2.1MBH-15-2-1
वैशंपायन उवाच । एवं संपूजितो राजा पाण्डवैरम्बिकासुतः । विजहार यथापूर्वमृषिभिः पर्युपासितः ॥
vaiśaṁpāyana uvāca । evaṁ saṁpūjito rājā pāṇḍavair ambikāsutaḥ । vijahāra yathāpūrvam r̥ṣibhiḥ paryupāsitaḥ ॥
Āśramavāsika Parva · Adhyaya 15.2
Adhyāya 2
अध्यायः 2
Who speaks here वैशंपायन vaiśaṃpāyana
English for this adhyāya (section level, not verse by verse): Ganguli’s translation, approximately §1–3 Ganguli follows a different edition, so the match is approximate.
In this chapterSanskrit allTransliteration allHindi unavailableEnglish unavailableUnavailable translations are marked, never invented.
2.2MBH-15-2-2
ब्रह्मदेयाग्रहारांश्च प्रददौ स कुरूद्वहः । तच्च कुन्तीसुतो राजा सर्वमेवान्वमोदत ॥
brahmadeyāgrahārāṁś ca pradadau sa kurūdvahaḥ । tac ca kuntīsuto rājā sarvam evānvamodata ॥
2.3MBH-15-2-3
आनृशंस्यपरो राजा प्रीयमाणो युधिष्ठिरः । उवाच स तदा भ्रातॄनमात्यांश्च महीपतिः ॥
ānr̥śaṁsyaparo rājā prīyamāṇo yudhiṣṭhiraḥ । uvāca sa tadā bhrātr̥̄n amātyāṁś ca mahīpatiḥ ॥
2.4MBH-15-2-4
मया चैव भवद्भिश्च मान्य एष नराधिपः । निदेशे धृतराष्ट्रस्य यः स्थास्यति स मे सुहृत् । विपरीतश्च मे शत्रुर्निरस्यश्च भवेन्नरः ॥
mayā caiva bhavadbhiś ca mānya eṣa narādhipaḥ । nideśe dhr̥tarāṣṭrasya yaḥ sthāsyati sa me suhr̥t । viparītaś ca me śatrur nirasyaś ca bhaven naraḥ ॥
2.5MBH-15-2-5
परिदृष्टेषु चाहःसु पुत्राणां श्राद्धकर्मणि । ददातु राजा सर्वेषां यावदस्य चिकीर्षितम् ॥
paridr̥ṣṭeṣu cāhaḥsu putrāṇāṁ śrāddhakarmaṇi । dadātu rājā sarveṣāṁ yāvad asya cikīrṣitam ॥
2.6MBH-15-2-6
ततः स राजा कौरव्यो धृतराष्ट्रो महामनाः । ब्राह्मणेभ्यो महार्हेभ्यो ददौ वित्तान्यनेकशः ॥
tataḥ sa rājā kauravyo dhr̥tarāṣṭro mahāmanāḥ । brāhmaṇebhyo mahārhebhyo dadau vittāny anekaśaḥ ॥
2.7MBH-15-2-7
धर्मराजश्च भीमश्च सव्यसाची यमावपि । तत्सर्वमन्ववर्तन्त धृतराष्ट्रव्यपेक्षया ॥
dharmarājaś ca bhīmaś ca savyasācī yamāv api । tat sarvam anvavartanta dhr̥tarāṣṭravyapekṣayā ॥
2.8MBH-15-2-8
कथं नु राजा वृद्धः सन्पुत्रशोकसमाहतः । शोकमस्मत्कृतं प्राप्य न म्रियेतेति चिन्त्यते ॥
kathaṁ nu rājā vr̥ddhaḥ san putraśokasamāhataḥ । śokam asmatkr̥taṁ prāpya na mriyeteti cintyate ॥
2.9MBH-15-2-9
यावद्धि कुरुमुख्यस्य जीवत्पुत्रस्य वै सुखम् । बभूव तदवाप्नोतु भोगांश्चेति व्यवस्थिताः ॥
yāvad dhi kurumukhyasya jīvatputrasya vai sukham । babhūva tad avāpnotu bhogāṁś ceti vyavasthitāḥ ॥
2.10MBH-15-2-10
ततस्ते सहिताः सर्वे भ्रातरः पञ्च पाण्डवाः । तथाशीलाः समातस्थुर्धृतराष्ट्रस्य शासने ॥
tatas te sahitāḥ sarve bhrātaraḥ pañca pāṇḍavāḥ । tathāśīlāḥ samātasthur dhr̥tarāṣṭrasya śāsane ॥
2.11MBH-15-2-11
धृतराष्ट्रश्च तान्वीरान्विनीतान्विनये स्थितान् । शिष्यवृत्तौ स्थितान्नित्यं गुरुवत्पर्यपश्यत ॥
dhr̥tarāṣṭraś ca tān vīrān vinītān vinaye sthitān । śiṣyavr̥ttau sthitān nityaṁ guruvat paryapaśyata ॥
2.12MBH-15-2-12
गान्धारी चैव पुत्राणां विविधैः श्राद्धकर्मभिः । आनृण्यमगमत्कामान्विप्रेभ्यः प्रतिपाद्य वै ॥
gāndhārī caiva putrāṇāṁ vividhaiḥ śrāddhakarmabhiḥ । ānr̥ṇyam agamat kāmān viprebhyaḥ pratipādya vai ॥
2.13MBH-15-2-13
एवं धर्मभृतां श्रेष्ठो धर्मराजो युधिष्ठिरः । भ्रातृभिः सहितो धीमान्पूजयामास तं नृपम् ॥
evaṁ dharmabhr̥tāṁ śreṣṭho dharmarājo yudhiṣṭhiraḥ । bhrātr̥bhiḥ sahito dhīmān pūjayām āsa taṁ nr̥pam ॥