Adhyāya 177

धृष्टद्युम्न उवाच । दुर्योधनो दुर्विषहो दुर्मुखो दुष्प्रधर्षणः । विविंशतिर्विकर्णश्च सहो दुःशासनः समः ॥

dhr̥ṣṭadyumna uvāca । duryodhano durviṣaho durmukho duṣpradharṣaṇaḥ । viviṁśatir vikarṇaś ca saho duḥśāsanaḥ samaḥ ॥

युयुत्सुर्वातवेगश्च भीमवेगधरस्तथा । उग्रायुधो बलाकी च कनकायुर्विरोचनः ॥

yuyutsur vātavegaś ca bhīmavegadharas tathā । ugrāyudho balākī ca kanakāyur virocanaḥ ॥

सुकुण्डलश्चित्रसेनः सुवर्चाः कनकध्वजः । नन्दको बाहुशाली च कुण्डजो विकटस्तथा ॥

sukuṇḍalaś citrasenaḥ suvarcāḥ kanakadhvajaḥ । nandako bāhuśālī ca kuṇḍajo vikaṭas tathā ॥

एते चान्ये च बहवो धार्तराष्ट्रा महाबलाः । कर्णेन सहिता वीरास्त्वदर्थं समुपागताः । शतसंख्या महात्मानः प्रथिताः क्षत्रियर्षभाः ॥

ete cānye ca bahavo dhārtarāṣṭrā mahābalāḥ । karṇena sahitā vīrās tvadarthaṁ samupāgatāḥ । śatasaṁkhyā mahātmānaḥ prathitāḥ kṣatriyarṣabhāḥ ॥

शकुनिश्च बलश्चैव वृषकोऽथ बृहद्बलः । एते गान्धारराजस्य सुताः सर्वे समागताः ॥

śakuniś ca balaś caiva vr̥ṣako ’tha br̥hadbalaḥ । ete gāndhārarājasya sutāḥ sarve samāgatāḥ ॥

अश्वत्थामा च भोजश्च सर्वशस्त्रभृतां वरौ । समवेतौ महात्मानौ त्वदर्थे समलंकृतौ ॥

aśvatthāmā ca bhojaś ca sarvaśastrabhr̥tāṁ varau । samavetau mahātmānau tvadarthe samalaṁkr̥tau ॥

बृहन्तो मणिमांश्चैव दण्डधारश्च वीर्यवान् । सहदेवो जयत्सेनो मेघसंधिश्च मागधः ॥

br̥hanto maṇimāṁś caiva daṇḍadhāraś ca vīryavān । sahadevo jayatseno meghasaṁdhiś ca māgadhaḥ ॥

विराटः सह पुत्राभ्यां शङ्खेनैवोत्तरेण च । वार्धक्षेमिः सुवर्चाश्च सेनाबिन्दुश्च पार्थिवः ॥

virāṭaḥ saha putrābhyāṁ śaṅkhenaivottareṇa ca । vārdhakṣemiḥ suvarcāś ca senābinduś ca pārthivaḥ ॥

अभिभूः सह पुत्रेण सुदाम्ना च सुवर्चसा । सुमित्रः सुकुमारश्च वृकः सत्यधृतिस्तथा ॥

abhibhūḥ saha putreṇa sudāmnā ca suvarcasā । sumitraḥ sukumāraś ca vr̥kaḥ satyadhr̥tis tathā ॥

सूर्यध्वजो रोचमानो नीलश्चित्रायुधस्तथा । अंशुमांश्चेकितानश्च श्रेणिमांश्च महाबलः ॥

sūryadhvajo rocamāno nīlaś citrāyudhas tathā । aṁśumāṁś cekitānaś ca śreṇimāṁś ca mahābalaḥ ॥

समुद्रसेनपुत्रश्च चन्द्रसेनः प्रतापवान् । जलसंधः पितापुत्रौ सुदण्डो दण्ड एव च ॥

samudrasenaputraś ca candrasenaḥ pratāpavān । jalasaṁdhaḥ pitāputrau sudaṇḍo daṇḍa eva ca ॥

पौण्ड्रको वासुदेवश्च भगदत्तश्च वीर्यवान् । कलिङ्गस्ताम्रलिप्तश्च पत्तनाधिपतिस्तथा ॥

pauṇḍrako vāsudevaś ca bhagadattaś ca vīryavān । kaliṅgas tāmraliptaś ca pattanādhipatis tathā ॥

मद्रराजस्तथा शल्यः सहपुत्रो महारथः । रुक्माङ्गदेन वीरेण तथा रुक्मरथेन च ॥

madrarājas tathā śalyaḥ sahaputro mahārathaḥ । rukmāṅgadena vīreṇa tathā rukmarathena ca ॥

कौरव्यः सोमदत्तश्च पुत्राश्चास्य महारथाः । समवेतास्त्रयः शूरा भूरिर्भूरिश्रवाः शलः ॥

kauravyaḥ somadattaś ca putrāś cāsya mahārathāḥ । samavetās trayaḥ śūrā bhūrir bhūriśravāḥ śalaḥ ॥

सुदक्षिणश्च काम्बोजो दृढधन्वा च कौरवः । बृहद्बलः सुषेणश्च शिबिरौशीनरस्तथा ॥

sudakṣiṇaś ca kāmbojo dr̥ḍhadhanvā ca kauravaḥ । br̥hadbalaḥ suṣeṇaś ca śibir auśīnaras tathā ॥

संकर्षणो वासुदेवो रौक्मिणेयश्च वीर्यवान् । साम्बश्च चारुदेष्णश्च सारणोऽथ गदस्तथा ॥

saṁkarṣaṇo vāsudevo raukmiṇeyaś ca vīryavān । sāmbaś ca cārudeṣṇaś ca sāraṇo ’tha gadas tathā ॥

अक्रूरः सात्यकिश्चैव उद्धवश्च महाबलः । कृतवर्मा च हार्दिक्यः पृथुर्विपृथुरेव च ॥

akrūraḥ sātyakiś caiva uddhavaś ca mahābalaḥ । kr̥tavarmā ca hārdikyaḥ pr̥thur vipr̥thur eva ca ॥

विडूरथश्च कङ्कश्च समीकः सारमेजयः । वीरो वातपतिश्चैव झिल्ली पिण्डारकस्तथा । उशीनरश्च विक्रान्तो वृष्णयस्ते प्रकीर्तिताः ॥

viḍūrathaś ca kaṅkaś ca samīkaḥ sāramejayaḥ । vīro vātapatiś caiva jhillī piṇḍārakas tathā । uśīnaraś ca vikrānto vr̥ṣṇayas te prakīrtitāḥ ॥

भगीरथो बृहत्क्षत्रः सैन्धवश्च जयद्रथः । बृहद्रथो बाह्लिकश्च श्रुतायुश्च महारथः ॥

bhagīratho br̥hatkṣatraḥ saindhavaś ca jayadrathaḥ । br̥hadratho bāhlikaś ca śrutāyuś ca mahārathaḥ ॥

उलूकः कैतवो राजा चित्राङ्गदशुभाङ्गदौ । वत्सराजश्च धृतिमान्कोसलाधिपतिस्तथा ॥

ulūkaḥ kaitavo rājā citrāṅgadaśubhāṅgadau । vatsarājaś ca dhr̥timān kosalādhipatis tathā ॥

एते चान्ये च बहवो नानाजनपदेश्वराः । त्वदर्थमागता भद्रे क्षत्रियाः प्रथिता भुवि ॥

ete cānye ca bahavo nānājanapadeśvarāḥ । tvadartham āgatā bhadre kṣatriyāḥ prathitā bhuvi ॥

एते वेत्स्यन्ति विक्रान्तास्त्वदर्थं लक्ष्यमुत्तमम् । विध्येत य इमं लक्ष्यं वरयेथाः शुभेऽद्य तम् ॥

ete vetsyanti vikrāntās tvadarthaṁ lakṣyam uttamam । vidhyeta ya imaṁ lakṣyaṁ varayethāḥ śubhe ’dya tam ॥