Adhyāya 3

सूत उवाच । जनमेजयः पारिक्षितः सह भ्रातृभिः कुरुक्षेत्रे दीर्घसत्रमुपास्ते । तस्य भ्रातरस्त्रयः श्रुतसेन उग्रसेनो भीमसेन इति ॥

sūta uvāca । janamejayaḥ pārikṣitaḥ saha bhrātr̥bhiḥ kurukṣetre dīrghasatram upāste । tasya bhrātaras trayaḥ śrutasena ugraseno bhīmasena iti ॥

तेषु तत्सत्रमुपासीनेषु तत्र श्वाभ्यागच्छत्सारमेयः । स जनमेजयस्य भ्रातृभिरभिहतो रोरूयमाणो मातुः समीपमुपागच्छत् ॥

teṣu tat satram upāsīneṣu tatra śvābhyāgacchat sārameyaḥ । sa janamejayasya bhrātr̥bhir abhihato rorūyamāṇo mātuḥ samīpam upāgacchat ॥

तं माता रोरूयमाणमुवाच । किं रोदिषि । केनास्यभिहत इति ॥

taṁ mātā rorūyamāṇam uvāca । kiṁ rodiṣi । kenāsy abhihata iti ॥

स एवमुक्तो मातरं प्रत्युवाच । जनमेजयस्य भ्रातृभिरभिहतोऽस्मीति ॥

sa evam ukto mātaraṁ pratyuvāca । janamejayasya bhrātr̥bhir abhihato ’smīti ॥

तं माता प्रत्युवाच । व्यक्तं त्वया तत्रापराद्धं येनास्यभिहत इति ॥

taṁ mātā pratyuvāca । vyaktaṁ tvayā tatrāparāddhaṁ yenāsy abhihata iti ॥

स तां पुनरुवाच । नापराध्यामि किंचित् । नावेक्षे हवींषि नावलिह इति ॥

sa tāṁ punar uvāca । nāparādhyāmi kiṁ cit । nāvekṣe havīṁṣi nāvaliha iti ॥

तच्छ्रुत्वा तस्य माता सरमा पुत्रशोकार्ता तत्सत्रमुपागच्छद्यत्र स जनमेजयः सह भ्रातृभिर्दीर्घसत्रमुपास्ते ॥

tac chrutvā tasya mātā saramā putraśokārtā tat satram upāgacchad yatra sa janamejayaḥ saha bhrātr̥bhir dīrghasatram upāste ॥

स तया क्रुद्धया तत्रोक्तः । अयं मे पुत्रो न किंचिदपराध्यति । किमर्थमभिहत इति । यस्माच्चायमभिहतोऽनपकारी तस्माददृष्टं त्वां भयमागमिष्यतीति ॥

sa tayā kruddhayā tatroktaḥ । ayaṁ me putro na kiṁ cid aparādhyati । kimartham abhihata iti । yasmāc cāyam abhihato ’napakārī tasmād adr̥ṣṭaṁ tvāṁ bhayam āgamiṣyatīti ॥

स जनमेजय एवमुक्तो देवशुन्या सरमया दृढं संभ्रान्तो विषण्णश्चासीत् ॥

sa janamejaya evam ukto devaśunyā saramayā dr̥ḍhaṁ saṁbhrānto viṣaṇṇaś cāsīt ॥

स तस्मिन्सत्रे समाप्ते हास्तिनपुरं प्रत्येत्य पुरोहितमनुरूपमन्विच्छमानः परं यत्नमकरोद्यो मे पापकृत्यां शमयेदिति ॥

sa tasmin satre samāpte hāstinapuraṁ pratyetya purohitam anurūpam anvicchamānaḥ paraṁ yatnam akarod yo me pāpakr̥tyāṁ śamayed iti ॥

स कदाचिन्मृगयां यातः पारिक्षितो जनमेजयः कस्मिंश्चित्स्वविषयोद्देशे आश्रममपश्यत् ॥

sa kadā cin mr̥gayāṁ yātaḥ pārikṣito janamejayaḥ kasmiṁś cit svaviṣayoddeśe āśramam apaśyat ॥

तत्र कश्चिदृषिरासां चक्रे श्रुतश्रवा नाम । तस्याभिमतः पुत्र आस्ते सोमश्रवा नाम ॥

tatra kaś cid r̥ṣir āsāṁ cakre śrutaśravā nāma । tasyābhimataḥ putra āste somaśravā nāma ॥

तस्य तं पुत्रमभिगम्य जनमेजयः पारिक्षितः पौरोहित्याय वव्रे ॥

tasya taṁ putram abhigamya janamejayaḥ pārikṣitaḥ paurohityāya vavre ॥

स नमस्कृत्य तमृषिमुवाच । भगवन्नयं तव पुत्रो मम पुरोहितोऽस्त्विति ॥

sa namaskr̥tya tam r̥ṣim uvāca । bhagavann ayaṁ tava putro mama purohito ’stv iti ॥

स एवमुक्तः प्रत्युवाच । भो जनमेजय पुत्रोऽयं मम सर्प्यां जातः । महातपस्वी स्वाध्यायसंपन्नो मत्तपोवीर्यसंभृतो मच्छुक्रं पीतवत्यास्तस्याः कुक्षौ संवृद्धः । समर्थोऽयं भवतः सर्वाः पापकृत्याः शमयितुमन्तरेण महादेवकृत्याम् । अस्य त्वेकमुपांशुव्रतम् । यदेनं कश्चिद्ब्राह्मणः कंचिदर्थमभियाचेत्तं तस्मै दद्यादयम् । यद्येतदुत्सहसे ततो नयस्वैनमिति ॥

sa evam uktaḥ pratyuvāca । bho janamejaya putro ’yaṁ mama sarpyāṁ jātaḥ । mahātapasvī svādhyāyasaṁpanno mattapovīryasaṁbhr̥to macchukraṁ pītavatyās tasyāḥ kukṣau saṁvr̥ddhaḥ । samartho ’yaṁ bhavataḥ sarvāḥ pāpakr̥tyāḥ śamayitum antareṇa mahādevakr̥tyām । asya tv ekam upāṁśuvratam । yad enaṁ kaś cid brāhmaṇaḥ kaṁ cid artham abhiyācet taṁ tasmai dadyād ayam । yady etad utsahase tato nayasvainam iti ॥

तेनैवमुक्तो जनमेजयस्तं प्रत्युवाच । भगवंस्तथा भविष्यतीति ॥

tenaivam ukto janamejayas taṁ pratyuvāca । bhagavaṁs tathā bhaviṣyatīti ॥

स तं पुरोहितमुपादायोपावृत्तो भ्रातॄनुवाच । मयायं वृत उपाध्यायः । यदयं ब्रूयात्तत्कार्यमविचारयद्भिरिति ॥

sa taṁ purohitam upādāyopāvr̥tto bhrātr̥̄n uvāca । mayāyaṁ vr̥ta upādhyāyaḥ । yad ayaṁ brūyāt tat kāryam avicārayadbhir iti ॥

तेनैवमुक्ता भ्रातरस्तस्य तथा चक्रुः । स तथा भ्रातॄन्संदिश्य तक्षशिलां प्रत्यभिप्रतस्थे । तं च देशं वशे स्थापयामास ॥

tenaivam uktā bhrātaras tasya tathā cakruḥ । sa tathā bhrātr̥̄n saṁdiśya takṣaśilāṁ pratyabhipratasthe । taṁ ca deśaṁ vaśe sthāpayām āsa ॥

एतस्मिन्नन्तरे कश्चिदृषिर्धौम्यो नामायोदः । तस्य शिष्यास्त्रयो बभूवुरुपमन्युरारुणिर्वेदश्चेति ॥

etasminn antare kaś cid r̥ṣir dhaumyo nāmāyodaḥ । tasya śiṣyās trayo babhūvur upamanyur āruṇir vedaś ceti ॥

स एकं शिष्यमारुणिं पाञ्चाल्यं प्रेषयामास । गच्छ केदारखण्डं बधानेति ॥

sa ekaṁ śiṣyam āruṇiṁ pāñcālyaṁ preṣayām āsa । gaccha kedārakhaṇḍaṁ badhāneti ॥

स उपाध्यायेन संदिष्ट आरुणिः पाञ्चाल्यस्तत्र गत्वा तत्केदारखण्डं बद्धुं नाशक्नोत् ॥

sa upādhyāyena saṁdiṣṭa āruṇiḥ pāñcālyas tatra gatvā tat kedārakhaṇḍaṁ baddhuṁ nāśaknot ॥

स क्लिश्यमानोऽपश्यदुपायम् । भवत्वेवं करिष्यामीति ॥

sa kliśyamāno ’paśyad upāyam । bhavatv evaṁ kariṣyāmīti ॥

स तत्र संविवेश केदारखण्डे । शयाने तस्मिंस्तदुदकं तस्थौ ॥

sa tatra saṁviveśa kedārakhaṇḍe । śayāne tasmiṁs tad udakaṁ tasthau ॥

ततः कदाचिदुपाध्याय आयोदो धौम्यः शिष्यानपृच्छत् । क्व आरुणिः पाञ्चाल्यो गत इति ॥

tataḥ kadā cid upādhyāya āyodo dhaumyaḥ śiṣyān apr̥cchat । kva āruṇiḥ pāñcālyo gata iti ॥

ते प्रत्यूचुः । भगवतैव प्रेषितो गच्छ केदारखण्डं बधानेति ॥

te pratyūcuḥ । bhagavataiva preṣito gaccha kedārakhaṇḍaṁ badhāneti ॥

स एवमुक्तस्ताञ्शिष्यान्प्रत्युवाच । तस्मात्सर्वे तत्र गच्छामो यत्र स इति ॥

sa evam uktas tāñ śiṣyān pratyuvāca । tasmāt sarve tatra gacchāmo yatra sa iti ॥

स तत्र गत्वा तस्याह्वानाय शब्दं चकार । भो आरुणे पाञ्चाल्य क्वासि । वत्सैहीति ॥

sa tatra gatvā tasyāhvānāya śabdaṁ cakāra । bho āruṇe pāñcālya kvāsi । vatsaihīti ॥

स तच्छ्रुत्वा आरुणिरुपाध्यायवाक्यं तस्मात्केदारखण्डात्सहसोत्थाय तमुपाध्यायमुपतस्थे । प्रोवाच चैनम् । अयमस्म्यत्र केदारखण्डे निःसरमाणमुदकमवारणीयं संरोद्धुं संविष्टो भगवच्छब्दं श्रुत्वैव सहसा विदार्य केदारखण्डं भवन्तमुपस्थितः । तदभिवादये भगवन्तम् । आज्ञापयतु भवान् । किं करवाणीति ॥

sa tac chrutvā āruṇir upādhyāyavākyaṁ tasmāt kedārakhaṇḍāt sahasotthāya tam upādhyāyam upatasthe । provāca cainam । ayam asmy atra kedārakhaṇḍe niḥsaramāṇam udakam avāraṇīyaṁ saṁroddhuṁ saṁviṣṭo bhagavacchabdaṁ śrutvaiva sahasā vidārya kedārakhaṇḍaṁ bhavantam upasthitaḥ । tad abhivādaye bhagavantam । ājñāpayatu bhavān । kiṁ karavāṇīti ॥

तमुपाध्यायोऽब्रवीत् । यस्माद्भवान्केदारखण्डमवदार्योत्थितस्तस्माद्भवानुद्दालक एव नाम्ना भविष्यतीति ॥

tam upādhyāyo ’bravīt । yasmād bhavān kedārakhaṇḍam avadāryotthitas tasmād bhavān uddālaka eva nāmnā bhaviṣyatīti ॥

स उपाध्यायेनानुगृहीतः । यस्मात्त्वया मद्वचोऽनुष्ठितं तस्माच्छ्रेयोऽवाप्स्यसीति । सर्वे च ते वेदाः प्रतिभास्यन्ति सर्वाणि च धर्मशास्त्राणीति ॥

sa upādhyāyenānugr̥hītaḥ । yasmāt tvayā madvaco ’nuṣṭhitaṁ tasmāc chreyo ’vāpsyasīti । sarve ca te vedāḥ pratibhāsyanti sarvāṇi ca dharmaśāstrāṇīti ॥

स एवमुक्त उपाध्यायेनेष्टं देशं जगाम ॥

sa evam ukta upādhyāyeneṣṭaṁ deśaṁ jagāma ॥

अथापरः शिष्यस्तस्यैवायोदस्य धौम्यस्योपमन्युर्नाम ॥

athāparaḥ śiṣyas tasyaivāyodasya dhaumyasyopamanyur nāma ॥

तमुपाध्यायः प्रेषयामास । वत्सोपमन्यो गा रक्षस्वेति ॥

tam upādhyāyaḥ preṣayām āsa । vatsopamanyo gā rakṣasveti ॥

स उपाध्यायवचनादरक्षद्गाः । स चाहनि गा रक्षित्वा दिवसक्षयेऽभ्यागम्योपाध्यायस्याग्रतः स्थित्वा नमश्चक्रे ॥

sa upādhyāyavacanād arakṣad gāḥ । sa cāhani gā rakṣitvā divasakṣaye ’bhyāgamyopādhyāyasyāgrataḥ sthitvā namaścakre ॥

तमुपाध्यायः पीवानमपश्यत् । उवाच चैनम् । वत्सोपमन्यो केन वृत्तिं कल्पयसि । पीवानसि दृढमिति ॥

tam upādhyāyaḥ pīvānam apaśyat । uvāca cainam । vatsopamanyo kena vr̥ttiṁ kalpayasi । pīvān asi dr̥ḍham iti ॥

स उपाध्यायं प्रत्युवाच । भैक्षेण वृत्तिं कल्पयामीति ॥

sa upādhyāyaṁ pratyuvāca । bhaikṣeṇa vr̥ttiṁ kalpayāmīti ॥

तमुपाध्यायः प्रत्युवाच । ममानिवेद्य भैक्षं नोपयोक्तव्यमिति ॥

tam upādhyāyaḥ pratyuvāca । mamānivedya bhaikṣaṁ nopayoktavyam iti ॥

स तथेत्युक्त्वा पुनररक्षद्गाः । रक्षित्वा चागम्य तथैवोपाध्यायस्याग्रतः स्थित्वा नमश्चक्रे ॥

sa tathety uktvā punar arakṣad gāḥ । rakṣitvā cāgamya tathaivopādhyāyasyāgrataḥ sthitvā namaścakre ॥

तमुपाध्यायस्तथापि पीवानमेव दृष्ट्वोवाच । वत्सोपमन्यो सर्वमशेषतस्ते भैक्षं गृह्णामि । केनेदानीं वृत्तिं कल्पयसीति ॥

tam upādhyāyas tathāpi pīvānam eva dr̥ṣṭvovāca । vatsopamanyo sarvam aśeṣatas te bhaikṣaṁ gr̥hṇāmi । kenedānīṁ vr̥ttiṁ kalpayasīti ॥

स एवमुक्त उपाध्यायेन प्रत्युवाच । भगवते निवेद्य पूर्वमपरं चरामि । तेन वृत्तिं कल्पयामीति ॥

sa evam ukta upādhyāyena pratyuvāca । bhagavate nivedya pūrvam aparaṁ carāmi । tena vr̥ttiṁ kalpayāmīti ॥

तमुपाध्यायः प्रत्युवाच । नैषा न्याय्या गुरुवृत्तिः । अन्येषामपि वृत्त्युपरोधं करोष्येवं वर्तमानः । लुब्धोऽसीति ॥

tam upādhyāyaḥ pratyuvāca । naiṣā nyāyyā guruvr̥ttiḥ । anyeṣām api vr̥ttyuparodhaṁ karoṣy evaṁ vartamānaḥ । lubdho ’sīti ॥

स तथेत्युक्त्वा गा अरक्षत् । रक्षित्वा च पुनरुपाध्यायगृहमागम्योपाध्यायस्याग्रतः स्थित्वा नमश्चक्रे ॥

sa tathety uktvā gā arakṣat । rakṣitvā ca punar upādhyāyagr̥ham āgamyopādhyāyasyāgrataḥ sthitvā namaścakre ॥

तमुपाध्यायस्तथापि पीवानमेव दृष्ट्वा पुनरुवाच । अहं ते सर्वं भैक्षं गृह्णामि न चान्यच्चरसि । पीवानसि । केन वृत्तिं कल्पयसीति ॥

tam upādhyāyas tathāpi pīvānam eva dr̥ṣṭvā punar uvāca । ahaṁ te sarvaṁ bhaikṣaṁ gr̥hṇāmi na cānyac carasi । pīvān asi । kena vr̥ttiṁ kalpayasīti ॥

स उपाध्यायं प्रत्युवाच । भो एतासां गवां पयसा वृत्तिं कल्पयामीति ॥

sa upādhyāyaṁ pratyuvāca । bho etāsāṁ gavāṁ payasā vr̥ttiṁ kalpayāmīti ॥

तमुपाध्यायः प्रत्युवाच । नैतन्न्याय्यं पय उपयोक्तुं भवतो मयाननुज्ञातमिति ॥

tam upādhyāyaḥ pratyuvāca । naitan nyāyyaṁ paya upayoktuṁ bhavato mayānanujñātam iti ॥

स तथेति प्रतिज्ञाय गा रक्षित्वा पुनरुपाध्यायगृहानेत्य गुरोरग्रतः स्थित्वा नमश्चक्रे ॥

sa tatheti pratijñāya gā rakṣitvā punar upādhyāyagr̥hān etya guror agrataḥ sthitvā namaścakre ॥

तमुपाध्यायः पीवानमेवापश्यत् । उवाच चैनम् । भैक्षं नाश्नासि न चान्यच्चरसि । पयो न पिबसि । पीवानसि । केन वृत्तिं कल्पयसीति ॥

tam upādhyāyaḥ pīvānam evāpaśyat । uvāca cainam । bhaikṣaṁ nāśnāsi na cānyac carasi । payo na pibasi । pīvān asi । kena vr̥ttiṁ kalpayasīti ॥

स एवमुक्त उपाध्यायं प्रत्युवाच । भोः फेनं पिबामि यमिमे वत्सा मातॄणां स्तनं पिबन्त उद्गिरन्तीति ॥

sa evam ukta upādhyāyaṁ pratyuvāca । bhoḥ phenaṁ pibāmi yam ime vatsā mātr̥̄ṇāṁ stanaṁ pibanta udgirantīti ॥

तमुपाध्यायः प्रत्युवाच । एते त्वदनुकम्पया गुणवन्तो वत्साः प्रभूततरं फेनमुद्गिरन्ति । तदेवमपि वत्सानां वृत्त्युपरोधं करोष्येवं वर्तमानः । फेनमपि भवान्न पातुमर्हतीति ॥

tam upādhyāyaḥ pratyuvāca । ete tvadanukampayā guṇavanto vatsāḥ prabhūtataraṁ phenam udgiranti । tad evam api vatsānāṁ vr̥ttyuparodhaṁ karoṣy evaṁ vartamānaḥ । phenam api bhavān na pātum arhatīti ॥

स तथेति प्रतिज्ञाय निराहारस्ता गा अरक्षत् । तथा प्रतिषिद्धो भैक्षं नाश्नाति न चान्यच्चरति । पयो न पिबति । फेनं नोपयुङ्क्ते ॥

sa tatheti pratijñāya nirāhāras tā gā arakṣat । tathā pratiṣiddho bhaikṣaṁ nāśnāti na cānyac carati । payo na pibati । phenaṁ nopayuṅkte ॥

स कदाचिदरण्ये क्षुधार्तोऽर्कपत्राण्यभक्षयत् ॥

sa kadā cid araṇye kṣudhārto ’rkapatrāṇy abhakṣayat ॥

स तैरर्कपत्रैर्भक्षितैः क्षारकटूष्णविपाकिभिश्चक्षुष्युपहतोऽन्धोऽभवत् । सोऽन्धोऽपि चङ्क्रम्यमाणः कूपेऽपतत् ॥

sa tair arkapatrair bhakṣitaiḥ kṣārakaṭūṣṇavipākibhiś cakṣuṣy upahato ’ndho ’bhavat । so ’ndho ’pi caṅkramyamāṇaḥ kūpe ’patat ॥

अथ तस्मिन्ननागच्छत्युपाध्यायः शिष्यानवोचत् । मयोपमन्युः सर्वतः प्रतिषिद्धः । स नियतं कुपितः । ततो नागच्छति चिरगतश्चेति ॥

atha tasminn anāgacchaty upādhyāyaḥ śiṣyān avocat । mayopamanyuḥ sarvataḥ pratiṣiddhaḥ । sa niyataṁ kupitaḥ । tato nāgacchati ciragataś ceti ॥

स एवमुक्त्वा गत्वारण्यमुपमन्योराह्वानं चक्रे । भो उपमन्यो क्वासि । वत्सैहीति ॥

sa evam uktvā gatvāraṇyam upamanyor āhvānaṁ cakre । bho upamanyo kvāsi । vatsaihīti ॥

स तदाह्वानमुपाध्यायाच्छ्रुत्वा प्रत्युवाचोच्चैः । अयमस्मि भो उपाध्याय कूपे पतित इति ॥

sa tadāhvānam upādhyāyāc chrutvā pratyuvācoccaiḥ । ayam asmi bho upādhyāya kūpe patita iti ॥

तमुपाध्यायः प्रत्युवाच । कथमसि कूपे पतित इति ॥

tam upādhyāyaḥ pratyuvāca । katham asi kūpe patita iti ॥

स तं प्रत्युवाच । अर्कपत्राणि भक्षयित्वान्धीभूतोऽस्मि । अतः कूपे पतित इति ॥

sa taṁ pratyuvāca । arkapatrāṇi bhakṣayitvāndhībhūto ’smi । ataḥ kūpe patita iti ॥

तमुपाध्यायः प्रत्युवाच । अश्विनौ स्तुहि । तौ त्वां चक्षुष्मन्तं करिष्यतो देवभिषजाविति ॥

tam upādhyāyaḥ pratyuvāca । aśvinau stuhi । tau tvāṁ cakṣuṣmantaṁ kariṣyato devabhiṣajāv iti ॥

स एवमुक्त उपाध्यायेन स्तोतुं प्रचक्रमे देवावश्विनौ वाग्भिरृग्भिः ॥

sa evam ukta upādhyāyena stotuṁ pracakrame devāv aśvinau vāgbhir r̥gbhiḥ ॥

प्र पूर्वगौ पूर्वजौ चित्रभानू; गिरा वा शंसामि तपनावनन्तौ । दिव्यौ सुपर्णौ विरजौ विमाना;वधिक्षियन्तौ भुवनानि विश्वा ॥

pra pūrvagau pūrvajau citrabhānū; girā vā śaṁsāmi tapanāv anantau । divyau suparṇau virajau vimānāv; adhikṣiyantau bhuvanāni viśvā ॥

हिरण्मयौ शकुनी सांपरायौ; नासत्यदस्रौ सुनसौ वैजयन्तौ । शुक्रं वयन्तौ तरसा सुवेमा;वभि व्ययन्तावसितं विवस्वत् ॥

hiraṇmayau śakunī sāṁparāyau; nāsatyadasrau sunasau vaijayantau । śukraṁ vayantau tarasā suvemāv; abhi vyayantāv asitaṁ vivasvat ॥

ग्रस्तां सुपर्णस्य बलेन वर्तिका;ममुञ्चतामश्विनौ सौभगाय । तावत्सुवृत्तावनमन्त मायया; सत्तमा गा अरुणा उदावहन् ॥

grastāṁ suparṇasya balena vartikām; amuñcatām aśvinau saubhagāya । tāvat suvr̥ttāv anamanta māyayā; sattamā gā aruṇā udāvahan ॥

षष्टिश्च गावस्त्रिशताश्च धेनव; एकं वत्सं सुवते तं दुहन्ति । नानागोष्ठा विहिता एकदोहना;स्तावश्विनौ दुहतो घर्ममुक्थ्यम् ॥

ṣaṣṭiś ca gāvas triśatāś ca dhenava; ekaṁ vatsaṁ suvate taṁ duhanti । nānāgoṣṭhā vihitā ekadohanās; tāv aśvinau duhato gharmam ukthyam ॥

एकां नाभिं सप्तशता अराः श्रिताः; प्रधिष्वन्या विंशतिरर्पिता अराः । अनेमि चक्रं परिवर्ततेऽजरं; मायाश्विनौ समनक्ति चर्षणी ॥

ekāṁ nābhiṁ saptaśatā arāḥ śritāḥ; pradhiṣv anyā viṁśatir arpitā arāḥ । anemi cakraṁ parivartate ’jaraṁ; māyāśvinau samanakti carṣaṇī ॥

एकं चक्रं वर्तते द्वादशारं प्रधि;षण्णाभिमेकाक्षममृतस्य धारणम् । यस्मिन्देवा अधि विश्वे विषक्ता;स्तावश्विनौ मुञ्चतो मा विषीदतम् ॥

ekaṁ cakraṁ vartate dvādaśāraṁ pradhi;ṣaṇṇābhim ekākṣam amr̥tasya dhāraṇam । yasmin devā adhi viśve viṣaktās; tāv aśvinau muñcato mā viṣīdatam ॥

अश्विनाविन्द्रममृतं वृत्तभूयौ; तिरोधत्तामश्विनौ दासपत्नी । भित्त्वा गिरिमश्विनौ गामुदाचरन्तौ; तद्वृष्टमह्ना प्रथिता वलस्य ॥

aśvināv indram amr̥taṁ vr̥ttabhūyau; tirodhattām aśvinau dāsapatnī । bhittvā girim aśvinau gām udācarantau; tadvr̥ṣṭamahnā prathitā valasya ॥

युवां दिशो जनयथो दशाग्रे; समानं मूर्ध्नि रथया वियन्ति । तासां यातमृषयोऽनुप्रयान्ति; देवा मनुष्याः क्षितिमाचरन्ति ॥

yuvāṁ diśo janayatho daśāgre; samānaṁ mūrdhni rathayā viyanti । tāsāṁ yātam r̥ṣayo ’nuprayānti; devā manuṣyāḥ kṣitim ācaranti ॥

युवां वर्णान्विकुरुथो विश्वरूपां;स्तेऽधिक्षियन्ति भुवनानि विश्वा । ते भानवोऽप्यनुसृताश्चरन्ति; देवा मनुष्याः क्षितिमाचरन्ति ॥

yuvāṁ varṇān vikurutho viśvarūpāṁs; te ’dhikṣiyanti bhuvanāni viśvā । te bhānavo ’py anusr̥tāś caranti; devā manuṣyāḥ kṣitim ācaranti ॥

तौ नासत्यावश्विनावामहे वां; स्रजं च यां बिभृथः पुष्करस्य । तौ नासत्यावमृतावृतावृधा;वृते देवास्तत्प्रपदेन सूते ॥

tau nāsatyāv aśvināv āmahe vāṁ; srajaṁ ca yāṁ bibhr̥thaḥ puṣkarasya । tau nāsatyāv amr̥tāvr̥tāvr̥dhāv; r̥te devās tat prapadena sūte ॥

मुखेन गर्भं लभतां युवानौ; गतासुरेतत्प्रपदेन सूते । सद्यो जातो मातरमत्ति गर्भ;स्तावश्विनौ मुञ्चथो जीवसे गाः ॥

mukhena garbhaṁ labhatāṁ yuvānau; gatāsur etat prapadena sūte । sadyo jāto mātaram atti garbhas; tāv aśvinau muñcatho jīvase gāḥ ॥

एवं तेनाभिष्टुतावश्विनावाजग्मतुः । आहतुश्चैनम् । प्रीतौ स्वः । एष तेऽपूपः । अशानैनमिति ॥

evaṁ tenābhiṣṭutāv aśvināv ājagmatuḥ । āhatuś cainam । prītau svaḥ । eṣa te ’pūpaḥ । aśānainam iti ॥

स एवमुक्तः प्रत्युवाच । नानृतमूचतुर्भवन्तौ । न त्वहमेतमपूपमुपयोक्तुमुत्सहे अनिवेद्य गुरव इति ॥

sa evam uktaḥ pratyuvāca । nānr̥tam ūcatur bhavantau । na tv aham etam apūpam upayoktum utsahe anivedya gurava iti ॥

ततस्तमश्विनावूचतुः । आवाभ्यां पुरस्ताद्भवत उपाध्यायेनैवमेवाभिष्टुताभ्यामपूपः प्रीताभ्यां दत्तः । उपयुक्तश्च स तेनानिवेद्य गुरवे । त्वमपि तथैव कुरुष्व यथा कृतमुपाध्यायेनेति ॥

tatas tam aśvināv ūcatuḥ । āvābhyāṁ purastād bhavata upādhyāyenaivam evābhiṣṭutābhyām apūpaḥ prītābhyāṁ dattaḥ । upayuktaś ca sa tenānivedya gurave । tvam api tathaiva kuruṣva yathā kr̥tam upādhyāyeneti ॥

स एवमुक्तः पुनरेव प्रत्युवाचैतौ । प्रत्यनुनये भवन्तावश्विनौ । नोत्सहेऽहमनिवेद्योपाध्यायायोपयोक्तुमिति ॥

sa evam uktaḥ punar eva pratyuvācaitau । pratyanunaye bhavantāv aśvinau । notsahe ’ham anivedyopādhyāyāyopayoktum iti ॥

तमश्विनावाहतुः । प्रीतौ स्वस्तवानया गुरुवृत्त्या । उपाध्यायस्य ते कार्ष्णायसा दन्ताः । भवतो हिरण्मया भविष्यन्ति । चक्षुष्मांश्च भविष्यसि । श्रेयश्चावाप्स्यसीति ॥

tam aśvināv āhatuḥ । prītau svas tavānayā guruvr̥ttyā । upādhyāyasya te kārṣṇāyasā dantāḥ । bhavato hiraṇmayā bhaviṣyanti । cakṣuṣmāṁś ca bhaviṣyasi । śreyaś cāvāpsyasīti ॥

स एवमुक्तोऽश्विभ्यां लब्धचक्षुरुपाध्यायसकाशमागम्योपाध्यायमभिवाद्याचचक्षे । स चास्य प्रीतिमानभूत् ॥

sa evam ukto ’śvibhyāṁ labdhacakṣur upādhyāyasakāśam āgamyopādhyāyam abhivādyācacakṣe । sa cāsya prītimān abhūt ॥

आह चैनम् । यथाश्विनावाहतुस्तथा त्वं श्रेयोऽवाप्स्यसीति । सर्वे च ते वेदाः प्रतिभास्यन्तीति ॥

āha cainam । yathāśvināv āhatus tathā tvaṁ śreyo ’vāpsyasīti । sarve ca te vedāḥ pratibhāsyantīti ॥

एषा तस्यापि परीक्षोपमन्योः ॥

eṣā tasyāpi parīkṣopamanyoḥ ॥

अथापरः शिष्यस्तस्यैवायोदस्य धौम्यस्य वेदो नाम ॥

athāparaḥ śiṣyas tasyaivāyodasya dhaumyasya vedo nāma ॥

तमुपाध्यायः संदिदेश । वत्स वेद इहास्यताम् । भवता मद्गृहे कंचित्कालं शुश्रूषमाणेन भवितव्यम् । श्रेयस्ते भविष्यतीति ॥

tam upādhyāyaḥ saṁdideśa । vatsa veda ihāsyatām । bhavatā madgr̥he kaṁ cit kālaṁ śuśrūṣamāṇena bhavitavyam । śreyas te bhaviṣyatīti ॥

स तथेत्युक्त्वा गुरुकुले दीर्घकालं गुरुशुश्रूषणपरोऽवसत् । गौरिव नित्यं गुरुषु धूर्षु नियुज्यमानः शीतोष्णक्षुत्तृष्णादुःखसहः सर्वत्राप्रतिकूलः ॥

sa tathety uktvā gurukule dīrghakālaṁ guruśuśrūṣaṇaparo ’vasat । gaur iva nityaṁ guruṣu dhūrṣu niyujyamānaḥ śītoṣṇakṣuttr̥ṣṇāduḥkhasahaḥ sarvatrāpratikūlaḥ ॥

तस्य महता कालेन गुरुः परितोषं जगाम । तत्परितोषाच्च श्रेयः सर्वज्ञतां चावाप । एषा तस्यापि परीक्षा वेदस्य ॥

tasya mahatā kālena guruḥ paritoṣaṁ jagāma । tatparitoṣāc ca śreyaḥ sarvajñatāṁ cāvāpa । eṣā tasyāpi parīkṣā vedasya ॥

स उपाध्यायेनानुज्ञातः समावृत्तस्तस्माद्गुरुकुलवासाद्गृहाश्रमं प्रत्यपद्यत । तस्यापि स्वगृहे वसतस्त्रयः शिष्या बभूवुः ॥

sa upādhyāyenānujñātaḥ samāvr̥ttas tasmād gurukulavāsād gr̥hāśramaṁ pratyapadyata । tasyāpi svagr̥he vasatas trayaḥ śiṣyā babhūvuḥ ॥

स शिष्यान्न किंचिदुवाच । कर्म वा क्रियतां गुरुशुश्रूषा वेति । दुःखाभिज्ञो हि गुरुकुलवासस्य शिष्यान्परिक्लेशेन योजयितुं नेयेष ॥

sa śiṣyān na kiṁ cid uvāca । karma vā kriyatāṁ guruśuśrūṣā veti । duḥkhābhijño hi gurukulavāsasya śiṣyān parikleśena yojayituṁ neyeṣa ॥

अथ कस्यचित्कालस्य वेदं ब्राह्मणं जनमेजयः पौष्यश्च क्षत्रियावुपेत्योपाध्यायं वरयां चक्रतुः ॥

atha kasya cit kālasya vedaṁ brāhmaṇaṁ janamejayaḥ pauṣyaś ca kṣatriyāv upetyopādhyāyaṁ varayāṁ cakratuḥ ॥

स कदाचिद्याज्यकार्येणाभिप्रस्थित उत्तङ्कं नाम शिष्यं नियोजयामास । भो उत्तङ्क यत्किंचिदस्मद्गृहे परिहीयते तदिच्छाम्यहमपरिहीणं भवता क्रियमाणमिति ॥

sa kadā cid yājyakāryeṇābhiprasthita uttaṅkaṁ nāma śiṣyaṁ niyojayām āsa । bho uttaṅka yat kiṁ cid asmadgr̥he parihīyate tad icchāmy aham aparihīṇaṁ bhavatā kriyamāṇam iti ॥

स एवं प्रतिसमादिश्योत्तङ्कं वेदः प्रवासं जगाम ॥

sa evaṁ pratisamādiśyottaṅkaṁ vedaḥ pravāsaṁ jagāma ॥

अथोत्तङ्को गुरुशुश्रूषुर्गुरुनियोगमनुतिष्ठमानस्तत्र गुरुकुले वसति स्म ॥

athottaṅko guruśuśrūṣur guruniyogam anutiṣṭhamānas tatra gurukule vasati sma ॥

स वसंस्तत्रोपाध्यायस्त्रीभिः सहिताभिराहूयोक्तः । उपाध्यायिनी ते ऋतुमती । उपाध्यायश्च प्रोषितः । अस्या यथायमृतुर्वन्ध्यो न भवति तथा क्रियताम् । एतद्विषीदतीति ॥

sa vasaṁs tatropādhyāyastrībhiḥ sahitābhir āhūyoktaḥ । upādhyāyinī te r̥tumatī । upādhyāyaś ca proṣitaḥ । asyā yathāyam r̥tur vandhyo na bhavati tathā kriyatām । etad viṣīdatīti ॥

स एवमुक्तस्ताः स्त्रियः प्रत्युवाच । न मया स्त्रीणां वचनादिदमकार्यं कार्यम् । न ह्यहमुपाध्यायेन संदिष्टः । अकार्यमपि त्वया कार्यमिति ॥

sa evam uktas tāḥ striyaḥ pratyuvāca । na mayā strīṇāṁ vacanād idam akāryaṁ kāryam । na hy aham upādhyāyena saṁdiṣṭaḥ । akāryam api tvayā kāryam iti ॥

तस्य पुनरुपाध्यायः कालान्तरेण गृहानुपजगाम तस्मात्प्रवासात् । स तद्वृत्तं तस्याशेषमुपलभ्य प्रीतिमानभूत् ॥

tasya punar upādhyāyaḥ kālāntareṇa gr̥hān upajagāma tasmāt pravāsāt । sa tadvr̥ttaṁ tasyāśeṣam upalabhya prītimān abhūt ॥

उवाच चैनम् । वत्सोत्तङ्क किं ते प्रियं करवाणीति । धर्मतो हि शुश्रूषितोऽस्मि भवता । तेन प्रीतिः परस्परेण नौ संवृद्धा । तदनुजाने भवन्तम् । सर्वामेव सिद्धिं प्राप्स्यसि । गम्यतामिति ॥

uvāca cainam । vatsottaṅka kiṁ te priyaṁ karavāṇīti । dharmato hi śuśrūṣito ’smi bhavatā । tena prītiḥ paraspareṇa nau saṁvr̥ddhā । tad anujāne bhavantam । sarvām eva siddhiṁ prāpsyasi । gamyatām iti ॥

स एवमुक्तः प्रत्युवाच । किं ते प्रियं करवाणीति । एवं ह्याहुः ॥

sa evam uktaḥ pratyuvāca । kiṁ te priyaṁ karavāṇīti । evaṁ hy āhuḥ ॥

यश्चाधर्मेण विब्रूयाद्यश्चाधर्मेण पृच्छति । तयोरन्यतरः प्रैति विद्वेषं चाधिगच्छति ॥

yaś cādharmeṇa vibrūyād yaś cādharmeṇa pr̥cchati । tayor anyataraḥ praiti vidveṣaṁ cādhigacchati ॥

सोऽहमनुज्ञातो भवता इच्छामीष्टं ते गुर्वर्थमुपहर्तुमिति ॥

so ’ham anujñāto bhavatā icchāmīṣṭaṁ te gurvartham upahartum iti ॥

तेनैवमुक्त उपाध्यायः प्रत्युवाच । वत्सोत्तङ्क उष्यतां तावदिति ॥

tenaivam ukta upādhyāyaḥ pratyuvāca । vatsottaṅka uṣyatāṁ tāvad iti ॥

स कदाचित्तमुपाध्यायमाहोत्तङ्कः । आज्ञापयतु भवान् । किं ते प्रियमुपहरामि गुर्वर्थमिति ॥

sa kadā cit tam upādhyāyam āhottaṅkaḥ । ājñāpayatu bhavān । kiṁ te priyam upaharāmi gurvartham iti ॥

तमुपाध्यायः प्रत्युवाच । वत्सोत्तङ्क बहुशो मां चोदयसि गुर्वर्थमुपहरेयमिति । तद्गच्छ । एनां प्रविश्योपाध्यायिनीं पृच्छ किमुपहरामीति । एषा यद्ब्रवीति तदुपहरस्वेति ॥

tam upādhyāyaḥ pratyuvāca । vatsottaṅka bahuśo māṁ codayasi gurvartham upahareyam iti । tad gaccha । enāṁ praviśyopādhyāyinīṁ pr̥ccha kim upaharāmīti । eṣā yad bravīti tad upaharasveti ॥

स एवमुक्त उपाध्यायेनोपाध्यायिनीमपृच्छत् । भवत्युपाध्यायेनास्म्यनुज्ञातो गृहं गन्तुम् । तदिच्छामीष्टं ते गुर्वर्थमुपहृत्यानृणो गन्तुम् । तदाज्ञापयतु भवती । किमुपहरामि गुर्वर्थमिति ॥

sa evam ukta upādhyāyenopādhyāyinīm apr̥cchat । bhavaty upādhyāyenāsmy anujñāto gr̥haṁ gantum । tad icchāmīṣṭaṁ te gurvartham upahr̥tyānr̥ṇo gantum । tad ājñāpayatu bhavatī । kim upaharāmi gurvartham iti ॥

सैवमुक्तोपाध्यायिन्युत्तङ्कं प्रत्युवाच । गच्छ पौष्यं राजानम् । भिक्षस्व तस्य क्षत्रियया पिनद्धे कुण्डले । ते आनयस्व । इतश्चतुर्थेऽहनि पुण्यकं भविता । ताभ्यामाबद्धाभ्यां ब्राह्मणान्परिवेष्टुमिच्छामि । शोभमाना यथा ताभ्यां कुण्डलाभ्यां तस्मिन्नहनि संपादयस्व । श्रेयो हि ते स्यात्क्षणं कुर्वत इति ॥

saivam uktopādhyāyiny uttaṅkaṁ pratyuvāca । gaccha pauṣyaṁ rājānam । bhikṣasva tasya kṣatriyayā pinaddhe kuṇḍale । te ānayasva । itaś caturthe ’hani puṇyakaṁ bhavitā । tābhyām ābaddhābhyāṁ brāhmaṇān pariveṣṭum icchāmi । śobhamānā yathā tābhyāṁ kuṇḍalābhyāṁ tasminn ahani saṁpādayasva । śreyo hi te syāt kṣaṇaṁ kurvata iti ॥

स एवमुक्त उपाध्यायिन्या प्रातिष्ठतोत्तङ्कः । स पथि गच्छन्नपश्यदृषभमतिप्रमाणं तमधिरूढं च पुरुषमतिप्रमाणमेव ॥

sa evam ukta upādhyāyinyā prātiṣṭhatottaṅkaḥ । sa pathi gacchann apaśyad r̥ṣabham atipramāṇaṁ tam adhirūḍhaṁ ca puruṣam atipramāṇam eva ॥

स पुरुष उत्तङ्कमभ्यभाषत । उत्तङ्कैतत्पुरीषमस्य ऋषभस्य भक्षयस्वेति ॥

sa puruṣa uttaṅkam abhyabhāṣata । uttaṅkaitat purīṣam asya r̥ṣabhasya bhakṣayasveti ॥

स एवमुक्तो नैच्छत् ॥

sa evam ukto naicchat ॥

तमाह पुरुषो भूयः । भक्षयस्वोत्तङ्क । मा विचारय । उपाध्यायेनापि ते भक्षितं पूर्वमिति ॥

tam āha puruṣo bhūyaḥ । bhakṣayasvottaṅka । mā vicāraya । upādhyāyenāpi te bhakṣitaṁ pūrvam iti ॥

स एवमुक्तो बाढमित्युक्त्वा तदा तदृषभस्य पुरीषं मूत्रं च भक्षयित्वोत्तङ्कः प्रतस्थे यत्र स क्षत्रियः पौष्यः ॥

sa evam ukto bāḍham ity uktvā tadā tad r̥ṣabhasya purīṣaṁ mūtraṁ ca bhakṣayitvottaṅkaḥ pratasthe yatra sa kṣatriyaḥ pauṣyaḥ ॥

तमुपेत्यापश्यदुत्तङ्क आसीनम् । स तमुपेत्याशीर्भिरभिनन्द्योवाच । अर्थी भवन्तमुपगतोऽस्मीति ॥

tam upetyāpaśyad uttaṅka āsīnam । sa tam upetyāśīrbhir abhinandyovāca । arthī bhavantam upagato ’smīti ॥

स एनमभिवाद्योवाच । भगवन्पौष्यः खल्वहम् । किं करवाणीति ॥

sa enam abhivādyovāca । bhagavan pauṣyaḥ khalv aham । kiṁ karavāṇīti ॥

तमुवाचोत्तङ्कः । गुर्वर्थे कुण्डलाभ्यामर्थ्यागतोऽस्मीति ये ते क्षत्रियया पिनद्धे कुण्डले ते भवान्दातुमर्हतीति ॥

tam uvācottaṅkaḥ । gurvarthe kuṇḍalābhyām arthy āgato ’smīti ye te kṣatriyayā pinaddhe kuṇḍale te bhavān dātum arhatīti ॥

तं पौष्यः प्रत्युवाच । प्रविश्यान्तःपुरं क्षत्रिया याच्यतामिति ॥

taṁ pauṣyaḥ pratyuvāca । praviśyāntaḥpuraṁ kṣatriyā yācyatām iti ॥

स तेनैवमुक्तः प्रविश्यान्तःपुरं क्षत्रियां नापश्यत् ॥

sa tenaivam uktaḥ praviśyāntaḥpuraṁ kṣatriyāṁ nāpaśyat ॥

स पौष्यं पुनरुवाच । न युक्तं भवता वयमनृतेनोपचरितुम् । न हि ते क्षत्रियान्तःपुरे संनिहिता । नैनां पश्यामीति ॥

sa pauṣyaṁ punar uvāca । na yuktaṁ bhavatā vayam anr̥tenopacaritum । na hi te kṣatriyāntaḥpure saṁnihitā । naināṁ paśyāmīti ॥

स एवमुक्तः पौष्यस्तं प्रत्युवाच । संप्रति भवानुच्छिष्टः । स्मर तावत् । न हि सा क्षत्रिया उच्छिष्टेनाशुचिना वा शक्या द्रष्टुम् । पतिव्रतात्वादेषा नाशुचेर्दर्शनमुपैतीति ॥

sa evam uktaḥ pauṣyas taṁ pratyuvāca । saṁprati bhavān ucchiṣṭaḥ । smara tāvat । na hi sā kṣatriyā ucchiṣṭenāśucinā vā śakyā draṣṭum । pativratātvād eṣā nāśucer darśanam upaitīti ॥

अथैवमुक्त उत्तङ्कः स्मृत्वोवाच । अस्ति खलु मयोच्छिष्टेनोपस्पृष्टं शीघ्रं गच्छता चेति ॥

athaivam ukta uttaṅkaḥ smr̥tvovāca । asti khalu mayocchiṣṭenopaspr̥ṣṭaṁ śīghraṁ gacchatā ceti ॥

तं पौष्यः प्रत्युवाच । एतत्तदेवं हि । न गच्छतोपस्पृष्टं भवति न स्थितेनेति ॥

taṁ pauṣyaḥ pratyuvāca । etat tad evaṁ hi । na gacchatopaspr̥ṣṭaṁ bhavati na sthiteneti ॥

अथोत्तङ्कस्तथेत्युक्त्वा प्राङ्मुख उपविश्य सुप्रक्षालितपाणिपादवदनोऽशब्दाभिर्हृदयंगमाभिरद्भिरुपस्पृश्य त्रिः पीत्वा द्विः परिमृज्य खान्यद्भिरुपस्पृश्यान्तःपुरं प्रविश्य तां क्षत्रियामपश्यत् ॥

athottaṅkas tathety uktvā prāṅmukha upaviśya suprakṣālitapāṇipādavadano ’śabdābhir hr̥dayaṁgamābhir adbhir upaspr̥śya triḥ pītvā dviḥ parimr̥jya khāny adbhir upaspr̥śyāntaḥpuraṁ praviśya tāṁ kṣatriyām apaśyat ॥

सा च दृष्ट्वैवोत्तङ्कमभ्युत्थायाभिवाद्योवाच । स्वागतं ते भगवन् । आज्ञापय किं करवाणीति ॥

sā ca dr̥ṣṭvaivottaṅkam abhyutthāyābhivādyovāca । svāgataṁ te bhagavan । ājñāpaya kiṁ karavāṇīti ॥

स तामुवाच । एते कुण्डले गुर्वर्थं मे भिक्षिते दातुमर्हसीति ॥

sa tām uvāca । ete kuṇḍale gurvarthaṁ me bhikṣite dātum arhasīti ॥

सा प्रीता तेन तस्य सद्भावेन पात्रमयमनतिक्रमणीयश्चेति मत्वा ते कुण्डले अवमुच्यास्मै प्रायच्छत् ॥

sā prītā tena tasya sadbhāvena pātram ayam anatikramaṇīyaś ceti matvā te kuṇḍale avamucyāsmai prāyacchat ॥

आह चैनम् । एते कुण्डले तक्षको नागराजः प्रार्थयति । अप्रमत्तो नेतुमर्हसीति ॥

āha cainam । ete kuṇḍale takṣako nāgarājaḥ prārthayati । apramatto netum arhasīti ॥

स एवमुक्तस्तां क्षत्रियां प्रत्युवाच । भवति सुनिर्वृता भव । न मां शक्तस्तक्षको नागराजो धर्षयितुमिति ॥

sa evam uktas tāṁ kṣatriyāṁ pratyuvāca । bhavati sunirvr̥tā bhava । na māṁ śaktas takṣako nāgarājo dharṣayitum iti ॥

स एवमुक्त्वा तां क्षत्रियामामन्त्र्य पौष्यसकाशमागच्छत् ॥

sa evam uktvā tāṁ kṣatriyām āmantrya pauṣyasakāśam āgacchat ॥

स तं दृष्ट्वोवाच । भोः पौष्य प्रीतोऽस्मीति ॥

sa taṁ dr̥ṣṭvovāca । bhoḥ pauṣya prīto ’smīti ॥

तं पौष्यः प्रत्युवाच । भगवंश्चिरस्य पात्रमासाद्यते । भवांश्च गुणवानतिथिः । तत्करिष्ये श्राद्धम् । क्षणः क्रियतामिति ॥

taṁ pauṣyaḥ pratyuvāca । bhagavaṁś cirasya pātram āsādyate । bhavāṁś ca guṇavān atithiḥ । tat kariṣye śrāddham । kṣaṇaḥ kriyatām iti ॥

तमुत्तङ्कः प्रत्युवाच । कृतक्षण एवास्मि । शीघ्रमिच्छामि यथोपपन्नमन्नमुपहृतं भवतेति ॥

tam uttaṅkaḥ pratyuvāca । kr̥takṣaṇa evāsmi । śīghram icchāmi yathopapannam annam upahr̥taṁ bhavateti ॥

स तथेत्युक्त्वा यथोपपन्नेनान्नेनैनं भोजयामास ॥

sa tathety uktvā yathopapannenānnenainaṁ bhojayām āsa ॥

अथोत्तङ्कः शीतमन्नं सकेशं दृष्ट्वा अशुच्येतदिति मत्वा पौष्यमुवाच । यस्मान्मे अशुच्यन्नं ददासि तस्मदन्धो भविष्यसीति ॥

athottaṅkaḥ śītam annaṁ sakeśaṁ dr̥ṣṭvā aśucy etad iti matvā pauṣyam uvāca । yasmān me aśucy annaṁ dadāsi tasmad andho bhaviṣyasīti ॥

तं पौष्यः प्रत्युवाच । यस्मात्त्वमप्यदुष्टमन्नं दूषयसि तस्मादनपत्यो भविष्यसीति ॥

taṁ pauṣyaḥ pratyuvāca । yasmāt tvam apy aduṣṭam annaṁ dūṣayasi tasmād anapatyo bhaviṣyasīti ॥

सोऽथ पौष्यस्तस्याशुचिभावमन्नस्यागमयामास ॥

so ’tha pauṣyas tasyāśucibhāvam annasyāgamayām āsa ॥

अथ तदन्नं मुक्तकेश्या स्त्रियोपहृतं सकेशमशुचि मत्वोत्तङ्कं प्रसादयामास । भगवन्नज्ञानादेतदन्नं सकेशमुपहृतं शीतं च । तत्क्षामये भवन्तम् । न भवेयमन्ध इति ॥

atha tadannaṁ muktakeśyā striyopahr̥taṁ sakeśam aśuci matvottaṅkaṁ prasādayām āsa । bhagavann ajñānād etad annaṁ sakeśam upahr̥taṁ śītaṁ ca । tat kṣāmaye bhavantam । na bhaveyam andha iti ॥

तमुत्तङ्कः प्रत्युवाच । न मृषा ब्रवीमि । भूत्वा त्वमन्धो नचिरादनन्धो भविष्यसीति । ममापि शापो न भवेद्भवता दत्त इति ॥

tam uttaṅkaḥ pratyuvāca । na mr̥ṣā bravīmi । bhūtvā tvam andho nacirād anandho bhaviṣyasīti । mamāpi śāpo na bhaved bhavatā datta iti ॥

तं पौष्यः प्रत्युवाच । नाहं शक्तः शापं प्रत्यादातुम् । न हि मे मन्युरद्याप्युपशमं गच्छति । किं चैतद्भवता न ज्ञायते यथा ॥

taṁ pauṣyaḥ pratyuvāca । nāhaṁ śaktaḥ śāpaṁ pratyādātum । na hi me manyur adyāpy upaśamaṁ gacchati । kiṁ caitad bhavatā na jñāyate yathā ॥

नावनीतं हृदयं ब्राह्मणस्य; वाचि क्षुरो निहितस्तीक्ष्णधारः । विपरीतमेतदुभयं क्षत्रियस्य; वाङ्नावनीती हृदयं तीक्ष्णधारम् ॥

nāvanītaṁ hr̥dayaṁ brāhmaṇasya; vāci kṣuro nihitas tīkṣṇadhāraḥ । viparītam etad ubhayaṁ kṣatriyasya; vāṅ nāvanītī hr̥dayaṁ tīkṣṇadhāram ॥

इति । तदेवं गते न शक्तोऽहं तीक्ष्णहृदयत्वात्तं शापमन्यथा कर्तुम् । गम्यतामिति ॥

iti । tad evaṁ gate na śakto ’haṁ tīkṣṇahr̥dayatvāt taṁ śāpam anyathā kartum । gamyatām iti ॥

तमुत्तङ्कः प्रत्युवाच । भवताहमन्नस्याशुचिभावमागमय्य प्रत्यनुनीतः । प्राक्च तेऽभिहितम् । यस्माददुष्टमन्नं दूषयसि तस्मादनपत्यो भविष्यसीति । दुष्टे चान्ने नैष मम शापो भविष्यतीति ॥

tam uttaṅkaḥ pratyuvāca । bhavatāham annasyāśucibhāvam āgamayya pratyanunītaḥ । prāk ca te ’bhihitam । yasmād aduṣṭam annaṁ dūṣayasi tasmād anapatyo bhaviṣyasīti । duṣṭe cānne naiṣa mama śāpo bhaviṣyatīti ॥

साधयामस्तावदित्युक्त्वा प्रातिष्ठतोत्तङ्कस्ते कुण्डले गृहीत्वा ॥

sādhayāmas tāvad ity uktvā prātiṣṭhatottaṅkas te kuṇḍale gr̥hītvā ॥

सोऽपश्यत्पथि नग्नं श्रमणमागच्छन्तं मुहुर्मुहुर्दृश्यमानमदृश्यमानं च । अथोत्तङ्कस्ते कुण्डले भूमौ निक्षिप्योदकार्थं प्रचक्रमे ॥

so ’paśyat pathi nagnaṁ śramaṇam āgacchantaṁ muhur muhur dr̥śyamānam adr̥śyamānaṁ ca । athottaṅkas te kuṇḍale bhūmau nikṣipyodakārthaṁ pracakrame ॥

एतस्मिन्नन्तरे स श्रमणस्त्वरमाण उपसृत्य ते कुण्डले गृहीत्वा प्राद्रवत् । तमुत्तङ्कोऽभिसृत्य जग्राह । स तद्रूपं विहाय तक्षकरूपं कृत्वा सहसा धरण्यां विवृतं महाबिलं विवेश ॥

etasminn antare sa śramaṇas tvaramāṇa upasr̥tya te kuṇḍale gr̥hītvā prādravat । tam uttaṅko ’bhisr̥tya jagrāha । sa tad rūpaṁ vihāya takṣakarūpaṁ kr̥tvā sahasā dharaṇyāṁ vivr̥taṁ mahābilaṁ viveśa ॥

प्रविश्य च नागलोकं स्वभवनमगच्छत् । तमुत्तङ्कोऽन्वाविवेश तेनैव बिलेन । प्रविश्य च नागानस्तुवदेभिः श्लोकैः ॥

praviśya ca nāgalokaṁ svabhavanam agacchat । tam uttaṅko ’nvāviveśa tenaiva bilena । praviśya ca nāgān astuvad ebhiḥ ślokaiḥ ॥

य ऐरावतराजानः सर्पाः समितिशोभनाः । वर्षन्त इव जीमूताः सविद्युत्पवनेरिताः ॥

ya airāvatarājānaḥ sarpāḥ samitiśobhanāḥ । varṣanta iva jīmūtāḥ savidyutpavaneritāḥ ॥

सुरूपाश्च विरूपाश्च तथा कल्माषकुण्डलाः । आदित्यवन्नाकपृष्ठे रेजुरैरावतोद्भवाः ॥

surūpāś ca virūpāś ca tathā kalmāṣakuṇḍalāḥ । ādityavan nākapr̥ṣṭhe rejur airāvatodbhavāḥ ॥

बहूनि नागवर्त्मानि गङ्गायास्तीर उत्तरे । इच्छेत्कोऽर्कांशुसेनायां चर्तुमैरावतं विना ॥

bahūni nāgavartmāni gaṅgāyās tīra uttare । icchet ko ’rkāṁśusenāyāṁ cartum airāvataṁ vinā ॥

शतान्यशीतिरष्टौ च सहस्राणि च विंशतिः । सर्पाणां प्रग्रहा यान्ति धृतराष्ट्रो यदेजति ॥

śatāny aśītir aṣṭau ca sahasrāṇi ca viṁśatiḥ । sarpāṇāṁ pragrahā yānti dhr̥tarāṣṭro yad ejati ॥

ये चैनमुपसर्पन्ति ये च दूरं परं गताः । अहमैरावतज्येष्ठभ्रातृभ्योऽकरवं नमः ॥

ye cainam upasarpanti ye ca dūraṁ paraṁ gatāḥ । aham airāvatajyeṣṭhabhrātr̥bhyo ’karavaṁ namaḥ ॥

यस्य वासः कुरुक्षेत्रे खाण्डवे चाभवत्सदा । तं काद्रवेयमस्तौषं कुण्डलार्थाय तक्षकम् ॥

yasya vāsaḥ kurukṣetre khāṇḍave cābhavat sadā । taṁ kādraveyam astauṣaṁ kuṇḍalārthāya takṣakam ॥

तक्षकश्चाश्वसेनश्च नित्यं सहचरावुभौ । कुरुक्षेत्रे निवसतां नदीमिक्षुमतीमनु ॥

takṣakaś cāśvasenaś ca nityaṁ sahacarāv ubhau । kurukṣetre nivasatāṁ nadīm ikṣumatīm anu ॥

जघन्यजस्तक्षकस्य श्रुतसेनेति यः श्रुतः । अवसद्यो महद्द्युम्नि प्रार्थयन्नागमुख्यताम् । करवाणि सदा चाहं नमस्तस्मै महात्मने ॥

jaghanyajas takṣakasya śrutaseneti yaḥ śrutaḥ । avasadyo mahad dyumni prārthayan nāgamukhyatām । karavāṇi sadā cāhaṁ namas tasmai mahātmane ॥

एवं स्तुवन्नपि नागान्यदा ते कुण्डले नालभदथापश्यत्स्त्रियौ तन्त्रे अधिरोप्य पटं वयन्त्यौ ॥

evaṁ stuvann api nāgān yadā te kuṇḍale nālabhad athāpaśyat striyau tantre adhiropya paṭaṁ vayantyau ॥

तस्मिंश्च तन्त्रे कृष्णाः सिताश्च तन्तवः । चक्रं चापश्यत्षड्भिः कुमारैः परिवर्त्यमानम् । पुरुषं चापश्यद्दर्शनीयम् ॥

tasmiṁś ca tantre kr̥ṣṇāḥ sitāś ca tantavaḥ । cakraṁ cāpaśyat ṣaḍbhiḥ kumāraiḥ parivartyamānam । puruṣaṁ cāpaśyad darśanīyam ॥

स तान्सर्वांस्तुष्टाव एभिर्मन्त्रवादश्लोकैः ॥

sa tān sarvāṁs tuṣṭāva ebhir mantravādaślokaiḥ ॥

त्रीण्यर्पितान्यत्र शतानि मध्ये; षष्टिश्च नित्यं चरति ध्रुवेऽस्मिन् । चक्रे चतुर्विंशतिपर्वयोगे; षड्यत्कुमाराः परिवर्तयन्ति ॥

trīṇy arpitāny atra śatāni madhye; ṣaṣṭiś ca nityaṁ carati dhruve ’smin । cakre caturviṁśatiparvayoge; ṣaḍ yat kumārāḥ parivartayanti ॥

तन्त्रं चेदं विश्वरूपं युवत्यौ; वयतस्तन्तून्सततं वर्तयन्त्यौ । कृष्णान्सितांश्चैव विवर्तयन्त्यौ; भूतान्यजस्रं भुवनानि चैव ॥

tantraṁ cedaṁ viśvarūpaṁ yuvatyau; vayatas tantūn satataṁ vartayantyau । kr̥ṣṇān sitāṁś caiva vivartayantyau; bhūtāny ajasraṁ bhuvanāni caiva ॥

वज्रस्य भर्ता भुवनस्य गोप्ता; वृत्रस्य हन्ता नमुचेर्निहन्ता । कृष्णे वसानो वसने महात्मा; सत्यानृते यो विविनक्ति लोके ॥

vajrasya bhartā bhuvanasya goptā; vr̥trasya hantā namucer nihantā । kr̥ṣṇe vasāno vasane mahātmā; satyānr̥te yo vivinakti loke ॥

यो वाजिनं गर्भमपां पुराणं; वैश्वानरं वाहनमभ्युपेतः । नमः सदास्मै जगदीश्वराय; लोकत्रयेशाय पुरंदराय ॥

yo vājinaṁ garbham apāṁ purāṇaṁ; vaiśvānaraṁ vāhanam abhyupetaḥ । namaḥ sadāsmai jagadīśvarāya; lokatrayeśāya puraṁdarāya ॥

ततः स एनं पुरुषः प्राह । प्रीतोऽस्मि तेऽहमनेन स्तोत्रेण । किं ते प्रियं करवाणीति ॥

tataḥ sa enaṁ puruṣaḥ prāha । prīto ’smi te ’ham anena stotreṇa । kiṁ te priyaṁ karavāṇīti ॥

स तमुवाच । नागा मे वशमीयुरिति ॥

sa tam uvāca । nāgā me vaśam īyur iti ॥

स एनं पुरुषः पुनरुवाच । एतमश्वमपाने धमस्वेति ॥

sa enaṁ puruṣaḥ punar uvāca । etam aśvam apāne dhamasveti ॥

स तमश्वमपानेऽधमत् । अथाश्वाद्धम्यमानात्सर्वस्रोतोभ्यः सधूमा अर्चिषोऽग्नेर्निष्पेतुः ॥

sa tam aśvam apāne ’dhamat । athāśvād dhamyamānāt sarvasrotobhyaḥ sadhūmā arciṣo ’gner niṣpetuḥ ॥

ताभिर्नागलोको धूपितः ॥

tābhir nāgaloko dhūpitaḥ ॥

अथ ससंभ्रमस्तक्षकोऽग्नितेजोभयविषण्णस्ते कुण्डले गृहीत्वा सहसा स्वभवनान्निष्क्रम्योत्तङ्कमुवाच । एते कुण्डले प्रतिगृह्णातु भवानिति ॥

atha sasaṁbhramas takṣako ’gnitejobhayaviṣaṇṇas te kuṇḍale gr̥hītvā sahasā svabhavanān niṣkramyottaṅkam uvāca । ete kuṇḍale pratigr̥hṇātu bhavān iti ॥

स ते प्रतिजग्राहोत्तङ्कः । कुण्डले प्रतिगृह्याचिन्तयत् । अद्य तत्पुण्यकमुपाध्यायिन्याः । दूरं चाहमभ्यागतः । कथं नु खलु संभावयेयमिति ॥

sa te pratijagrāhottaṅkaḥ । kuṇḍale pratigr̥hyācintayat । adya tat puṇyakam upādhyāyinyāḥ । dūraṁ cāham abhyāgataḥ । kathaṁ nu khalu saṁbhāvayeyam iti ॥

उत्तङ्क एनमश्वमधिरोह । एष त्वां क्षणादेवोपाध्यायकुलं प्रापयिष्यतीति ॥

uttaṅka enam aśvam adhiroha । eṣa tvāṁ kṣaṇād evopādhyāyakulaṁ prāpayiṣyatīti ॥

स तथेत्युक्त्वा तमश्वमधिरुह्य प्रत्याजगामोपाध्यायकुलम् । उपाध्यायिनी च स्नाता केशानावपयन्त्युपविष्टोत्तङ्को नागच्छतीति शापायास्य मनो दधे ॥

sa tathety uktvā tam aśvam adhiruhya pratyājagāmopādhyāyakulam । upādhyāyinī ca snātā keśān āvapayanty upaviṣṭottaṅko nāgacchatīti śāpāyāsya mano dadhe ॥

अथोत्तङ्कः प्रविश्य उपाध्यायिनीमभ्यवादयत् । ते चास्यै कुण्डले प्रायच्छत् ॥

athottaṅkaḥ praviśya upādhyāyinīm abhyavādayat । te cāsyai kuṇḍale prāyacchat ॥

सा चैनं प्रत्युवाच । उत्तङ्क देशे कालेऽभ्यागतः । स्वागतं ते वत्स । मनागसि मया न शप्तः । श्रेयस्तवोपस्थितम् । सिद्धिमाप्नुहीति ॥

sā cainaṁ pratyuvāca । uttaṅka deśe kāle ’bhyāgataḥ । svāgataṁ te vatsa । manāg asi mayā na śaptaḥ । śreyas tavopasthitam । siddhim āpnuhīti ॥

अथोत्तङ्क उपाध्यायमभ्यवादयत् । तमुपाध्यायः प्रत्युवाच । वत्सोत्तङ्क स्वागतं ते । किं चिरं कृतमिति ॥

athottaṅka upādhyāyam abhyavādayat । tam upādhyāyaḥ pratyuvāca । vatsottaṅka svāgataṁ te । kiṁ ciraṁ kr̥tam iti ॥

तमुत्तङ्क उपाध्यायं प्रत्युवाच । भोस्तक्षकेण नागराजेन विघ्नः कृतोऽस्मिन्कर्मणि । तेनास्मि नागलोकं नीतः ॥

tam uttaṅka upādhyāyaṁ pratyuvāca । bhos takṣakeṇa nāgarājena vighnaḥ kr̥to ’smin karmaṇi । tenāsmi nāgalokaṁ nītaḥ ॥

तत्र च मया दृष्टे स्त्रियौ तन्त्रेऽधिरोप्य पटं वयन्त्यौ । तस्मिंश्च तन्त्रे कृष्णाः सिताश्च तन्तवः । किं तत् ॥

tatra ca mayā dr̥ṣṭe striyau tantre ’dhiropya paṭaṁ vayantyau । tasmiṁś ca tantre kr̥ṣṇāḥ sitāś ca tantavaḥ । kiṁ tat ॥

तत्र च मया चक्रं दृष्टं द्वादशारम् । षट्चैनं कुमाराः परिवर्तयन्ति । तदपि किम् ॥

tatra ca mayā cakraṁ dr̥ṣṭaṁ dvādaśāram । ṣaṭ cainaṁ kumārāḥ parivartayanti । tad api kim ॥

पुरुषश्चापि मया दृष्टः । स पुनः कः ॥

puruṣaś cāpi mayā dr̥ṣṭaḥ । sa punaḥ kaḥ ॥

अश्वश्चातिप्रमाणयुक्तः । स चापि कः ॥

aśvaś cātipramāṇayuktaḥ । sa cāpi kaḥ ॥

पथि गच्छता मया ऋषभो दृष्टः । तं च पुरुषोऽधिरूढः । तेनास्मि सोपचारमुक्तः । उत्तङ्कास्य ऋषभस्य पुरीषं भक्षय । उपाध्यायेनापि ते भक्षितमिति । ततस्तद्वचनान्मया तदृषभस्य पुरीषमुपयुक्तम् । तदिच्छामि भवतोपदिष्टं किं तदिति ॥

pathi gacchatā mayā r̥ṣabho dr̥ṣṭaḥ । taṁ ca puruṣo ’dhirūḍhaḥ । tenāsmi sopacāram uktaḥ । uttaṅkāsya r̥ṣabhasya purīṣaṁ bhakṣaya । upādhyāyenāpi te bhakṣitam iti । tatas tadvacanān mayā tadr̥ṣabhasya purīṣam upayuktam । tad icchāmi bhavatopadiṣṭaṁ kiṁ tad iti ॥

तेनैवमुक्त उपाध्यायः प्रत्युवाच । ये ते स्त्रियौ धाता विधाता च । ये च ते कृष्णाः सिताश्च तन्तवस्ते रात्र्यहनी ॥

tenaivam ukta upādhyāyaḥ pratyuvāca । ye te striyau dhātā vidhātā ca । ye ca te kr̥ṣṇāḥ sitāś ca tantavas te rātryahanī ॥

यदपि तच्चक्रं द्वादशारं षट्कुमाराः परिवर्तयन्ति ते ऋतवः षट्संवत्सरश्चक्रम् । यः पुरुषः स पर्जन्यः । योऽश्वः सोऽग्निः ॥

yad api tac cakraṁ dvādaśāraṁ ṣaṭ kumārāḥ parivartayanti te r̥tavaḥ ṣaṭ saṁvatsaraś cakram । yaḥ puruṣaḥ sa parjanyaḥ । yo ’śvaḥ so ’gniḥ ॥

य ऋषभस्त्वया पथि गच्छता दृष्टः स ऐरावतो नागराजः । यश्चैनमधिरूढः स इन्द्रः । यदपि ते पुरीषं भक्षितं तस्य ऋषभस्य तदमृतम् ॥

ya r̥ṣabhas tvayā pathi gacchatā dr̥ṣṭaḥ sa airāvato nāgarājaḥ । yaś cainam adhirūḍhaḥ sa indraḥ । yad api te purīṣaṁ bhakṣitaṁ tasya r̥ṣabhasya tad amr̥tam ॥

तेन खल्वसि न व्यापन्नस्तस्मिन्नागभवने । स चापि मम सखा इन्द्रः ॥

tena khalv asi na vyāpannas tasmin nāgabhavane । sa cāpi mama sakhā indraḥ ॥

तदनुग्रहात्कुण्डले गृहीत्वा पुनरभ्यागतोऽसि । तत्सौम्य गम्यताम् । अनुजाने भवन्तम् । श्रेयोऽवाप्स्यसीति ॥

tadanugrahāt kuṇḍale gr̥hītvā punar abhyāgato ’si । tat saumya gamyatām । anujāne bhavantam । śreyo ’vāpsyasīti ॥

स उपाध्यायेनानुज्ञात उत्तङ्कः क्रुद्धस्तक्षकस्य प्रतिचिकीर्षमाणो हास्तिनपुरं प्रतस्थे ॥

sa upādhyāyenānujñāta uttaṅkaḥ kruddhas takṣakasya praticikīrṣamāṇo hāstinapuraṁ pratasthe ॥

स हास्तिनपुरं प्राप्य नचिराद्द्विजसत्तमः । समागच्छत राजानमुत्तङ्को जनमेजयम् ॥

sa hāstinapuraṁ prāpya nacirād dvijasattamaḥ । samāgacchata rājānam uttaṅko janamejayam ॥

पुरा तक्षशिलातस्तं निवृत्तमपराजितम् । सम्यग्विजयिनं दृष्ट्वा समन्तान्मन्त्रिभिर्वृतम् ॥

purā takṣaśilātas taṁ nivr̥ttam aparājitam । samyag vijayinaṁ dr̥ṣṭvā samantān mantribhir vr̥tam ॥

तस्मै जयाशिषः पूर्वं यथान्यायं प्रयुज्य सः । उवाचैनं वचः काले शब्दसंपन्नया गिरा ॥

tasmai jayāśiṣaḥ pūrvaṁ yathānyāyaṁ prayujya saḥ । uvācainaṁ vacaḥ kāle śabdasaṁpannayā girā ॥

अन्यस्मिन्करणीये त्वं कार्ये पार्थिवसत्तम । बाल्यादिवान्यदेव त्वं कुरुषे नृपसत्तम ॥

anyasmin karaṇīye tvaṁ kārye pārthivasattama । bālyād ivānyad eva tvaṁ kuruṣe nr̥pasattama ॥

एवमुक्तस्तु विप्रेण स राजा प्रत्युवाच ह । जनमेजयः प्रसन्नात्मा सम्यक्संपूज्य तं मुनिम् ॥

evam uktas tu vipreṇa sa rājā pratyuvāca ha । janamejayaḥ prasannātmā samyak saṁpūjya taṁ munim ॥

आसां प्रजानां परिपालनेन; स्वं क्षत्रधर्मं परिपालयामि । प्रब्रूहि वा किं क्रियतां द्विजेन्द्र; शुश्रूषुरस्म्यद्य वचस्त्वदीयम् ॥

āsāṁ prajānāṁ paripālanena; svaṁ kṣatradharmaṁ paripālayāmi । prabrūhi vā kiṁ kriyatāṁ dvijendra; śuśrūṣur asmy adya vacas tvadīyam ॥

स एवमुक्तस्तु नृपोत्तमेन; द्विजोत्तमः पुण्यकृतां वरिष्ठः । उवाच राजानमदीनसत्त्वं; स्वमेव कार्यं नृपतेश्च यत्तत् ॥

sa evam uktas tu nr̥pottamena; dvijottamaḥ puṇyakr̥tāṁ variṣṭhaḥ । uvāca rājānam adīnasattvaṁ; svam eva kāryaṁ nr̥pateś ca yat tat ॥

तक्षकेण नरेन्द्रेन्द्र येन ते हिंसितः पिता । तस्मै प्रतिकुरुष्व त्वं पन्नगाय दुरात्मने ॥

takṣakeṇa narendrendra yena te hiṁsitaḥ pitā । tasmai pratikuruṣva tvaṁ pannagāya durātmane ॥

कार्यकालं च मन्येऽहं विधिदृष्टस्य कर्मणः । तद्गच्छापचितिं राजन्पितुस्तस्य महात्मनः ॥

kāryakālaṁ ca manye ’haṁ vidhidr̥ṣṭasya karmaṇaḥ । tad gacchāpacitiṁ rājan pitus tasya mahātmanaḥ ॥

तेन ह्यनपराधी स दष्टो दुष्टान्तरात्मना । पञ्चत्वमगमद्राजा वज्राहत इव द्रुमः ॥

tena hy anaparādhī sa daṣṭo duṣṭāntarātmanā । pañcatvam agamad rājā vajrāhata iva drumaḥ ॥

बलदर्पसमुत्सिक्तस्तक्षकः पन्नगाधमः । अकार्यं कृतवान्पापो योऽदशत्पितरं तव ॥

baladarpasamutsiktas takṣakaḥ pannagādhamaḥ । akāryaṁ kr̥tavān pāpo yo ’daśat pitaraṁ tava ॥

राजर्षिवंशगोप्तारममरप्रतिमं नृपम् । जघान काश्यपं चैव न्यवर्तयत पापकृत् ॥

rājarṣivaṁśagoptāram amarapratimaṁ nr̥pam । jaghāna kāśyapaṁ caiva nyavartayata pāpakr̥t ॥

दग्धुमर्हसि तं पापं ज्वलिते हव्यवाहने । सर्पसत्रे महाराज त्वयि तद्धि विधीयते ॥

dagdhum arhasi taṁ pāpaṁ jvalite havyavāhane । sarpasatre mahārāja tvayi tad dhi vidhīyate ॥

एवं पितुश्चापचितिं गतवांस्त्वं भविष्यसि । मम प्रियं च सुमहत्कृतं राजन्भविष्यति ॥

evaṁ pituś cāpacitiṁ gatavāṁs tvaṁ bhaviṣyasi । mama priyaṁ ca sumahat kr̥taṁ rājan bhaviṣyati ॥

कर्मणः पृथिवीपाल मम येन दुरात्मना । विघ्नः कृतो महाराज गुर्वर्थं चरतोऽनघ ॥

karmaṇaḥ pr̥thivīpāla mama yena durātmanā । vighnaḥ kr̥to mahārāja gurvarthaṁ carato ’nagha ॥

एतच्छ्रुत्वा तु नृपतिस्तक्षकस्य चुकोप ह । उत्तङ्कवाक्यहविषा दीप्तोऽग्निर्हविषा यथा ॥

etac chrutvā tu nr̥patis takṣakasya cukopa ha । uttaṅkavākyahaviṣā dīpto ’gnir haviṣā yathā ॥

अपृच्छच्च तदा राजा मन्त्रिणः स्वान्सुदुःखितः । उत्तङ्कस्यैव सांनिध्ये पितुः स्वर्गगतिं प्रति ॥

apr̥cchac ca tadā rājā mantriṇaḥ svān suduḥkhitaḥ । uttaṅkasyaiva sāṁnidhye pituḥ svargagatiṁ prati ॥

तदैव हि स राजेन्द्रो दुःखशोकाप्लुतोऽभवत् । यदैव पितरं वृत्तमुत्तङ्कादशृणोत्तदा ॥

tadaiva hi sa rājendro duḥkhaśokāpluto ’bhavat । yadaiva pitaraṁ vr̥ttam uttaṅkād aśr̥ṇot tadā ॥