Who speaks here वैशंपायन vaiśaṃpāyana
English for this adhyāya (section level, not verse by verse): Ganguli’s translation, approximately §192–194 Ganguli follows a different edition, so the match is approximate.
वैशंपायन उवाच । भ्रातुर्वचस्तत्प्रसमीक्ष्य सर्वे; ज्येष्ठस्य पाण्डोस्तनयास्तदानीम् । तमेवार्थं ध्यायमाना मनोभि;रासां चक्रुरथ तत्रामितौजाः ॥
vaiśaṁpāyana uvāca । bhrātur vacas tat prasamīkṣya sarve; jyeṣṭhasya pāṇḍos tanayās tadānīm । tam evārthaṁ dhyāyamānā manobhir; āsāṁ cakrur atha tatrāmitaujāḥ ॥
वृष्णिप्रवीरस्तु कुरुप्रवीरा;नाशङ्कमानः सहरौहिणेयः । जगाम तां भार्गवकर्मशालां; यत्रासते ते पुरुषप्रवीराः ॥
vr̥ṣṇipravīras tu kurupravīrān; āśaṅkamānaḥ saharauhiṇeyaḥ । jagāma tāṁ bhārgavakarmaśālāṁ; yatrāsate te puruṣapravīrāḥ ॥
तत्रोपविष्टं पृथुदीर्घबाहुं; ददर्श कृष्णः सहरौहिणेयः । अजातशत्रुं परिवार्य तांश्च; उपोपविष्टाञ्ज्वलनप्रकाशान् ॥
tatropaviṣṭaṁ pr̥thudīrghabāhuṁ; dadarśa kr̥ṣṇaḥ saharauhiṇeyaḥ । ajātaśatruṁ parivārya tāṁś ca; upopaviṣṭāñ jvalanaprakāśān ॥
ततोऽब्रवीद्वासुदेवोऽभिगम्य; कुन्तीसुतं धर्मभृतां वरिष्ठम् । कृष्णोऽहमस्मीति निपीड्य पादौ; युधिष्ठिरस्याजमीढस्य राज्ञः ॥
tato ’bravīd vāsudevo ’bhigamya; kuntīsutaṁ dharmabhr̥tāṁ variṣṭham । kr̥ṣṇo ’ham asmīti nipīḍya pādau; yudhiṣṭhirasyājamīḍhasya rājñaḥ ॥
तथैव तस्याप्यनु रौहिणेय;स्तौ चापि हृष्टाः कुरवोऽभ्यनन्दन् । पितृष्वसुश्चापि यदुप्रवीरा;वगृह्णतां भारतमुख्य पादौ ॥
tathaiva tasyāpy anu rauhiṇeyas; tau cāpi hr̥ṣṭāḥ kuravo ’bhyanandan । pitr̥ṣvasuś cāpi yadupravīrāv; agr̥hṇatāṁ bhāratamukhya pādau ॥
अजातशत्रुश्च कुरुप्रवीरः; पप्रच्छ कृष्णं कुशलं निवेद्य । कथं वयं वासुदेव त्वयेह; गूढा वसन्तो विदिताः स्म सर्वे ॥
ajātaśatruś ca kurupravīraḥ; papraccha kr̥ṣṇaṁ kuśalaṁ nivedya । kathaṁ vayaṁ vāsudeva tvayeha; gūḍhā vasanto viditāḥ sma sarve ॥
तमब्रवीद्वासुदेवः प्रहस्य; गूढोऽप्यग्निर्ज्ञायत एव राजन् । तं विक्रमं पाण्डवेयानतीत्य; कोऽन्यः कर्ता विद्यते मानुषेषु ॥
tam abravīd vāsudevaḥ prahasya; gūḍho ’py agnir jñāyata eva rājan । taṁ vikramaṁ pāṇḍaveyānatītya; ko ’nyaḥ kartā vidyate mānuṣeṣu ॥
दिष्ट्या तस्मात्पावकात्संप्रमुक्ता; यूयं सर्वे पाण्डवाः शत्रुसाहाः । दिष्ट्या पापो धृतराष्ट्रस्य पुत्रः; सहामात्यो न सकामोऽभविष्यत् ॥
diṣṭyā tasmāt pāvakāt saṁpramuktā; yūyaṁ sarve pāṇḍavāḥ śatrusāhāḥ । diṣṭyā pāpo dhr̥tarāṣṭrasya putraḥ; sahāmātyo na sakāmo ’bhaviṣyat ॥
भद्रं वोऽस्तु निहितं यद्गुहायां; विवर्धध्वं ज्वलन इवेध्यमानः । मा वो विद्युः पार्थिवाः केचनेह; यास्यावहे शिबिरायैव तावत् । सोऽनुज्ञातः पाण्डवेनाव्ययश्रीः; प्रायाच्छीघ्रं बलदेवेन सार्धम् ॥
bhadraṁ vo ’stu nihitaṁ yad guhāyāṁ; vivardhadhvaṁ jvalana ivedhyamānaḥ । mā vo vidyuḥ pārthivāḥ ke caneha; yāsyāvahe śibirāyaiva tāvat । so ’nujñātaḥ pāṇḍavenāvyayaśrīḥ; prāyāc chīghraṁ baladevena sārdham ॥