Sarga 75

ततो ऽब्रवीन्महातेजाः सुग्रीवो वानराधिपः । अर्थ्यं विज्ञापयंश्चापि हनुमन्तमिदं वचः ।। ६.७५. ॥

tato 'bravīnmahātejāḥ sugrīvo vānarādhipaḥ | arthyaṃ vijñāpayaṃścāpi hanumantamidaṃ vacaḥ || 6.75. ||

यतो हतः कुम्भकर्णः कुमाराश्च निषूदिताः । नेदानीमुपनिर्हारं रावणो दातुमर्हति ।। ६.७५. ॥

yato hataḥ kumbhakarṇaḥ kumārāśca niṣūditāḥ | nedānīmupanirhāraṃ rāvaṇo dātumarhati || 6.75. ||

ये ये महाबलाः सन्ति लघवश्च प्लवङ्गमाः । लङ्कामभ्युत्पतन्त्वाशु गृह्योल्काः प्लवगर्षभाः ।। ६.७५. ॥

ye ye mahābalāḥ santi laghavaśca plavaṅgamāḥ | laṅkāmabhyutpatantvāśu gṛhyolkāḥ plavagarṣabhāḥ || 6.75. ||

ततो ऽस्तं गत आदित्ये रौद्रे तस्मिन्निशामुखे । लङ्कामभिमुखाः सोल्का जग्मुस्ते प्लवगर्षभाः ।। ६.७५. ॥

tato 'staṃ gata āditye raudre tasminniśāmukhe | laṅkāmabhimukhāḥ solkā jagmuste plavagarṣabhāḥ || 6.75. ||

उल्काहस्तैर्हरिगणैः सर्वतः समभिद्रुताः । आरक्षस्था विरूपाक्षाः सहसा विप्रदुद्रुवुः ।। ६.७५. ॥

ulkāhastairharigaṇaiḥ sarvataḥ samabhidrutāḥ | ārakṣasthā virūpākṣāḥ sahasā vipradudruvuḥ || 6.75. ||

गोपुराट्टप्रतोलीषु चर्यासु विविधासु च । प्रासादेषु च संहृष्टाः ससृजुस्ते हुताशनम्। तेषां गृहसस्राणि ददाह हुतभुक् तदा ।। ६.७५. ॥

gopurāṭṭapratolīṣu caryāsu vividhāsu ca | prāsādeṣu ca saṃhṛṣṭāḥ sasṛjuste hutāśanam| teṣāṃ gṛhasasrāṇi dadāha hutabhuk tadā || 6.75. ||

प्रासादाः पर्वताकाराः पतन्ति धरणीतले । अगरुर्दह्यते तत्र वर च हरिचन्दनम् ।। ६.७५. ॥

prāsādāḥ parvatākārāḥ patanti dharaṇītale | agarurdahyate tatra vara ca haricandanam || 6.75. ||

मौक्तिका मणयः स्निग्धा वज्रं चापि प्रवालकम् । क्षौमं च दह्यते तत्र कौशेयं चापि शोभनम् ।। ६.७५. ॥

mauktikā maṇayaḥ snigdhā vajraṃ cāpi pravālakam | kṣaumaṃ ca dahyate tatra kauśeyaṃ cāpi śobhanam || 6.75. ||

आविकं विविधं चौर्णं काञ्चनं भाण्डमायुधम् । नानाविकृतसंस्थानं वाजिभाण्डपरिच्छदौ ।। ६.७५. ॥

āvikaṃ vividhaṃ caurṇaṃ kāñcanaṃ bhāṇḍamāyudham | nānāvikṛtasaṃsthānaṃ vājibhāṇḍaparicchadau || 6.75. ||

गजग्रैवेयकक्ष्याश्च रथभाण्डाश्च संस्कृताः । तनुत्राणि च योधानां हस्त्यश्वानां च वर्म च ।। ६.७५. ॥

gajagraiveyakakṣyāśca rathabhāṇḍāśca saṃskṛtāḥ | tanutrāṇi ca yodhānāṃ hastyaśvānāṃ ca varma ca || 6.75. ||

खड्गा धनूंषि ज्याबाणास्तोमराङ्कुशशक्तयः । रोमजं वालजं चर्म व्याघ्रजं चाण्डजं बहु ।। ६.७५. ॥

khaḍgā dhanūṃṣi jyābāṇāstomarāṅkuśaśaktayaḥ | romajaṃ vālajaṃ carma vyāghrajaṃ cāṇḍajaṃ bahu || 6.75. ||

मुक्तामणिविचित्रांश्च प्रासादांश्च समन्ततः । विविधानस्त्रसंयोगानग्निर्दहति तत्र वै ।। ६.७५. ॥

muktāmaṇivicitrāṃśca prāsādāṃśca samantataḥ | vividhānastrasaṃyogānagnirdahati tatra vai || 6.75. ||

नानाविधान् गृहच्छन्दान् ददाह हुतभूक् तदा । आवासान् राक्षसानां च सर्वेषां गृहगर्धिनाम् ।। ६.७५. ॥

nānāvidhān gṛhacchandān dadāha hutabhūk tadā | āvāsān rākṣasānāṃ ca sarveṣāṃ gṛhagardhinām || 6.75. ||

हेमचित्रतनुत्राणां स्रग्दामाम्बरधारिणाम् । शीधुपानचलाक्षाणां मदविह्वलगामिनाम् ।। ६.७५. ॥

hemacitratanutrāṇāṃ sragdāmāmbaradhāriṇām | śīdhupānacalākṣāṇāṃ madavihvalagāminām || 6.75. ||

कान्तालम्बितवस्त्राणां शत्रुसञ्जातमन्युनाम् । गदाशूलासिहस्तानां खादतां पिबतामपि ।। ६.७५. ॥

kāntālambitavastrāṇāṃ śatrusañjātamanyunām | gadāśūlāsihastānāṃ khādatāṃ pibatāmapi || 6.75. ||

शयनेषु महार्हेषु प्रसुप्तानां प्रियैः सह । त्रस्तानां गच्छतां तूर्णं पुत्रानादाय सर्वतः ।। ६.७५. ॥

śayaneṣu mahārheṣu prasuptānāṃ priyaiḥ saha | trastānāṃ gacchatāṃ tūrṇaṃ putrānādāya sarvataḥ || 6.75. ||

तेषां शतसहस्राणि तदा लङ्कानिवासिनाम् । अदहत् पावकस्तत्र जज्वाल च पुनःपुनः ।। ६.७५. ॥

teṣāṃ śatasahasrāṇi tadā laṅkānivāsinām | adahat pāvakastatra jajvāla ca punaḥpunaḥ || 6.75. ||

सारवन्ति महार्हाणि गम्भीरगुणवन्ति च । हेमचन्द्रार्धचन्द्राणि चन्द्रशालोन्नतानि च ।। ६.७५. ॥

sāravanti mahārhāṇi gambhīraguṇavanti ca | hemacandrārdhacandrāṇi candraśālonnatāni ca || 6.75. ||

रत्नचित्रगवाक्षाणि साधिष्ठानानि सर्वशः । मणिविद्रुमचित्राणि स्पृशन्तीव दिवाकरम् ।। ६.७५. ॥

ratnacitragavākṣāṇi sādhiṣṭhānāni sarvaśaḥ | maṇividrumacitrāṇi spṛśantīva divākaram || 6.75. ||

क्रौञ्चबर्हिणवीणानां भूषणानां च निस्वनैः । नादितान्यचला भानि वेश्मान्यग्निर्ददाह सः ।। ६.७५. ॥

krauñcabarhiṇavīṇānāṃ bhūṣaṇānāṃ ca nisvanaiḥ | nāditānyacalā bhāni veśmānyagnirdadāha saḥ || 6.75. ||

ज्वलनेन परीतानि तोरणानि चकाशिरे । विद्युद्भिरिव नद्धानि मेघजालानि धर्मगे ।। ६.७५. ॥

jvalanena parītāni toraṇāni cakāśire | vidyudbhiriva naddhāni meghajālāni dharmage || 6.75. ||

ज्वलनेन परीतानि निपेतुर्भवनान्यथ । वज्रिवज्रहतानीव शिखराणि महागिरेः ।। ६.७५. ॥

jvalanena parītāni nipeturbhavanānyatha | vajrivajrahatānīva śikharāṇi mahāgireḥ || 6.75. ||

विमानेषु प्रसुप्ताश्च दह्यमाना वराङ्गनाः । त्यक्ताभरणसर्वाङ्गा हा हेत्युच्चैर्विचुक्रुशुः ।। ६.७५. ॥

vimāneṣu prasuptāśca dahyamānā varāṅganāḥ | tyaktābharaṇasarvāṅgā hā hetyuccairvicukruśuḥ || 6.75. ||

तानि निर्दह्यमानानि दूरतः प्रचकाशिरे । हिमवच्छिखराणीव दीप्तौषधिवनानि च ।। ६.७५. ॥

tāni nirdahyamānāni dūrataḥ pracakāśire | himavacchikharāṇīva dīptauṣadhivanāni ca || 6.75. ||

हर्म्याग्रैर्दह्यमानैश्च ज्वालाप्रज्वलितैरपि । रात्रौ सा दृश्यते लङ्का पुष्पितैरिव किंशुकैः ।। ६.७५. ॥

harmyāgrairdahyamānaiśca jvālāprajvalitairapi | rātrau sā dṛśyate laṅkā puṣpitairiva kiṃśukaiḥ || 6.75. ||

हस्त्यध्यक्षैर्गजैर्मुक्तैर्मुक्तैश्च तुरगैरपि । बभूव लङ्का लोकान्ते भ्रान्तग्राह इवार्णवः ।। ६.७५. ॥

hastyadhyakṣairgajairmuktairmuktaiśca turagairapi | babhūva laṅkā lokānte bhrāntagrāha ivārṇavaḥ || 6.75. ||

अश्वं मुक्तं गजो दृष्ट्वा क्वचिद्भीतो ऽपसर्पति । भीतो भीतं गजं दृष्ट्वा क्वचिदश्वो निवर्तते ।। ६.७५. ॥

aśvaṃ muktaṃ gajo dṛṣṭvā kvacidbhīto 'pasarpati | bhīto bhītaṃ gajaṃ dṛṣṭvā kvacidaśvo nivartate || 6.75. ||

लङ्कायां दह्यमानायां शुशुभे स महार्णवः । छायासंसक्तसलिलो लोहितोद इवार्णवः ।। ६.७५. ॥

laṅkāyāṃ dahyamānāyāṃ śuśubhe sa mahārṇavaḥ | chāyāsaṃsaktasalilo lohitoda ivārṇavaḥ || 6.75. ||

सा बभूव मुहूर्तेन हरिभिर्दीपिता पुरी । लोकस्यास्य क्षये घोरे प्रदीप्तेव वसुन्धरा ।। ६.७५. ॥

sā babhūva muhūrtena haribhirdīpitā purī | lokasyāsya kṣaye ghore pradīpteva vasundharā || 6.75. ||

नारीजनस्य धूमेन व्याप्तस्योच्चैर्विनेदुषः । स्वनो ज्वलनतप्तस्य शुश्रुवे दशयोजनम् ।। ६.७५. ॥

nārījanasya dhūmena vyāptasyoccairvineduṣaḥ | svano jvalanataptasya śuśruve daśayojanam || 6.75. ||

प्रदग्धकायानपरान् राक्षसान्निर्गतान् बहिः । सहसा ऽभ्युत्पतन्ति स्म हरयो ऽथ युयुत्सवः ।। ६.७५. ॥

pradagdhakāyānaparān rākṣasānnirgatān bahiḥ | sahasā 'bhyutpatanti sma harayo 'tha yuyutsavaḥ || 6.75. ||

उद्घुष्टं वानराणां च राक्षसानां च निस्वनः । दिशो दश समुद्रं च पृथिवीं चान्वनादयत् ।। ६.७५. ॥

udghuṣṭaṃ vānarāṇāṃ ca rākṣasānāṃ ca nisvanaḥ | diśo daśa samudraṃ ca pṛthivīṃ cānvanādayat || 6.75. ||

विशल्यौ तु महात्मानौ तावुभौ रामलक्ष्मणौ । असम्भ्रान्तौ जगृहतुस्तदोभे धनुषी वरे ।। ६.७५. ॥

viśalyau tu mahātmānau tāvubhau rāmalakṣmaṇau | asambhrāntau jagṛhatustadobhe dhanuṣī vare || 6.75. ||

ततो विष्फारयानस्य रामस्य धनुरुत्तमम् । बभूव तुमुलः शब्दो राक्षसानां भयावहः ।। ६.७५. ॥

tato viṣphārayānasya rāmasya dhanuruttamam | babhūva tumulaḥ śabdo rākṣasānāṃ bhayāvahaḥ || 6.75. ||

अशोभत तदा रामो धनुर्विष्फारयन् महत् । भगवानिव सङ्क्रुद्धो भवो वेदमयं धनुः ।। ६.७५. ॥

aśobhata tadā rāmo dhanurviṣphārayan mahat | bhagavāniva saṅkruddho bhavo vedamayaṃ dhanuḥ || 6.75. ||

उद्घुष्टं वानराणां च राक्षसानां च निस्वनम् । ज्याशब्दस्तावुभौ शब्दावति रामस्य शुश्रुवे ।। ६.७५. ॥

udghuṣṭaṃ vānarāṇāṃ ca rākṣasānāṃ ca nisvanam | jyāśabdastāvubhau śabdāvati rāmasya śuśruve || 6.75. ||

वानरोद्घुष्टघोषश्च राक्षसानां च निस्वनः । ज्याशब्दश्चापि रामस्य त्रयं व्याप दिशो दश ।। ६.७५. ॥

vānarodghuṣṭaghoṣaśca rākṣasānāṃ ca nisvanaḥ | jyāśabdaścāpi rāmasya trayaṃ vyāpa diśo daśa || 6.75. ||

तस्य कार्मुकमुक्तैश्च शरैस्तत्पुरगोपुरम् । कैलासशृङ्गप्रतिमं विकीर्णमपतद्भुवि ।। ६.७५. ॥

tasya kārmukamuktaiśca śaraistatpuragopuram | kailāsaśṛṅgapratimaṃ vikīrṇamapatadbhuvi || 6.75. ||

ततो रामशरान् दृष्ट्वा विमानेषु गृहेषु च । सन्नाहो राक्षसेन्द्राणां तुमुलः समपद्यत ।। ६.७५. ॥

tato rāmaśarān dṛṣṭvā vimāneṣu gṛheṣu ca | sannāho rākṣasendrāṇāṃ tumulaḥ samapadyata || 6.75. ||

तेषां सन्नह्यमानानां सिंहनादं च कुर्वताम् । शर्वरी राक्षसेन्द्राणां रौद्रीव समपद्यत ।। ६.७५. ॥

teṣāṃ sannahyamānānāṃ siṃhanādaṃ ca kurvatām | śarvarī rākṣasendrāṇāṃ raudrīva samapadyata || 6.75. ||

आदिष्टा वानरेन्द्रास्तु सुग्रीवेण महात्मना । आसन्नद्वारमासाद्य युध्यध्वं प्लवगर्षभाः ।। ६.७५. ॥

ādiṣṭā vānarendrāstu sugrīveṇa mahātmanā | āsannadvāramāsādya yudhyadhvaṃ plavagarṣabhāḥ || 6.75. ||

यश्च वो वितथं कुर्यात्तत्र तत्र ह्युपस्थितः । स हन्तव्यो हि सम्प्लुत्य राजशासनदूषकः ।। ६.७५. ॥

yaśca vo vitathaṃ kuryāttatra tatra hyupasthitaḥ | sa hantavyo hi samplutya rājaśāsanadūṣakaḥ || 6.75. ||

तेषु वानरमुख्येषु दीप्तोल्कोज्ज्वलपाणिषु । स्थितेषु द्वारमासाद्य रावणं मन्युराविशत् ।। ६.७५. ॥

teṣu vānaramukhyeṣu dīptolkojjvalapāṇiṣu | sthiteṣu dvāramāsādya rāvaṇaṃ manyurāviśat || 6.75. ||

तस्य जृम्भितविक्षेपाद्व्यामिश्रा वै दिशो दश । रूपवानिव रुद्रस्य मन्युर्गात्रेष्वदृश्यत ।। ६.७५. ॥

tasya jṛmbhitavikṣepādvyāmiśrā vai diśo daśa | rūpavāniva rudrasya manyurgātreṣvadṛśyata || 6.75. ||

स निकुम्भं च कुम्भं च कुम्भकर्णात्मजावुभौ । प्रेषयामास सङ्क्रुद्धो राक्षसैर्बहुभिः सह ।। ६.७५. ॥

sa nikumbhaṃ ca kumbhaṃ ca kumbhakarṇātmajāvubhau | preṣayāmāsa saṅkruddho rākṣasairbahubhiḥ saha || 6.75. ||

यूपाक्षः शोणिताक्षश्च प्रजङ्घः कम्पनस्तथा । निर्ययुः कौम्भकर्णिभ्यां सह रावणशासनात् ।। ६.७५. ॥

yūpākṣaḥ śoṇitākṣaśca prajaṅghaḥ kampanastathā | niryayuḥ kaumbhakarṇibhyāṃ saha rāvaṇaśāsanāt || 6.75. ||

शशास चैव तान् सर्वान् राक्षसान् सुमहाबलान् । नादयन् गच्छतात्रैव जयध्वं शीघ्रमेव च ।। ६.७५. ॥

śaśāsa caiva tān sarvān rākṣasān sumahābalān | nādayan gacchatātraiva jayadhvaṃ śīghrameva ca || 6.75. ||

ततस्तु चोदितास्तेन राक्षसा ज्वलितायुधाः । लङ्काया निर्ययुर्वीराः प्रणदन्तः पुनःपुनः ।। ६.७५. ॥

tatastu coditāstena rākṣasā jvalitāyudhāḥ | laṅkāyā niryayurvīrāḥ praṇadantaḥ punaḥpunaḥ || 6.75. ||

रक्षसां भूषणस्थाभिर्भाभिः स्वाभिश्च सर्वशः । चक्रुस्ते सप्रभं व्योम हरयश्चाग्निभिः सह ।। ६.७५. ॥

rakṣasāṃ bhūṣaṇasthābhirbhābhiḥ svābhiśca sarvaśaḥ | cakruste saprabhaṃ vyoma harayaścāgnibhiḥ saha || 6.75. ||

तत्र ताराधिपस्याभा ताराणां च तथैव च । तयोराभरणस्था च बलयोर्द्यामभासयन् ।। ६.७५. ॥

tatra tārādhipasyābhā tārāṇāṃ ca tathaiva ca | tayorābharaṇasthā ca balayordyāmabhāsayan || 6.75. ||

चन्द्राभा भूषणाभा च गृहाणां ज्वलतां च भा । हरिराक्षससैन्यानि भ्राजयामास सर्वतः ।। ६.७५. ॥

candrābhā bhūṣaṇābhā ca gṛhāṇāṃ jvalatāṃ ca bhā | harirākṣasasainyāni bhrājayāmāsa sarvataḥ || 6.75. ||

तत्र चोर्ध्वं प्रदीप्तानां गृहाणां सागरः पुनः । भाभिः संसक्तपातालश्चलोर्मिः शुशुबे ऽधिकम् ।। ६.७५. ॥

tatra cordhvaṃ pradīptānāṃ gṛhāṇāṃ sāgaraḥ punaḥ | bhābhiḥ saṃsaktapātālaścalormiḥ śuśube 'dhikam || 6.75. ||

पताकाध्वजसंसक्तमुत्तमासिपरश्वधम् । भीमाश्वरथमातङ्गं नानापत्तिसमाकुलम् ।। ६.७५. ॥

patākādhvajasaṃsaktamuttamāsiparaśvadham | bhīmāśvarathamātaṅgaṃ nānāpattisamākulam || 6.75. ||

दीप्तशूलगदाखड्गप्रासतोमरकार्मुकम् । तद्राक्षसबलं घोरं भीमविक्रमपौरुषम् ।। ६.७५. ॥

dīptaśūlagadākhaḍgaprāsatomarakārmukam | tadrākṣasabalaṃ ghoraṃ bhīmavikramapauruṣam || 6.75. ||

ददृशो ज्वलितप्रासं किङ्किणीशतनादितम् । हेमजालाचितभुजं व्यामिश्रितपरश्वधम् ।। ६.७५. ॥

dadṛśo jvalitaprāsaṃ kiṅkiṇīśatanāditam | hemajālācitabhujaṃ vyāmiśritaparaśvadham || 6.75. ||

व्याघूर्णितमहाशस्त्रं बाणसंसक्तकार्मुकम् । गन्धमाल्यमधूत्सेकसम्मोदितमहानिलम् ।। ६.७५. ॥

vyāghūrṇitamahāśastraṃ bāṇasaṃsaktakārmukam | gandhamālyamadhūtsekasammoditamahānilam || 6.75. ||

घोरं शूरजनाकीर्णं महाम्बुधरनिस्वनम् । । ६.७५. ॥

ghoraṃ śūrajanākīrṇaṃ mahāmbudharanisvanam | | 6.75. ||

तद्दृष्ट्वा बलमायान्तं राक्षसानां सुदारुणम् । सञ्चचाल प्लवङ्गानां बलमुच्चैर्ननाद च ।। ६.७५. ॥

taddṛṣṭvā balamāyāntaṃ rākṣasānāṃ sudāruṇam | sañcacāla plavaṅgānāṃ balamuccairnanāda ca || 6.75. ||

जवेनाप्लुत्य च पुनस्तद्बलं रक्षसां महत् । अभ्ययात् प्रत्यरिबलं पतङ्गा इव पावकम् ।। ६.७५. ॥

javenāplutya ca punastadbalaṃ rakṣasāṃ mahat | abhyayāt pratyaribalaṃ pataṅgā iva pāvakam || 6.75. ||

तेषां भुजपरामर्शव्यामृष्टपरिघाशनि । राक्षसानां बलं श्रेष्ठं भूयस्तरमशोभत ।। ६.७५. ॥

teṣāṃ bhujaparāmarśavyāmṛṣṭaparighāśani | rākṣasānāṃ balaṃ śreṣṭhaṃ bhūyastaramaśobhata || 6.75. ||

तत्रोन्मत्ता इवोत्पेतुर्हरयो ऽथ युयुत्सवः । तरुशैलैरभिघ्नन्तो मुष्टिभिश्च निशाचरान् ।। ६.७५. ॥

tatronmattā ivotpeturharayo 'tha yuyutsavaḥ | taruśailairabhighnanto muṣṭibhiśca niśācarān || 6.75. ||

तथैवापततां तेषां कपीनामसिभिः शितैः । शिरांसि सहसा जह्नू राक्षसा भीमदर्शनाः ।। ६.७५. ॥

tathaivāpatatāṃ teṣāṃ kapīnāmasibhiḥ śitaiḥ | śirāṃsi sahasā jahnū rākṣasā bhīmadarśanāḥ || 6.75. ||

दशनैर्हृतकर्णाश्च मुष्टिनिष्कीर्णमस्तकाः । शिलाप्रहारभग्नाङ्गा विचेरुस्तत्र राक्षसाः ।। ६.७५. ॥

daśanairhṛtakarṇāśca muṣṭiniṣkīrṇamastakāḥ | śilāprahārabhagnāṅgā vicerustatra rākṣasāḥ || 6.75. ||

तथैवाप्यपरे तेषां कपीनामभिलक्षिताः । प्रवीरानभितो जघ्नू राक्षसानां तरस्विनाम् ।। ६.७५. ॥

tathaivāpyapare teṣāṃ kapīnāmabhilakṣitāḥ | pravīrānabhito jaghnū rākṣasānāṃ tarasvinām || 6.75. ||

तथैवाप्यपरे तेषां कपीनामसिभिः शितैः । हरिवीरान्निजघ्नुश्च घोररूपा निशाचराः ।। ६.७५. ॥

tathaivāpyapare teṣāṃ kapīnāmasibhiḥ śitaiḥ | harivīrānnijaghnuśca ghorarūpā niśācarāḥ || 6.75. ||

घ्नन्तमन्यं जघानान्यः पातयन्तमपातयत् । गर्हमाणं जगर्हे ऽन्यो दशन्तमपरो ऽदशत् ।। ६.७५. ॥

ghnantamanyaṃ jaghānānyaḥ pātayantamapātayat | garhamāṇaṃ jagarhe 'nyo daśantamaparo 'daśat || 6.75. ||

देहीत्यन्यो ददात्यन्यो ददामीत्यपरः पुनः । किं क्लेशयसि तिष्ठेति तत्रान्योन्यं बभाषिरे ।। ६.७५. ॥

dehītyanyo dadātyanyo dadāmītyaparaḥ punaḥ | kiṃ kleśayasi tiṣṭheti tatrānyonyaṃ babhāṣire || 6.75. ||

विप्रलम्बितवस्त्रं च विमुक्तकवचायुधम् । समुद्यतमहाप्रासं यष्टिशूलासिसङ्कुलम्। प्रावर्तत महारौद्रं युद्धं वानररक्षसाम् ।। ६.७५. ॥

vipralambitavastraṃ ca vimuktakavacāyudham | samudyatamahāprāsaṃ yaṣṭiśūlāsisaṅkulam| prāvartata mahāraudraṃ yuddhaṃ vānararakṣasām || 6.75. ||

वानरान् दश सप्तेति राक्षसा जघ्नुराहवे । राक्षसान् दश सप्तेति वानराश्चाभ्यपातयन् ।। ६.७५. ॥

vānarān daśa sapteti rākṣasā jaghnurāhave | rākṣasān daśa sapteti vānarāścābhyapātayan || 6.75. ||

विस्रस्तकेशवसनं विध्वस्तकवचध्वजम् । बलं राक्षसमालम्ब्य वानराः पर्यवारयन् ।। ६.७५. ॥

visrastakeśavasanaṃ vidhvastakavacadhvajam | balaṃ rākṣasamālambya vānarāḥ paryavārayan || 6.75. ||

इत्यार्षे श्रीमद्रामायणे वाल्मीकीये आदिकाव्ये श्रीमद्युद्धकाण्डे पञ्चसप्ततितमः सर्गः ॥

ityārṣe śrīmadrāmāyaṇe vālmīkīye ādikāvye śrīmadyuddhakāṇḍe pañcasaptatitamaḥ sargaḥ ||