । विप्रोऽस्मि मुक्तोऽस्मि वनेचरोऽस्मि; गृहस्थधर्मा ब्रह्मचारी तथास्मि ॥
brāhmaṇa uvāca । nāhaṁ tathā bhīru carāmi loke; tathā tvaṁ māṁ tarkayase svabuddhyā । vipro ’smi mukto ’smi vanecaro ’smi; gr̥hasthadharmā brahmacārī tathāsmi ॥
नाहमस्मि यथा मां त्वं पश्यसे चक्षुषा शुभे । मया व्याप्तमिदं सर्वं यत्किंचिज्जगतीगतम् ॥
nāham asmi yathā māṁ tvaṁ paśyase cakṣuṣā śubhe । mayā vyāptam idaṁ sarvaṁ yat kiṁ cij jagatīgatam ॥
ये केचिज्जन्तवो लोके जङ्गमाः स्थावराश्च ह । तेषां मामन्तकं विद्धि दारूणामिव पावकम् ॥
ye ke cij jantavo loke jaṅgamāḥ sthāvarāś ca ha । teṣāṁ mām antakaṁ viddhi dārūṇām iva pāvakam ॥
राज्यं पृथिव्यां सर्वस्यामथ वापि त्रिविष्टपे । तथा बुद्धिरियं वेत्ति बुद्धिरेव धनं मम ॥
rājyaṁ pr̥thivyāṁ sarvasyām atha vāpi triviṣṭape । tathā buddhir iyaṁ vetti buddhir eva dhanaṁ mama ॥
एकः पन्था ब्राह्मणानां येन गच्छन्ति तद्विदः । गृहेषु वनवासेषु गुरुवासेषु भिक्षुषु । लिङ्गैर्बहुभिरव्यग्रैरेका बुद्धिरुपास्यते ॥
ekaḥ panthā brāhmaṇānāṁ yena gacchanti tadvidaḥ । gr̥heṣu vanavāseṣu guruvāseṣu bhikṣuṣu । liṅgair bahubhir avyagrair ekā buddhir upāsyate ॥
नानालिङ्गाश्रमस्थानां येषां बुद्धिः शमात्मिका । ते भावमेकमायान्ति सरितः सागरं यथा ॥
nānāliṅgāśramasthānāṁ yeṣāṁ buddhiḥ śamātmikā । te bhāvam ekam āyānti saritaḥ sāgaraṁ yathā ॥
बुद्ध्यायं गम्यते मार्गः शरीरेण न गम्यते । आद्यन्तवन्ति कर्माणि शरीरं कर्मबन्धनम् ॥
buddhyāyaṁ gamyate mārgaḥ śarīreṇa na gamyate । ādyantavanti karmāṇi śarīraṁ karmabandhanam ॥
तस्मात्ते सुभगे नास्ति परलोककृतं भयम् । मद्भावभावनिरता ममैवात्मानमेष्यसि ॥
tasmāt te subhage nāsti paralokakr̥taṁ bhayam । madbhāvabhāvaniratā mamaivātmānam eṣyasi ॥