Who speaks here दूत dūta · वैशंपायन vaiśaṃpāyana
English for this adhyāya (section level, not verse by verse): Ganguli’s translation, approximately §195–197 Ganguli follows a different edition, so the match is approximate.
दूत उवाच । जन्यार्थमन्नं द्रुपदेन राज्ञा; विवाहहेतोरुपसंस्कृतं च । तदाप्नुवध्वं कृतसर्वकार्याः; कृष्णा च तत्रैव चिरं न कार्यम् ॥
dūta uvāca । janyārtham annaṁ drupadena rājñā; vivāhahetor upasaṁskr̥taṁ ca । tad āpnuvadhvaṁ kr̥tasarvakāryāḥ; kr̥ṣṇā ca tatraiva ciraṁ na kāryam ॥
इमे रथाः काञ्चनपद्मचित्राः; सदश्वयुक्ता वसुधाधिपार्हाः । एतान्समारुह्य परैत सर्वे; पाञ्चालराजस्य निवेशनं तत् ॥
ime rathāḥ kāñcanapadmacitrāḥ; sadaśvayuktā vasudhādhipārhāḥ । etān samāruhya paraita sarve; pāñcālarājasya niveśanaṁ tat ॥
वैशंपायन उवाच । ततः प्रयाताः कुरुपुंगवास्ते; पुरोहितं तं प्रथमं प्रयाप्य । आस्थाय यानानि महान्ति तानि; कुन्ती च कृष्णा च सहैव याते ॥
vaiśaṁpāyana uvāca । tataḥ prayātāḥ kurupuṁgavās te; purohitaṁ taṁ prathamaṁ prayāpya । āsthāya yānāni mahānti tāni; kuntī ca kr̥ṣṇā ca sahaiva yāte ॥
श्रुत्वा तु वाक्यानि पुरोहितस्य; यान्युक्तवान्भारत धर्मराजः । जिज्ञासयैवाथ कुरूत्तमानां; द्रव्याण्यनेकान्युपसंजहार ॥
śrutvā tu vākyāni purohitasya; yāny uktavān bhārata dharmarājaḥ । jijñāsayaivātha kurūttamānāṁ; dravyāṇy anekāny upasaṁjahāra ॥
फलानि माल्यानि सुसंस्कृतानि; चर्माणि वर्माणि तथासनानि । गाश्चैव राजन्नथ चैव रज्जू;र्द्रव्याणि चान्यानि कृषीनिमित्तम् ॥
phalāni mālyāni susaṁskr̥tāni; carmāṇi varmāṇi tathāsanāni । gāś caiva rājann atha caiva rajjūr; dravyāṇi cānyāni kr̥ṣīnimittam ॥
अन्येषु शिल्पेषु च यान्यपि स्युः; सर्वाणि कॢप्तान्यखिलेन तत्र । क्रीडानिमित्तानि च यानि तानि; सर्वाणि तत्रोपजहार राजा ॥
anyeṣu śilpeṣu ca yāny api syuḥ; sarvāṇi kl̥ptāny akhilena tatra । krīḍānimittāni ca yāni tāni; sarvāṇi tatropajahāra rājā ॥
रथाश्ववर्माणि च भानुमन्ति; खड्गा महान्तोऽश्वरथाश्च चित्राः । धनूंषि चाग्र्याणि शराश्च मुख्याः; शक्त्यृष्टयः काञ्चनभूषिताश्च ॥
rathāśvavarmāṇi ca bhānumanti; khaḍgā mahānto ’śvarathāś ca citrāḥ । dhanūṁṣi cāgryāṇi śarāś ca mukhyāḥ; śaktyr̥ṣṭayaḥ kāñcanabhūṣitāś ca ॥
प्रासा भुशुण्ड्यश्च परश्वधाश्च; सांग्रामिकं चैव तथैव सर्वम् । शय्यासनान्युत्तमसंस्कृतानि; तथैव चासन्विविधानि तत्र ॥
prāsā bhuśuṇḍyaś ca paraśvadhāś ca; sāṁgrāmikaṁ caiva tathaiva sarvam । śayyāsanāny uttamasaṁskr̥tāni; tathaiva cāsan vividhāni tatra ॥
कुन्ती तु कृष्णां परिगृह्य साध्वी;मन्तःपुरं द्रुपदस्याविवेष । स्त्रियश्च तां कौरवराजपत्नीं; प्रत्यर्चयां चक्रुरदीनसत्त्वाः ॥
kuntī tu kr̥ṣṇāṁ parigr̥hya sādhvīm; antaḥpuraṁ drupadasyāviveṣa । striyaś ca tāṁ kauravarājapatnīṁ; pratyarcayāṁ cakrur adīnasattvāḥ ॥
तान्सिंहविक्रान्तगतीनवेक्ष्य; महर्षभाक्षानजिनोत्तरीयान् । गूढोत्तरांसान्भुजगेन्द्रभोग;प्रलम्बबाहून्पुरुषप्रवीरान् ॥
tān siṁhavikrāntagatīn avekṣya; maharṣabhākṣān ajinottarīyān । gūḍhottarāṁsān bhujagendrabhoga;pralambabāhūn puruṣapravīrān ॥
राजा च राज्ञः सचिवाश्च सर्वे; पुत्राश्च राज्ञः सुहृदस्तथैव । प्रेष्याश्च सर्वे निखिलेन राज;न्हर्षं समापेतुरतीव तत्र ॥
rājā ca rājñaḥ sacivāś ca sarve; putrāś ca rājñaḥ suhr̥das tathaiva । preṣyāś ca sarve nikhilena rājan; harṣaṁ samāpetur atīva tatra ॥
ते तत्र वीराः परमासनेषु; सपादपीठेष्वविशङ्कमानाः । यथानुपूर्व्या विविशुर्नराग्र्या;स्तदा महार्हेषु न विस्मयन्तः ॥
te tatra vīrāḥ paramāsaneṣu; sapādapīṭheṣv aviśaṅkamānāḥ । yathānupūrvyā viviśur narāgryās; tadā mahārheṣu na vismayantaḥ ॥
उच्चावचं पार्थिवभोजनीयं; पात्रीषु जाम्बूनदराजतीषु । दासाश्च दास्यश्च सुमृष्टवेषाः; भोजापकाश्चाप्युपजह्रुरन्नम् ॥
uccāvacaṁ pārthivabhojanīyaṁ; pātrīṣu jāmbūnadarājatīṣu । dāsāś ca dāsyaś ca sumr̥ṣṭaveṣāḥ; bhojāpakāś cāpy upajahrur annam ॥
ते तत्र भुक्त्वा पुरुषप्रवीरा; यथानुकामं सुभृशं प्रतीताः । उत्क्रम्य सर्वाणि वसूनि तत्र; सांग्रामिकान्याविविशुर्नृवीराः ॥
te tatra bhuktvā puruṣapravīrā; yathānukāmaṁ subhr̥śaṁ pratītāḥ । utkramya sarvāṇi vasūni tatra; sāṁgrāmikāny āviviśur nr̥vīrāḥ ॥
तल्लक्षयित्वा द्रुपदस्य पुत्रो; राजा च सर्वैः सह मन्त्रिमुख्यैः । समर्चयामासुरुपेत्य हृष्टाः; कुन्तीसुतान्पार्थिवपुत्रपौत्रान् ॥
tal lakṣayitvā drupadasya putro; rājā ca sarvaiḥ saha mantrimukhyaiḥ । samarcayām āsur upetya hr̥ṣṭāḥ; kuntīsutān pārthivaputrapautrān ॥