161.1MBH-5-161-1
संजय उवाच । उलूकस्य वचः श्रुत्वा कुन्तीपुत्रो युधिष्ठिरः । सेनां निर्यापयामास धृष्टद्युम्नपुरोगमाम् ॥
saṁjaya uvāca । ulūkasya vacaḥ śrutvā kuntīputro yudhiṣṭhiraḥ । senāṁ niryāpayām āsa dhr̥ṣṭadyumnapurogamām ॥
Udyoga Parva · Adhyaya 5.161
Adhyāya 161
अध्यायः 161
Who speaks here संजय saṃjaya
English for this adhyāya (section level, not verse by verse): Ganguli’s translation, approximately §164–166 Ganguli follows a different edition, so the match is approximate.
In this chapterSanskrit allTransliteration allHindi unavailableEnglish unavailableUnavailable translations are marked, never invented.
161.2MBH-5-161-2
पदातिनीं नागवतीं रथिनीमश्ववृन्दिनीम् । चतुर्विधबलां भीमामकम्प्यां पृथिवीमिव ॥
padātinīṁ nāgavatīṁ rathinīm aśvavr̥ndinīm । caturvidhabalāṁ bhīmām akampyāṁ pr̥thivīm iva ॥
161.3MBH-5-161-3
भीमसेनादिभिर्गुप्तां सार्जुनैश्च महारथैः । धृष्टद्युम्नवशां दुर्गां सागरस्तिमितोपमाम् ॥
bhīmasenādibhir guptāṁ sārjunaiś ca mahārathaiḥ । dhr̥ṣṭadyumnavaśāṁ durgāṁ sāgarastimitopamām ॥
161.4MBH-5-161-4
तस्यास्त्वग्रे महेष्वासः पाञ्चाल्यो युद्धदुर्मदः । द्रोणप्रेप्सुरनीकानि धृष्टद्युम्नः प्रकर्षति ॥
tasyās tv agre maheṣvāsaḥ pāñcālyo yuddhadurmadaḥ । droṇaprepsur anīkāni dhr̥ṣṭadyumnaḥ prakarṣati ॥
161.5MBH-5-161-5
यथाबलं यथोत्साहं रथिनः समुपादिशत् । अर्जुनं सूतपुत्राय भीमं दुर्योधनाय च ॥
yathābalaṁ yathotsāhaṁ rathinaḥ samupādiśat । arjunaṁ sūtaputrāya bhīmaṁ duryodhanāya ca ॥
161.6MBH-5-161-6
अश्वत्थाम्ने च नकुलं शैब्यं च कृतवर्मणे । सैन्धवाय च वार्ष्णेयं युयुधानमुपादिशत् ॥
aśvatthāmne ca nakulaṁ śaibyaṁ ca kr̥tavarmaṇe । saindhavāya ca vārṣṇeyaṁ yuyudhānam upādiśat ॥
161.7MBH-5-161-7
शिखण्डिनं च भीष्माय प्रमुखे समकल्पयत् । सहदेवं शकुनये चेकितानं शलाय च ॥
śikhaṇḍinaṁ ca bhīṣmāya pramukhe samakalpayat । sahadevaṁ śakunaye cekitānaṁ śalāya ca ॥
161.8MBH-5-161-8
धृष्टकेतुं च शल्याय गौतमायोत्तमौजसम् । द्रौपदेयांश्च पञ्चभ्यस्त्रिगर्तेभ्यः समादिशत् ॥
dhr̥ṣṭaketuṁ ca śalyāya gautamāyottamaujasam । draupadeyāṁś ca pañcabhyas trigartebhyaḥ samādiśat ॥
161.9MBH-5-161-9
वृषसेनाय सौभद्रं शेषाणां च महीक्षिताम् । समर्थं तं हि मेने वै पार्थादभ्यधिकं रणे ॥
vr̥ṣasenāya saubhadraṁ śeṣāṇāṁ ca mahīkṣitām । samarthaṁ taṁ hi mene vai pārthād abhyadhikaṁ raṇe ॥
161.10MBH-5-161-10
एवं विभज्य योधांस्तान्पृथक्च सह चैव ह । ज्वालावर्णो महेष्वासो द्रोणमंशमकल्पयत् ॥
evaṁ vibhajya yodhāṁs tān pr̥thak ca saha caiva ha । jvālāvarṇo maheṣvāso droṇam aṁśam akalpayat ॥
161.11MBH-5-161-11
धृष्टद्युम्नो महेष्वासः सेनापतिपतिस्ततः । विधिवद्व्यूह्य मेधावी युद्धाय धृतमानसः ॥
dhr̥ṣṭadyumno maheṣvāsaḥ senāpatipatis tataḥ । vidhivad vyūhya medhāvī yuddhāya dhr̥tamānasaḥ ॥
161.12MBH-5-161-12
यथादिष्टान्यनीकानि पाण्डवानामयोजयत् । जयाय पाण्डुपुत्राणां यत्तस्तस्थौ रणाजिरे ॥
yathādiṣṭāny anīkāni pāṇḍavānām ayojayat । jayāya pāṇḍuputrāṇāṁ yattas tasthau raṇājire ॥