Who speaks here धृतराष्ट्र dhṛtarāṣṭra
English for this adhyāya (section level, not verse by verse): Ganguli’s translation, approximately §70–72 Ganguli follows a different edition, so the match is approximate.
धृतराष्ट्र उवाच । चक्षुष्मतां वै स्पृहयामि संजय; द्रक्ष्यन्ति ये वासुदेवं समीपे । विभ्राजमानं वपुषा परेण; प्रकाशयन्तं प्रदिशो दिशश्च ॥
dhr̥tarāṣṭra uvāca । cakṣuṣmatāṁ vai spr̥hayāmi saṁjaya; drakṣyanti ye vāsudevaṁ samīpe । vibhrājamānaṁ vapuṣā pareṇa; prakāśayantaṁ pradiśo diśaś ca ॥
ईरयन्तं भारतीं भारताना;मभ्यर्चनीयां शंकरीं सृञ्जयानाम् । बुभूषद्भिर्ग्रहणीयामनिन्द्यां; परासूनामग्रहणीयरूपाम् ॥
īrayantaṁ bhāratīṁ bhāratānām; abhyarcanīyāṁ śaṁkarīṁ sr̥ñjayānām । bubhūṣadbhir grahaṇīyām anindyāṁ; parāsūnām agrahaṇīyarūpām ॥
समुद्यन्तं सात्वतमेकवीरं; प्रणेतारमृषभं यादवानाम् । निहन्तारं क्षोभणं शात्रवाणां; मुष्णन्तं च द्विषतां वै यशांसि ॥
samudyantaṁ sātvatam ekavīraṁ; praṇetāram r̥ṣabhaṁ yādavānām । nihantāraṁ kṣobhaṇaṁ śātravāṇāṁ; muṣṇantaṁ ca dviṣatāṁ vai yaśāṁsi ॥
द्रष्टारो हि कुरवस्तं समेता; महात्मानं शत्रुहणं वरेण्यम् । ब्रुवन्तं वाचमनृशंसरूपां; वृष्णिश्रेष्ठं मोहयन्तं मदीयान् ॥
draṣṭāro hi kuravas taṁ sametā; mahātmānaṁ śatruhaṇaṁ vareṇyam । bruvantaṁ vācam anr̥śaṁsarūpāṁ; vr̥ṣṇiśreṣṭhaṁ mohayantaṁ madīyān ॥
ऋषिं सनातनतमं विपश्चितं; वाचः समुद्रं कलशं यतीनाम् । अरिष्टनेमिं गरुडं सुपर्णं; पतिं प्रजानां भुवनस्य धाम ॥
r̥ṣiṁ sanātanatamaṁ vipaścitaṁ; vācaḥ samudraṁ kalaśaṁ yatīnām । ariṣṭanemiṁ garuḍaṁ suparṇaṁ; patiṁ prajānāṁ bhuvanasya dhāma ॥
सहस्रशीर्षं पुरुषं पुराण;मनादिमध्यान्तमनन्तकीर्तिम् । शुक्रस्य धातारमजं जनित्रं; परं परेभ्यः शरणं प्रपद्ये ॥
sahasraśīrṣaṁ puruṣaṁ purāṇam; anādimadhyāntam anantakīrtim । śukrasya dhātāram ajaṁ janitraṁ; paraṁ parebhyaḥ śaraṇaṁ prapadye ॥
त्रैलोक्यनिर्माणकरं जनित्रं; देवासुराणामथ नागरक्षसाम् । नराधिपानां विदुषां प्रधान;मिन्द्रानुजं तं शरणं प्रपद्ये ॥
trailokyanirmāṇakaraṁ janitraṁ; devāsurāṇām atha nāgarakṣasām । narādhipānāṁ viduṣāṁ pradhānam; indrānujaṁ taṁ śaraṇaṁ prapadye ॥