Adhyāya 60

वैशंपायन उवाच । ब्रह्मणो मानसाः पुत्रा विदिताः षण्महर्षयः । एकादश सुताः स्थाणोः ख्याताः परममानसाः ॥

vaiśaṁpāyana uvāca । brahmaṇo mānasāḥ putrā viditāḥ ṣaṇ maharṣayaḥ । ekādaśa sutāḥ sthāṇoḥ khyātāḥ paramamānasāḥ ॥

मृगव्याधश्च शर्वश्च निरृतिश्च महायशाः । अजैकपादहिर्बुध्न्यः पिनाकी च परंतपः ॥

mr̥gavyādhaś ca śarvaś ca nirr̥tiś ca mahāyaśāḥ । ajaikapād ahirbudhnyaḥ pinākī ca paraṁtapaḥ ॥

दहनोऽथेश्वरश्चैव कपाली च महाद्युतिः । स्थाणुर्भवश्च भगवान्रुद्रा एकादश स्मृताः ॥

dahano ’theśvaraś caiva kapālī ca mahādyutiḥ । sthāṇur bhavaś ca bhagavān rudrā ekādaśa smr̥tāḥ ॥

मरीचिरङ्गिरा अत्रिः पुलस्त्यः पुलहः क्रतुः । षडेते ब्रह्मणः पुत्रा वीर्यवन्तो महर्षयः ॥

marīcir aṅgirā atriḥ pulastyaḥ pulahaḥ kratuḥ । ṣaḍ ete brahmaṇaḥ putrā vīryavanto maharṣayaḥ ॥

त्रयस्त्वङ्गिरसः पुत्रा लोके सर्वत्र विश्रुताः । बृहस्पतिरुतथ्यश्च संवर्तश्च धृतव्रताः ॥

trayas tv aṅgirasaḥ putrā loke sarvatra viśrutāḥ । br̥haspatir utathyaś ca saṁvartaś ca dhr̥tavratāḥ ॥

अत्रेस्तु बहवः पुत्राः श्रूयन्ते मनुजाधिप । सर्वे वेदविदः सिद्धाः शान्तात्मानो महर्षयः ॥

atres tu bahavaḥ putrāḥ śrūyante manujādhipa । sarve vedavidaḥ siddhāḥ śāntātmāno maharṣayaḥ ॥

राक्षसास्तु पुलस्त्यस्य वानराः किंनरास्तथा । पुलहस्य मृगाः सिंहा व्याघ्राः किंपुरुषास्तथा ॥

rākṣasās tu pulastyasya vānarāḥ kiṁnarās tathā । pulahasya mr̥gāḥ siṁhā vyāghrāḥ kiṁpuruṣās tathā ॥

क्रतोः क्रतुसमाः पुत्राः पतंगसहचारिणः । विश्रुतास्त्रिषु लोकेषु सत्यव्रतपरायणाः ॥

kratoḥ kratusamāḥ putrāḥ pataṁgasahacāriṇaḥ । viśrutās triṣu lokeṣu satyavrataparāyaṇāḥ ॥

दक्षस्त्वजायताङ्गुष्ठाद्दक्षिणाद्भगवानृषिः । ब्रह्मणः पृथिवीपाल पुत्रः पुत्रवतां वरः ॥

dakṣas tv ajāyatāṅguṣṭhād dakṣiṇād bhagavān r̥ṣiḥ । brahmaṇaḥ pr̥thivīpāla putraḥ putravatāṁ varaḥ ॥

वामादजायताङ्गुष्ठाद्भार्या तस्य महात्मनः । तस्यां पञ्चाशतं कन्याः स एवाजनयन्मुनिः ॥

vāmād ajāyatāṅguṣṭhād bhāryā tasya mahātmanaḥ । tasyāṁ pañcāśataṁ kanyāḥ sa evājanayan muniḥ ॥

ताः सर्वास्त्वनवद्याङ्ग्यः कन्याः कमललोचनाः । पुत्रिकाः स्थापयामास नष्टपुत्रः प्रजापतिः ॥

tāḥ sarvās tv anavadyāṅgyaḥ kanyāḥ kamalalocanāḥ । putrikāḥ sthāpayām āsa naṣṭaputraḥ prajāpatiḥ ॥

ददौ स दश धर्माय सप्तविंशतिमिन्दवे । दिव्येन विधिना राजन्कश्यपाय त्रयोदश ॥

dadau sa daśa dharmāya saptaviṁśatim indave । divyena vidhinā rājan kaśyapāya trayodaśa ॥

नामतो धर्मपत्न्यस्ताः कीर्त्यमाना निबोध मे । कीर्तिर्लक्ष्मीर्धृतिर्मेधा पुष्टिः श्रद्धा क्रिया तथा ॥

nāmato dharmapatnyas tāḥ kīrtyamānā nibodha me । kīrtir lakṣmīr dhr̥tir medhā puṣṭiḥ śraddhā kriyā tathā ॥

बुद्धिर्लज्जा मतिश्चैव पत्न्यो धर्मस्य ता दश । द्वाराण्येतानि धर्मस्य विहितानि स्वयंभुवा ॥

buddhir lajjā matiś caiva patnyo dharmasya tā daśa । dvārāṇy etāni dharmasya vihitāni svayaṁbhuvā ॥

सप्तविंशति सोमस्य पत्न्यो लोके परिश्रुताः । कालस्य नयने युक्ताः सोमपत्न्यः शुभव्रताः । सर्वा नक्षत्रयोगिन्यो लोकयात्राविधौ स्थिताः ॥

saptaviṁśati somasya patnyo loke pariśrutāḥ । kālasya nayane yuktāḥ somapatnyaḥ śubhavratāḥ । sarvā nakṣatrayoginyo lokayātrāvidhau sthitāḥ ॥

पितामहो मुनिर्देवस्तस्य पुत्रः प्रजापतिः । तस्याष्टौ वसवः पुत्रास्तेषां वक्ष्यामि विस्तरम् ॥

pitāmaho munir devas tasya putraḥ prajāpatiḥ । tasyāṣṭau vasavaḥ putrās teṣāṁ vakṣyāmi vistaram ॥

धरो ध्रुवश्च सोमश्च अहश्चैवानिलोऽनलः । प्रत्यूषश्च प्रभासश्च वसवोऽष्टाविति स्मृताः ॥

dharo dhruvaś ca somaś ca ahaś caivānilo ’nalaḥ । pratyūṣaś ca prabhāsaś ca vasavo ’ṣṭāv iti smr̥tāḥ ॥

धूम्रायाश्च धरः पुत्रो ब्रह्मविद्यो ध्रुवस्तथा । चन्द्रमास्तु मनस्विन्याः श्वसायाः श्वसनस्तथा ॥

dhūmrāyāś ca dharaḥ putro brahmavidyo dhruvas tathā । candramās tu manasvinyāḥ śvasāyāḥ śvasanas tathā ॥

रतायाश्चाप्यहः पुत्रः शाण्डिल्याश्च हुताशनः । प्रत्यूषश्च प्रभासश्च प्रभातायाः सुतौ स्मृतौ ॥

ratāyāś cāpy ahaḥ putraḥ śāṇḍilyāś ca hutāśanaḥ । pratyūṣaś ca prabhāsaś ca prabhātāyāḥ sutau smr̥tau ॥

धरस्य पुत्रो द्रविणो हुतहव्यवहस्तथा । ध्रुवस्य पुत्रो भगवान्कालो लोकप्रकालनः ॥

dharasya putro draviṇo hutahavyavahas tathā । dhruvasya putro bhagavān kālo lokaprakālanaḥ ॥

सोमस्य तु सुतो वर्चा वर्चस्वी येन जायते । मनोहरायाः शिशिरः प्राणोऽथ रमणस्तथा ॥

somasya tu suto varcā varcasvī yena jāyate । manoharāyāḥ śiśiraḥ prāṇo ’tha ramaṇas tathā ॥

अह्नः सुतः स्मृतो ज्योतिः श्रमः शान्तस्तथा मुनिः । अग्नेः पुत्रः कुमारस्तु श्रीमाञ्शरवणालयः ॥

ahnaḥ sutaḥ smr̥to jyotiḥ śramaḥ śāntas tathā muniḥ । agneḥ putraḥ kumāras tu śrīmāñ śaravaṇālayaḥ ॥

तस्य शाखो विशाखश्च नैगमेशश्च पृष्ठजः । कृत्तिकाभ्युपपत्तेश्च कार्त्तिकेय इति स्मृतः ॥

tasya śākho viśākhaś ca naigameśaś ca pr̥ṣṭhajaḥ । kr̥ttikābhyupapatteś ca kārttikeya iti smr̥taḥ ॥

अनिलस्य शिवा भार्या तस्याः पुत्रः पुरोजवः । अविज्ञातगतिश्चैव द्वौ पुत्रावनिलस्य तु ॥

anilasya śivā bhāryā tasyāḥ putraḥ purojavaḥ । avijñātagatiś caiva dvau putrāv anilasya tu ॥

प्रत्यूषस्य विदुः पुत्रमृषिं नाम्नाथ देवलम् । द्वौ पुत्रौ देवलस्यापि क्षमावन्तौ मनीषिणौ ॥

pratyūṣasya viduḥ putram r̥ṣiṁ nāmnātha devalam । dvau putrau devalasyāpi kṣamāvantau manīṣiṇau ॥

बृहस्पतेस्तु भगिनी वरस्त्री ब्रह्मचारिणी । योगसिद्धा जगत्सर्वमसक्तं विचरत्युत । प्रभासस्य तु भार्या सा वसूनामष्टमस्य ह ॥

br̥haspates tu bhaginī varastrī brahmacāriṇī । yogasiddhā jagat sarvam asaktaṁ vicaraty uta । prabhāsasya tu bhāryā sā vasūnām aṣṭamasya ha ॥

विश्वकर्मा महाभागो जज्ञे शिल्पप्रजापतिः । कर्ता शिल्पसहस्राणां त्रिदशानां च वर्धकिः ॥

viśvakarmā mahābhāgo jajñe śilpaprajāpatiḥ । kartā śilpasahasrāṇāṁ tridaśānāṁ ca vardhakiḥ ॥

भूषणानां च सर्वेषां कर्ता शिल्पवतां वरः । यो दिव्यानि विमानानि देवतानां चकार ह ॥

bhūṣaṇānāṁ ca sarveṣāṁ kartā śilpavatāṁ varaḥ । yo divyāni vimānāni devatānāṁ cakāra ha ॥

मनुष्याश्चोपजीवन्ति यस्य शिल्पं महात्मनः । पूजयन्ति च यं नित्यं विश्वकर्माणमव्ययम् ॥

manuṣyāś copajīvanti yasya śilpaṁ mahātmanaḥ । pūjayanti ca yaṁ nityaṁ viśvakarmāṇam avyayam ॥

स्तनं तु दक्षिणं भित्त्वा ब्रह्मणो नरविग्रहः । निःसृतो भगवान्धर्मः सर्वलोकसुखावहः ॥

stanaṁ tu dakṣiṇaṁ bhittvā brahmaṇo naravigrahaḥ । niḥsr̥to bhagavān dharmaḥ sarvalokasukhāvahaḥ ॥

त्रयस्तस्य वराः पुत्राः सर्वभूतमनोहराः । शमः कामश्च हर्षश्च तेजसा लोकधारिणः ॥

trayas tasya varāḥ putrāḥ sarvabhūtamanoharāḥ । śamaḥ kāmaś ca harṣaś ca tejasā lokadhāriṇaḥ ॥

कामस्य तु रतिर्भार्या शमस्य प्राप्तिरङ्गना । नन्दी तु भार्या हर्षस्य यत्र लोकाः प्रतिष्ठिताः ॥

kāmasya tu ratir bhāryā śamasya prāptir aṅganā । nandī tu bhāryā harṣasya yatra lokāḥ pratiṣṭhitāḥ ॥

मरीचेः कश्यपः पुत्रः कश्यपस्य सुरासुराः । जज्ञिरे नृपशार्दूल लोकानां प्रभवस्तु सः ॥

marīceḥ kaśyapaḥ putraḥ kaśyapasya surāsurāḥ । jajñire nr̥paśārdūla lokānāṁ prabhavas tu saḥ ॥

त्वाष्ट्री तु सवितुर्भार्या वडवारूपधारिणी । असूयत महाभागा सान्तरिक्षेऽश्विनावुभौ ॥

tvāṣṭrī tu savitur bhāryā vaḍavārūpadhāriṇī । asūyata mahābhāgā sāntarikṣe ’śvināv ubhau ॥

द्वादशैवादितेः पुत्राः शक्रमुख्या नराधिप । तेषामवरजो विष्णुर्यत्र लोकाः प्रतिष्ठिताः ॥

dvādaśaivāditeḥ putrāḥ śakramukhyā narādhipa । teṣām avarajo viṣṇur yatra lokāḥ pratiṣṭhitāḥ ॥

त्रयस्त्रिंशत इत्येते देवास्तेषामहं तव । अन्वयं संप्रवक्ष्यामि पक्षैश्च कुलतो गणान् ॥

trayas triṁśata ity ete devās teṣām ahaṁ tava । anvayaṁ saṁpravakṣyāmi pakṣaiś ca kulato gaṇān ॥

रुद्राणामपरः पक्षः साध्यानां मरुतां तथा । वसूनां भार्गवं विद्याद्विश्वेदेवांस्तथैव च ॥

rudrāṇām aparaḥ pakṣaḥ sādhyānāṁ marutāṁ tathā । vasūnāṁ bhārgavaṁ vidyād viśvedevāṁs tathaiva ca ॥

वैनतेयस्तु गरुडो बलवानरुणस्तथा । बृहस्पतिश्च भगवानादित्येष्वेव गण्यते ॥

vainateyas tu garuḍo balavān aruṇas tathā । br̥haspatiś ca bhagavān ādityeṣv eva gaṇyate ॥

अश्विभ्यां गुह्यकान्विद्धि सर्वौषध्यस्तथा पशून् । एष देवगणो राजन्कीर्तितस्तेऽनुपूर्वशः । यं कीर्तयित्वा मनुजः सर्वपापैः प्रमुच्यते ॥

aśvibhyāṁ guhyakān viddhi sarvauṣadhyas tathā paśūn । eṣa devagaṇo rājan kīrtitas te ’nupūrvaśaḥ । yaṁ kīrtayitvā manujaḥ sarvapāpaiḥ pramucyate ॥

ब्रह्मणो हृदयं भित्त्वा निःसृतो भगवान्भृगुः । भृगोः पुत्रः कविर्विद्वाञ्शुक्रः कविसुतो ग्रहः ॥

brahmaṇo hr̥dayaṁ bhittvā niḥsr̥to bhagavān bhr̥guḥ । bhr̥goḥ putraḥ kavir vidvāñ śukraḥ kavisuto grahaḥ ॥

त्रैलोक्यप्राणयात्रार्थे वर्षावर्षे भयाभये । स्वयंभुवा नियुक्तः सन्भुवनं परिधावति ॥

trailokyaprāṇayātrārthe varṣāvarṣe bhayābhaye । svayaṁbhuvā niyuktaḥ san bhuvanaṁ paridhāvati ॥

योगाचार्यो महाबुद्धिर्दैत्यानामभवद्गुरुः । सुराणां चापि मेधावी ब्रह्मचारी यतव्रतः ॥

yogācāryo mahābuddhir daityānām abhavad guruḥ । surāṇāṁ cāpi medhāvī brahmacārī yatavrataḥ ॥

तस्मिन्नियुक्ते विभुना योगक्षेमाय भार्गवे । अन्यमुत्पादयामास पुत्रं भृगुरनिन्दितम् ॥

tasmin niyukte vibhunā yogakṣemāya bhārgave । anyam utpādayām āsa putraṁ bhr̥gur aninditam ॥

च्यवनं दीप्ततपसं धर्मात्मानं मनीषिणम् । यः स रोषाच्च्युतो गर्भान्मातुर्मोक्षाय भारत ॥

cyavanaṁ dīptatapasaṁ dharmātmānaṁ manīṣiṇam । yaḥ sa roṣāc cyuto garbhān mātur mokṣāya bhārata ॥

आरुषी तु मनोः कन्या तस्य पत्नी मनीषिणः । और्वस्तस्यां समभवदूरुं भित्त्वा महायशाः । महातपा महातेजा बाल एव गुणैर्युतः ॥

āruṣī tu manoḥ kanyā tasya patnī manīṣiṇaḥ । aurvas tasyāṁ samabhavad ūruṁ bhittvā mahāyaśāḥ । mahātapā mahātejā bāla eva guṇair yutaḥ ॥

ऋचीकस्तस्य पुत्रस्तु जमदग्निस्ततोऽभवत् । जमदग्नेस्तु चत्वार आसन्पुत्रा महात्मनः ॥

r̥cīkas tasya putras tu jamadagnis tato ’bhavat । jamadagnes tu catvāra āsan putrā mahātmanaḥ ॥

रामस्तेषां जघन्योऽभूदजघन्यैर्गुणैर्युतः । सर्वशस्त्रास्त्रकुशलः क्षत्रियान्तकरो वशी ॥

rāmas teṣāṁ jaghanyo ’bhūd ajaghanyair guṇair yutaḥ । sarvaśastrāstrakuśalaḥ kṣatriyāntakaro vaśī ॥

और्वस्यासीत्पुत्रशतं जमदग्निपुरोगमम् । तेषां पुत्रसहस्राणि बभूवुर्भृगुविस्तरः ॥

aurvasyāsīt putraśataṁ jamadagnipurogamam । teṣāṁ putrasahasrāṇi babhūvur bhr̥guvistaraḥ ॥

द्वौ पुत्रौ ब्रह्मणस्त्वन्यौ ययोस्तिष्ठति लक्षणम् । लोके धाता विधाता च यौ स्थितौ मनुना सह ॥

dvau putrau brahmaṇas tv anyau yayos tiṣṭhati lakṣaṇam । loke dhātā vidhātā ca yau sthitau manunā saha ॥

तयोरेव स्वसा देवी लक्ष्मीः पद्मगृहा शुभा । तस्यास्तु मानसाः पुत्रास्तुरगा व्योमचारिणः ॥

tayor eva svasā devī lakṣmīḥ padmagr̥hā śubhā । tasyās tu mānasāḥ putrās turagā vyomacāriṇaḥ ॥

वरुणस्य भार्या ज्येष्ठा तु शुक्राद्देवी व्यजायत । तस्याः पुत्रं बलं विद्धि सुरां च सुरनन्दिनीम् ॥

varuṇasya bhāryā jyeṣṭhā tu śukrād devī vyajāyata । tasyāḥ putraṁ balaṁ viddhi surāṁ ca suranandinīm ॥

प्रजानामन्नकामानामन्योन्यपरिभक्षणात् । अधर्मस्तत्र संजातः सर्वभूतविनाशनः ॥

prajānām annakāmānām anyonyaparibhakṣaṇāt । adharmas tatra saṁjātaḥ sarvabhūtavināśanaḥ ॥

तस्यापि निरृतिर्भार्या नैरृता येन राक्षसाः । घोरास्तस्यास्त्रयः पुत्राः पापकर्मरताः सदा । भयो महाभयश्चैव मृत्युर्भूतान्तकस्तथा ॥

tasyāpi nirr̥tir bhāryā nairr̥tā yena rākṣasāḥ । ghorās tasyās trayaḥ putrāḥ pāpakarmaratāḥ sadā । bhayo mahābhayaś caiva mr̥tyur bhūtāntakas tathā ॥

काकीं श्येनीं च भासीं च धृतराष्ट्रीं तथा शुकीम् । ताम्रा तु सुषुवे देवी पञ्चैता लोकविश्रुताः ॥

kākīṁ śyenīṁ ca bhāsīṁ ca dhr̥tarāṣṭrīṁ tathā śukīm । tāmrā tu suṣuve devī pañcaitā lokaviśrutāḥ ॥

उलूकान्सुषुवे काकी श्येनी श्येनान्व्यजायत । भासी भासानजनयद्गृध्रांश्चैव जनाधिप ॥

ulūkān suṣuve kākī śyenī śyenān vyajāyata । bhāsī bhāsān ajanayad gr̥dhrāṁś caiva janādhipa ॥

धृतराष्ट्री तु हंसांश्च कलहंसांश्च सर्वशः । चक्रवाकांश्च भद्रं ते प्रजज्ञे सा तु भामिनी ॥

dhr̥tarāṣṭrī tu haṁsāṁś ca kalahaṁsāṁś ca sarvaśaḥ । cakravākāṁś ca bhadraṁ te prajajñe sā tu bhāminī ॥

शुकी विजज्ञे धर्मज्ञ शुकानेव मनस्विनी । कल्याणगुणसंपन्ना सर्वलक्षणपूजिता ॥

śukī vijajñe dharmajña śukān eva manasvinī । kalyāṇaguṇasaṁpannā sarvalakṣaṇapūjitā ॥

नव क्रोधवशा नारीः प्रजज्ञेऽप्यात्मसंभवाः । मृगीं च मृगमन्दां च हरिं भद्रमनामपि ॥

nava krodhavaśā nārīḥ prajajñe ’py ātmasaṁbhavāḥ । mr̥gīṁ ca mr̥gamandāṁ ca hariṁ bhadramanām api ॥

मातङ्गीमथ शार्दूलीं श्वेतां सुरभिमेव च । सर्वलक्षणसंपन्नां सुरसां च यशस्विनीम् ॥

mātaṅgīm atha śārdūlīṁ śvetāṁ surabhim eva ca । sarvalakṣaṇasaṁpannāṁ surasāṁ ca yaśasvinīm ॥

अपत्यं तु मृगाः सर्वे मृग्या नरवरात्मज । ऋक्षाश्च मृगमन्दायाः सृमराश्चमरा अपि ॥

apatyaṁ tu mr̥gāḥ sarve mr̥gyā naravarātmaja । r̥kṣāś ca mr̥gamandāyāḥ sr̥marāś camarā api ॥

ततस्त्वैरावतं नागं जज्ञे भद्रमना सुतम् । ऐरावतः सुतस्तस्या देवनागो महागजः ॥

tatas tv airāvataṁ nāgaṁ jajñe bhadramanā sutam । airāvataḥ sutas tasyā devanāgo mahāgajaḥ ॥

हर्याश्च हरयोऽपत्यं वानराश्च तरस्विनः । गोलाङ्गूलांश्च भद्रं ते हर्याः पुत्रान्प्रचक्षते ॥

haryāś ca harayo ’patyaṁ vānarāś ca tarasvinaḥ । golāṅgūlāṁś ca bhadraṁ te haryāḥ putrān pracakṣate ॥

प्रजज्ञे त्वथ शार्दूली सिंहान्व्याघ्रांश्च भारत । द्वीपिनश्च महाभाग सर्वानेव न संशयः ॥

prajajñe tv atha śārdūlī siṁhān vyāghrāṁś ca bhārata । dvīpinaś ca mahābhāga sarvān eva na saṁśayaḥ ॥

मातङ्ग्यास्त्वथ मातङ्गा अपत्यानि नराधिप । दिशागजं तु श्वेताख्यं श्वेताजनयदाशुगम् ॥

mātaṅgyās tv atha mātaṅgā apatyāni narādhipa । diśāgajaṁ tu śvetākhyaṁ śvetājanayad āśugam ॥

तथा दुहितरौ राजन्सुरभिर्वै व्यजायत । रोहिणीं चैव भद्रं ते गन्धर्वीं च यशस्विनीम् । रोहिण्यां जज्ञिरे गावो गन्धर्व्यां वाजिनः सुताः ॥

tathā duhitarau rājan surabhir vai vyajāyata । rohiṇīṁ caiva bhadraṁ te gandharvīṁ ca yaśasvinīm । rohiṇyāṁ jajñire gāvo gandharvyāṁ vājinaḥ sutāḥ ॥

सुरसाजनयन्नागान्राजन्कद्रूश्च पन्नगान् । सप्त पिण्डफलान्वृक्षाननलापि व्यजायत । अनलायाः शुकी पुत्री कद्र्वास्तु सुरसा सुता ॥

surasājanayan nāgān rājan kadrūś ca pannagān । sapta piṇḍaphalān vr̥kṣān analāpi vyajāyata । analāyāḥ śukī putrī kadrvās tu surasā sutā ॥

अरुणस्य भार्या श्येनी तु वीर्यवन्तौ महाबलौ । संपातिं जनयामास तथैव च जटायुषम् । द्वौ पुत्रौ विनतायास्तु विख्यातौ गरुडारुणौ ॥

aruṇasya bhāryā śyenī tu vīryavantau mahābalau । saṁpātiṁ janayām āsa tathaiva ca jaṭāyuṣam । dvau putrau vinatāyās tu vikhyātau garuḍāruṇau ॥

इत्येष सर्वभूतानां महतां मनुजाधिप । प्रभवः कीर्तितः सम्यङ्मया मतिमतां वर ॥

ity eṣa sarvabhūtānāṁ mahatāṁ manujādhipa । prabhavaḥ kīrtitaḥ samyaṅ mayā matimatāṁ vara ॥

यं श्रुत्वा पुरुषः सम्यक्पूतो भवति पाप्मनः । सर्वज्ञतां च लभते गतिमग्र्यां च विन्दति ॥

yaṁ śrutvā puruṣaḥ samyak pūto bhavati pāpmanaḥ । sarvajñatāṁ ca labhate gatim agryāṁ ca vindati ॥